អគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ បានបង្ហាញអំពីល្បិចចំពោះការរឆបោកលុយ តាមរយៈការទិញផលិតផលតាមអនឡាញ ដោយពុំទទួលបានទំនិញ ឬសម្ភារៈនោះឡើយ។

ដោយក្រុមឆបោក បានបង្កើតគណនីបណ្តាញសង្គម និងគេហទំព័រ ក្លែងក្លាយ ដើម្បីធ្វើការផ្សព្វផ្សាយលក់ទំនិញ ក្នុងគោលបំណងឆបោកជនរងគ្រោះតាមរយៈបណ្តាញសង្គម និងគេហទំព័រនានាដូចជា Instagram, TikTok​ និងFacebook ជាដើម។

ក្នុងនោះករណីដែលអគ្គនាយក​ដ្ឋានបច្ចេកវិទ្យាឌីជីថល និងផ្សព្វផ្សាយអប់រំ ទទួលបានសេចក្តីរាយការណ៍ ពីជនរង​គ្រោះ ដែលបានចាញ់ល្បិចពីអ្នកលក់អនឡាញបោក ញឹកញាប់ជាងគេរួមមាន៤ស្នៀតដូចខាងក្រោមនេះ៖

១. សម្ភារៈ ឬទំនិញលក់ជូនក្នុងតំលៃទាបជាងទីផ្សារ

២. មានសារសម្លេង និងការសរសេររៀបរាប់ពេញចិត្តនឹងទំនិញ(Feedback)

៣. មានទីតាំង និងអាស័យដ្ឋានលក់ដូរច្បាស់លាស់

៤. មានរូបភាពវិក្ក័យបត្រភ្ជាប់និងរូបភាពសម្ភារៈទាំងនោះ

ក្រោយពីចរចាគ្នារួចជនរងគ្រោះបានយល់ព្រមទិញទំនិញ។  បន្ទាប់មកពួកគេ (ក្រុមឆបោក ) បានផ្ញើរូបភាពសម្ភារៈ ដែលមានការសរសេរឈ្មោះ លេខទូរសព្ទ អាសយដ្ឋានជនរងគ្រោះ និងផ្ញើរូបភាពទំនិញទៅឱ្យជនរងគ្រោះ ដើម្បីមានការជឿជាក់។

ជនបោកប្រាសទាំងនោះបានតម្រូវឱ្យជនរងគ្រោះធ្វើការផ្ទេរប្រាក់តាមរយៈ KHQR ឬតាមប្រព័ន្ធធនាគារឯកជននានា ក្រោយពីទទួលប្រាក់នោះរួចហើយ ពួកគេ(ក្រុមឆបោក)នឹងធ្វើការ block chat ជនរងគ្រោះ ព្រមទាំងលុបចោលរាល់ការសន្ទនាទាំងអស់។

ដូច្នេះអគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ សូមក្រើនរំលឹកដល់​ប្រជាពលរដ្ឋឱ្យមានការប្រុងប្រយ័ត្នមុនការទិញទំនិញអនឡាញ ត្រូវពិចារណាដូចខាងក្រោម៖

១. សូមត្រួតពិនិត្យគេហទំព័រលក់ទំនិញអនឡាញឱ្យបានច្បាស់លាស់មុននឹងសម្រេចចិត្តទិញ

២. កុំធ្វើការវេរប្រាក់ មុនពេលមិនទាន់ទទួលបានទំនិញ

៣. ករណីសង្ស័យ គួរសួររកបញ្ជាក់ទីតាំង និងទៅទិញទំនិញផ្ទាល់

៤. សូមរាយការណ៍មកសមត្ថកិច្ចជំនាញដើម្បីជួយស្វែងរកដំណោះស្រាយ៕

​