អាជ្ញាធរជាតិប្រយុទ្ធប្រឆាំងគ្រឿងញៀនបានដាក់ឱ្យដំណើរការកម្មវិធីទូរសព្ទដៃមួយដែលឈ្មោះថា NoDrug សម្រាប់ឱ្យប្រជាពលរដ្ឋអាចរាយការណ៍អំពីករណីគ្រឿងញៀន រួមមានការជួញដូរ និងករណីផ្សេងៗទៀតទាក់ទងនឹងបញ្ហាគ្រឿងញៀនក្នុងមូលដ្ឋានរបស់ខ្លួន។
កម្មវិធីទូរសព្ទដៃ NoDrug ដែលបង្កើតឡើងនៅពាក់កណ្តាលឆ្នាំ២០២៤មួយនេះ គឺស្ថិតក្រោមការគ្រប់គ្រងរបស់អាជ្ញាធរជាតិប្រយុទ្ធប្រឆាំងគ្រឿងញៀន ដើម្បីឱ្យពលរដ្ឋអាចចូលរួម រាយការណ៍គ្រប់កាលៈទេសៈអំពីបទល្មើសយ៉ាងសម្ងាត់ តាមទូរស័ព្ទដៃ ដោយគ្រាន់តែផ្ញើសារជាអក្សរ សំឡេង វីដេអូ រួមជាមួយទីតាំងកើតហេតុទៅក្នុងកម្មវិធី NoDrug។
ខណៈការរាយការណ៍នេះអាជ្ញាធរនៃអង្គភាពប្រឆាំងគ្រឿងញៀនបញ្ជាក់ថាមានសុវត្ថិភាព១០០% សម្រាប់អ្នករាយការណ៍ ព្រោះថារាល់គណនីដែលរាយការណ៍ពុំមានតម្រូវឱ្យ បញ្ជាក់អត្តសញ្ញាណនោះទេ។
ទន្ទឹមនឹងអាចរាយការណ៍សម្រាប់ចូលរួមចំណែកបោសសម្អាតគ្រឿងញៀនក្នុងប្រទេស ប្រជាពលរដ្ឋក៏អាចទទួលបានព័ត៌មានរហ័ស ចំណេះដឹងអប់រំអំពីគ្រឿងញៀន ព័ត៌មានទាក់ទងនឹងសេវាកម្មព្យាបាល និងស្តារនីតិសម្បាទាអ្នកញៀនគ្រឿងញៀនផងដែរ។
សូមជម្រាបថាកម្មវិធីទូរស័ព្ទដៃ NoDrug នាពេលបច្ចុប្បន្ននេះមានអ្នកចូលប្រើប្រាស់រហូតជាង ៤ម៉ឺននាក់ហើយនិងមានការចូលរួមរាយការណ៍ពីពលរដ្ឋ អំពីករណីគ្រឿងញៀនលើសពី១ពាន់ករណីផងដែរ ចាប់តាំងពីដាក់ដំណើរការអស់់រយៈពេលជាង១០ខែកន្លងមក៕
