ជាដំណឹងរីករាយសម្រាប់អ្នកខេត្ដពោធិ៍សាត់ ខណៈខេត្ដនៅភាគខាងលិចនៃប្រទេសកម្ពុជាមួយនេះទទួលបានគម្រោងធំចំនួន ២ និងត្រៀមបើកការដ្ឋានសាងសង់បន្ដបន្ទាប់គ្នានាពេលនាពេលឆាប់ៗខាងមុខផងដែរ។ សម្រាប់គម្រោងថ្មីទាំងពីរនោះរួមមាន៖

១. រោងចក្រ Minebea

ក្រុមហ៊ុន Minebea ដែលជាក្រុមហ៊ុនអេឡិចត្រូនិករបស់ជប៉ុន ផលិតម៉ូទ័រគ្រប់ប្រភេទ បានសម្រេចជ្រើសយកខេត្ដពោធិ៍សាត់ក្នុងការសាងសង់រោងចក្រទី២ របស់ខ្លួន។ តាមការបញ្ជាក់ពីរដ្ឋបាលខេត្ដ រោងចក្រទី២ របស់ក្រុមហ៊ុន Minebea នេះនឹងចាប់ផ្ដើមបើកការដ្ឋានសាងសង នៅអំឡុងខែកញ្ញា ឆ្នាំ២០២៤ឆាប់ៗខាងមុខ លើផ្ទៃដីប្រមាណ៥០ហិកតា ក្នុងតំបន់សេដ្ឋកិច្ចពិសេសក្រគរ ខេត្តពោធិ៍សាត់និងបង្កើតឱកាសការងាររាប់ពាន់កន្លែង។

សូមជម្រាបថា ក្រុមហ៊ុនមីនីបៀ-Minebea បានបើកដំបូងនៅកម្ពុជា ក្នុងឆ្នាំ២០១១ ក្នុងតម្លៃវិនិយោគ ចំនួន២៣លានដុល្លារអាមេរិក ខណៈបច្ចុប្បន្នក្រុមហ៊ុននេះ បានតម្លើងការវិនិយោគរបស់ខ្លួននៅកម្ពុជា ឡើងដល់ជាង៦០០លានដុល្លារអាមេរិក និងបានកំពុងបង្កើតឱការងារជូនពលរដ្ឋកម្ពុជាជិត ៧ ពាន់នាក់។

២. ពហុគីឡដ្ឋានសម្ដេចតេជោក្រគរ

ក្រៅពីគម្រោងរោងចក្រក្រុមហ៊ុន Minebea នៅដើមខែកក្ដដា ឆ្នាំ២០២៤ខាងមុខនេះ រដ្ឋបាលខេត្ដក៏មានគម្រោងសាងសង់ «ពហុកីឡដ្ឋានសម្ដេចតេជោក្រគរ» ដែលជាពហុកីឡដ្ឋានអន្ដរជាតិ មានទីតាំងស្ថិតក្នុងភូមិវាលវង់ ឃុំស្នាអន្សា ស្រុកក្រគរ ខេត្តពោធិ៍សាត់។

ពហុកីឡដ្ឋាននេះ នឹងត្រូវសាងសង់នៅលើផ្ទៃដី ២៥ ហិកតា ដែលរួមមានទីលានបាល់ទាត់ខ្នាតអន្តរជាតិ ទីលានមហោស្រព ទីលានបាល់ទះ ទីលានបាល់បោះ ទីលានរត់ប្រណាំង ទីលានវាយសី កន្លែងអង្គុយទស្សនា កន្លែងហាត់ប្រាណ ប្រព័ន្ធផ្លូវខ្វាត់ខ្វែង វាលស្មៅ កន្លែងក្មេងលេង កន្លែងអង្គុយលេង ស្រះទឹក និងកន្លែងចតរថយន្ត៕