នៅថ្ងៃទី០៦ ខែឧសភា ឆ្នាំ២០២២ ព្រះករុណាជាអម្ចាស់ជីវិតតម្កល់លើត្បូង ព្រះចៅក្រុងកម្ពុជាធិបតីព្រះមហាក្សត្រនៃព្រះរាជាណាចក្រកម្ពុជា ជាគោរពសក្ការៈដ៏ខ្ពង់ខ្ពស់បំផុត ព្រះអង្គសព្វព្រះរាជហឫទ័យ ប្រោសប្រទានតែងតាំង ព្រះអង្គម្ចាស់ក្សត្រី នរោត្ដម ពង្ស សុរិយា និងព្រះអង្គម្ចាស់ នរោត្ដ ពង្សមុនីឫទ្ធ ជាទីប្រឹក្សាអមព្រះរាជលេខាធិការដ្ឋានព្រះមហាក្សត្រ មានឋានៈ ស្មើអនុរដ្ឋលេខាធិការ នេះបើយោងតាមការចេញផ្សាយរបស់គេហទំព័រហ្វេសប៊ុករបស់ព្រះនាងម្ចាស់ Jenna Norodom ដែលជាព្រះញាតិវង្ស។

យ៉ាងណាមិញ ប្រហែលជាមិនមានមនុស្សច្រើននៅឡើយនោះទេ ដែលបានដឹងពី ព្រះរាជជីវប្រវត្តិរបស់ព្រះអង្គម្ចាស់ក្សត្រី ព្រះអង្គម្ចាស់ក្សត្រី នរោត្ដម ពង្ស ដែលបានទទួលនូវការតែងតាំង ជាអនុរដ្ឋលេខាធិកាវ័យក្មេង។ ខាងក្រោមនេះគឺជាជីវប្រវត្តិសង្ខេប ទាក់ទងនឹងខ្សែរាជវង្ស និងការសិក្សារបស់ទ្រង់។

ព្រះអង្គម្ចាស់ក្សត្រី ទ្រង់ប្រសូតនៅថ្ងៃទី២៥ វិច្ឆិកា ឆ្នាំ១៩៩៧ ត្រូវជាព្រះបុត្រី សម្តេចព្រះមហិស្សរា នរោត្តម ច័ក្រពង្ស ឧត្តមប្រឹក្សាផ្ទាល់ព្រះមហាក្សត្រ និង ជាសមាជិកក្រុមប្រឹក្សារដ្ឋធម្មនុញ្ញ ហើយបើគិតតាមខ្សែព្រះបិតា ព្រះអង្គម្ចាស់ក្សត្រី ត្រូវជាព្រះរាជនត្តា (ចៅស្រី) នៃព្រះករុណា ព្រះបរមរតនកោដ្ឋ និង ត្រូវជាព្រះភាគិនេយ្យា (ក្មួយស្រី) នៃព្រះករុណា ព្រះមហាក្សត្រ នៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត ។ មិនត្រឹមតែមានរូបឆោមស្រស់សោភាកាលពីឆ្នាំ២០១៨ ព្រះអង្គម្ចាស់ក្សត្រី រូបនេះ បានបញ្ចប់ការសិក្សាថ្នាក់បរិញ្ញបត្រពី University of International Business and Economics រដ្ឋធានីប៉េកាំង សាធារណរដ្ឋប្រជាមានិតចិនជំនាញ នយោបាយអន្តរជាតិ ក្នុងនាមជានិស្សិតដែលឆ្នើមបំផុត។ ដោយឡែកបច្ចុប្បន្ននេះព្រះអង្គម្ចាស់ក្សត្រីមានព្រះជន្មាយុ២៥ព្រះវស្សាហើយ ក្នុងនោះព្រះអង្គក៏មានព្រះរាជបំណង ដើម្បីបន្តយកថ្នាក់អនុបណ្ឌិតផងដែរ៕

អត្ថបទដោយ ពីង​ ជូអេង (​ ត្រចៀកកាំ​​​​​​​​​​​​​​​​​ )