នៅក្នុងសម័យឌីជីថលយើងមានភាពងាយស្រួលក្នុងការចាយលុយតាមបែបឌីជីថលនេះពោលគឺអ្នកប្រើប្រាស់ធនាគារបច្ចុប្បន្នអាចចាយតាមApp និងតាមកាតធនាគារជាដើម។ យ៉ាងណាមិញទន្ទឹមនឹងភាពងាយស្រួលក្នុងការទូទាត់និងចាយវាយ វាក៏ជាឱកាសដែលអាចឲ្យជនខិលខូចលួចលុយអ្នកពីកុងធនាគារផងដែរបើមិនមានការប្រុងប្រយ័ត្ន។
ដូច្នេះថ្ងៃនេះ Business Cambodia សូមណែនាំពីរបៀបការពារ សម្រាប់អ្នកដែលប្រើប្រាស់សេវាធនាគារដើម្បីជៀសវាងបញ្ហាបាត់បង់លុយពីកុងធនាគារដោយសារតែជនខិលខូច។
១. កុំទុកលុយច្រើនពេកក្នុងកុងដែលមានភ្ជាប់កាតធនាគារ
បច្ចុប្បន្នអ្នកប្រើប្រាស់សេវាធនាគារនិងបើកគណនីធនាគារសុទ្ធតែមានAppសម្រាប់ប្រើប្រាស់ធ្វើសេវាធនាគារតាមទូរស័ព្ទដៃហើយតែងតែភ្ជាប់ជាមួយកាតធនាគារដូចជា Visa card, MasterCard និងកាតផ្សេងៗទៀត។ ការភ្ជាប់នេះអ្នកអាចប្រើប្រាស់សម្រាប់ធ្វើការទូទាត់ទំនិញឬសេវាកម្មតាមអនឡាញបានយ៉ាងងាយស្រួល ប៉ុន្ដែវាក៏មានហានិភ័យផងដែរ ដូច្នេះបើអ្នកប្រើប្រាស់App ធនាគារដោយមានភ្ជាប់ជាមួយនឹងកាតធនាគារ អ្នកមិនគួរដាក់លុយក្នុងកុងធនាគារនោះច្រើនពេកទេព្រោះជនអនាមឹកអាចនឹងhack យកលុយរបស់អ្នកបានតាមរយៈកាតធនាគាររបស់អ្នក។
២. ជៀសវាងការទូទាត់ទំនិញដោយប្រើកាត
ត្រូវជៀសវាងការទូទាត់ដោយប្រើកាតរបស់អ្នកដូចជាទូទាត់តាមបណ្ដាហាងផ្សេងៗព្រោះការហុចកាតរបស់អ្នកឲ្យអ្នកដទៃកាន់បានឃើញនោះពួកគាត់អាចនឹងដឹងពីព័ត៌មានមួយចំនួននៅលើកាត់របស់អ្នកដូចជាលេខ CVV លេខកាតនិងកាលបរិច្ឆេទផុតកំណត់ហើយព័ត៌មានទាំងនេះបើអ្នកផ្សេងដឹងសុទ្ធតែមានហានិភ័យដល់អ្នក។
ដូច្នេះដើម្បីជៀសវាងបញ្ហានេះអ្នកត្រូវធ្វើការទូទាត់តាមរយៈការស្កែនQR Code តាមទូរស័ព្ទដៃរ ហើយបច្ចុប្បន្នកាន់តែងាយស្រួលព្រោះយើងមានKHQR ដែលអនុញ្ញាតឲ្យយើងអាចធ្វើការស្កែនគ្រប់ធនាគារទៅលើ QR តែមួយដោយមិនបាច់ប្រើប្រាស់កាតនាំតែហានិភ័យទៀតទេ។
៣. ត្រូវបិទកាតបើអ្នកជ្រុះបាត់កាត
មិនខុសពីការរៀបរាប់ក្នុងចំណុចទី២ខាងលើនោះទេ ក្នុងករណនីអ្នកជ្រុះកាតបាត់ អ្នកត្រូវរាយការណ៍ទៅកាន់ធនាគារដែលអ្នកកំពុងប្រើប្រាស់សេវាដើម្បីឲ្យគេបិទកាតរបស់អ្នកចោទជាបន្ទាប់ព្រោះអ្នកដែលរើសបានអាចនឹងប្រើប្រាស់ព័ត៌មានលើកាតរបស់អ្នកដូចជាលេខCVV សម្រាប់យកទៅប្រើប្រាស់ទិញទំនិញអនឡាញហើយទឹកលុយនឹងត្រូវបានកាត់ចេញពីកុងធនាគារបស់អ្នក៕
