រដ្ឋបាលខេត្តកណ្តាលបានជូនដំណឹងស្តីពីការបិទចរាចរណ៍ នៅចំណុចស្ពានអាកាសសម្តេចមហាបវអធិបតី ហ៊ុន ម៉ាណែត ប្រសព្វរវាងមហាវិថីសម្តេចតេជោ ហ៊ុន សែន និងផ្លូវជាតិលេខ២ ដើម្បីរៀបចំស្ទូចលើកដំឡើងផ្ទឹមស្ពានបេតុង អារម៉េ នៅក្នុងការដ្ឋានសាងសង់។
ការផ្អាកចរាចរណ៍បណ្តោះអាសន្ននេះនឹងធ្វើចំនួន៦ថ្ងៃផ្សេងគ្នាក្នុងខែមីនានេះ ដោយថ្ងៃទី១០ ទី១៥ ទី២៧ ខែមីនា ឆ្នាំ២០២៥ នឹងបិទចរាចរណ៍កំណាត់ផ្លូវ ៦០ម៉ែត្រ ពីស្តុបមហាវិថី សម្តេចតេជោ កែងនឹងផ្លូវ ៥០ម៉ែត្រ មកដល់ផ្លូវជាតិលេខ២ (ក្នុងបរិវេណការដ្ឋាន) ចាប់ពីម៉ោង ៧:០០នាទីព្រឹក រហូតដល់ម៉ោង ១០:០០នាទីយប់។
ដោយឡែកនៅថ្ងៃទី២០ ទី២២ ខែមីនា ឆ្នាំ២០២៥ នឹងបិទចរាចរណ៍កំណាត់មហាវិថីព្រលានសម្តេចតេជោ ដោយបិទពីផ្លូវចូលផ្លូវជាតិលេខ២ ទៅមហាវិថីព្រលានសម្តេចទៅមហាវិថីព្រលានសម្តេចតេជោ (ក្នុងបរិវេណការដ្ឋាន) ចាប់ពីម៉ោង ៧:០០នាទីព្រឹក រហូតដល់ម៉ោង ១០:០០នាទីយប់។
ក្នុងនោះថ្ងៃទី២៩ ខែមីនា ឆ្នាំ២០២៥ នឹងបិទចរាចរណ៍កំណាត់ផ្លូវជាតិលេខ២ (ក្នុងបរិវេណការដ្ឋាន) និងផ្លូវ ៦០ម៉ែត្រ ពីស្តុបមហាវិថីសម្តេចតេជោ កែងនឹងផ្លូវ ៥០ម៉ែត្រ ទៅដល់មហាវិថី ព្រលានសម្តេចតេជោ ចាប់ពីម៉ោង ៧:០០នាទីព្រឹក រហូតដល់ម៉ោង ១០:០០នាទីយប់។
សូមបញ្ជាក់ផងដែរថាចំពោះកំណាត់ផ្លូវដែលត្រូវពង្វាងចរាចរណ៍នៅក្នុងការដ្ឋានសាងសង់ ក៏មានភ្ជាប់ជូននៅក្នុងផែនទី និងមានការណែនាំផ្ទាល់នៅច្រកទីតាំងដែលបានបិទពីសមត្ថកិច្ចប្រចាំការ៕
អត្ថបទដោយ៖ ពីង ជូអេង
