ចំណេះដឹងរឿងលុយកាក់គឺពិតជាសំខាន់សម្រាប់មនុស្សម្នាក់ៗព្រោះកាលណាពួកគាត់មានចំណេះដឹងផ្នែកហិរញ្ញវត្ថុនោះពួកគាត់អាចផ្លាស់ប្ដូរជីវភាព អាចកសាងភាពមានបានរស់នៅមានសេរីភាពនិងមិនរងសម្ពាធនៃលុយកាក់ក្នុងការរស់នៅ។

ទាក់ទងនឹងរឿងលុយកាក់នេះដែរ ថ្ងៃនេះBusiness Cambodia សូមចែករំលែកនូវមេរៀនពីលុយកាក់មួយចំនួនដែលមនុស្សគួររៀនត្រឹមវ័យ១៨ឆ្នាំដើម្បីរស់នៅមានសេរីភាពនិងអាចសល់ទ្រព្យ សល់លុយ។

១. កំណត់គោលដៅ និងចំណង់ចំណូលចិត្ត

 អ្នកត្រូវដឹងពីគោលដៅរបស់អ្នកដើម្បីរៀបចំហិរញ្ញវត្ថុនិងធ្វើការដើម្បីសម្រេចគោលដៅនោះ។ ឧទាហរណ៍ ការទិញផ្ទះរស់នៅគឺជាគោលដៅហិរញ្ញវត្ថុដែលមនុស្សភាគច្រើនបានកំណត់។ យ៉ាងណាមិញបើអ្នកជាមនុស្សដែលចូលចិត្តធ្វើដំណើរច្រើនមិនមានផែនការរស់នៅមួយកន្លែងបានយូរនោះការទិញផ្ទះមិនមែនគោលដៅដែលអ្នកគួរសម្រេចឡើយ។

២. ការប្រាក់ផ្គួបជួយអ្នកសាងទ្រព្យសម្រាប់អនាគត

 ពេលយើងនិយាយពីការវិនិយោគ ការប្រាក់ផ្គួបឬយើងហៅម្យ៉ាងទៀតថាលុយបង្កើតលុយគឺពិតជាសំខាន់ដែលអាចជួយយើងកសាងទ្រព្យសម្រាប់អ្នកគត់។ ឧទាហរណ៍បើអ្នកវិនិយោគទុន១ពាន់ដុល្លារដោយទទួលបានអត្រាចំណេញប្រចាំឆ្នាំ១០% នោះមួយឆ្នាំក្រោយលុយអ្នកកើនបាន១,១០០ដុល្លារ។ ហើយបើអ្នកបន្តយកលុយ១,១០០ដុល្លារបន្តទៀតនោះមួយឆ្នាំក្រោយទៀតលុយអ្នកកើនឡើងដល់១,១១០ដុល្លារ។ ដូច្នេះបើអ្នកបន្តវិនិយោគនោះលុយរបស់អ្នកនឹងកើនឡើងជាលំដាប់។

 អ្វីដែលបានរៀបរាប់ខាងលើគឺជាមេរៀនចង់បញ្ជាក់ថាការវិនិយោគបើយើងចាប់ផ្ដើមឲ្យកាន់តែឆាប់កាន់តែល្អព្រោះអ្នកនឹងមានពេលច្រើនក្នុងការកសាងទ្រព្យសម្រាប់អនាគតនិងក្រុមគ្រួសារអ្នក។ ជាពិសេសវិនិយោគជាប់ជាប្រចាំដូចឧទាហរណ៍ខាងលើនោះអនាគតអ្នកនឹងសល់ទ្រព្យច្រើនជាមុនខានឡើយ។

៣. យកចិត្តទុកដាក់ជាមួយលុយ

យកចិត្តទុកដាក់ជាមួយលុយត្រង់នេះគឺចង់សំដៅដល់ការចាត់ចែងនិងគ្រប់គ្រងលុយរបស់អ្នក។ មានមនុស្សមិនតិចទេរកចំណូលបានច្រើនប៉ុន្ដែបែរជាខ្វះខាតលុយ ដាច់លុយចាយ ហើយមានអ្នកខ្លះរហូតដល់ធ្លាក់ខ្លួនជំពាក់លុយគេទៀតផង។

 នៅពេលដែយើងនិយាយពីការចាត់ចែងលុយ អ្នកត្រូវបែងចែកឲ្យដាច់រវាងការចំណយលើតម្រូវការចាំបាច់និងកាចង់បាន។ តម្រូវការចាំបាច់គឺរបស់ដែលយើងអត់មិនបានដូចហាអារហូបចុក ការស្នាក់នៅ ការធ្វើដំណើរ។ ចំណែកការចង់បានគឺជារបស់ដែលយើងអត់ក៏មិនបញ្ហាដែរ ដូចជាការដើរលេងកម្សាន្តនិងដូរស៊េរីម៉ូតូថ្មីឬទូរស័ព្ទថ្មីជាដើម។

 រឿងដំបូងដែលអ្នកគួរធ្វើក្នុងការគ្រប់គ្រងលុយកាក់គឺតាមដានចំណូលចំណាយរបស់អ្នកជារៀងរាល់ខែដើម្បីដឹងថាតើមួយខែៗអ្នកចំណាយលើអ្វីខ្លះហើយចំណាយប៉ុន្មានពិតប្រាកដ។ ការតាមដានការចំណាយជួយឲ្យអ្នកដឹងពីចំណាយមិនចាំបាច់ហើយកាត់បន្ថយវាដើម្បីអាចសល់លុយទុកប្រើប្រាស់ក្នុងតម្រូវការចាំបាច់។

៤. រាប់អានមនុស្សដែលគាំទ្រគោលដៅរបស់អ្នក

ការរាប់អានមនុស្សពិតជាជៈឥទ្ធិពលខ្លាំងលើជីវិតរបស់អ្នកពោលគឺបើអ្នករាប់អានមនុស្សល្អអ្នកនឹងដើរផ្លូវល្អ តែបើអ្នករាប់អានមនុស្សអាក្រក់ជីវិតអ្នកងងឹតសូន្យឈឹង។ ត្រង់នេះអ្នកគួររាប់អានមនុស្សដែលគាំទ្រគោលដៅរបស់អ្នក។ ឧទាហរណ៍បើអ្នកមានគោលដៅវិនិយោគដើម្បីសេរីភាពហិរញ្ញវត្ថុ អ្នកគួររាប់អានមនុស្សដែលចូលចិត្តវិនិយោគនោះមនុស្សទាំងនោះអាចនឹងជួយអ្នកសម្រេចគោលដៅបាន៕