ក្រោយការប្រកួតកីឡាបាល់ទាត់ពិភពលោកបានបញ្ចប់ទៅ ទីបំផុតពានរង្វាន់ FIFA World Cup 2022 គឺបានធ្លាក់ទៅលើប្រទេសអាហ្សង់ទីនហើយ ក្រោយការលេងយ៉ាងស្វិតស្វាញជាមួយក្រុមជម្រើសជាតិបារាំង ដោយបាល់កាត់សេចក្ដី ១១ ម៉ែត្រ (Penalty) ក្នុងលទ្ធផល ៤ ទល់នឹង ២ នាយប់ថ្ងៃទី១៩ ខែធ្នូ ឆ្នាំ២០២២នេះ។
ក្រោយលើកពានFIFA World Cup ជាលើកដំបូងក្នុងអាជីព ប្រធានកីឡាកររបស់ប្រទេសអាស្សង់ទីន លោក Lionel Messi បានថ្លែងសារទៅកាន់អ្នកគាំទ្រនៅទូទាំងពិភពលោក នៅលើបណ្តេញសង្គមផ្ទាល់ខ្លួនយ៉ាងដូច្នេះថា “ជើងឯកពិភពលោក! ច្រើនដងហើយដែលខ្ញុំយល់សប្តិឃើញវា ចង់បានយ៉ាងណា ក៏នៅតែមិនចុះចាញ់ ខ្ញុំសឹងតែមិនអាចជឿថាវាបាន ខ្ញុំសូមថ្លែងអំណរគុណយ៉ាងជ្រាលជ្រៅចំពោះគ្រួសារខ្ញុំ ដល់អ្នកទាំងអស់គ្នាដែលគាំទ្រខ្ញុំ និងអ្នកទាំងអស់គ្នាដែលជឿជាក់លើពួកយើង”។
កីឡាករវ័យ៣៥ឆ្នាំរូបនេះបានបន្តថា “យើងបញ្ជាក់ជាថ្មីម្តងទៀតថា ជនជាតិអាហ្សង់ទីននៅពេលដែលយើងប្រយុទ្ធជាមួយគ្នា រួបរួមគ្នា យើងអាចសម្រេចបាននូវអ្វីដែលយើងចង់បាន ជាកុសលរបស់ក្រុមនេះ នៅលើបុគ្គលម្នាក់ៗ គឺជាកម្លាំងនៃការតស៊ូទាំងអស់គ្នា ដើម្បីសុបិនដូចគ្នា ដែលជាឈាមជ័រនៃជនជាតិអាហ្សង់ទីនទាំងអស់ យើងធ្វើវាបានហើយ ! តោះទៅ អាហ្សង់ទីន ជួបគ្នាឆាប់ៗអាហ្សង់ទីន”។
គួរជម្រាបផងដែរថាពាន FIFA World Cup គឺធ្វើឡើងពីមាសសុទ្ធ ៧៥% ទម្ងន់៦គីឡូក្រាមមានតម្លៃជាង២០០លានដុល្លារ។សម្រាប់ការប្រកួត FIFA World Cup សម្រាប់ឆ្នាំ២០២២ នេះដែរគឺមានប្រទេស Qatar ធ្វើជាម្ចាស់ផ្ទះដែលបានចាប់ផ្តើមបើកការប្រកួតតាំងពីថ្ងៃទី២២ វិច្ឆិកា ឆ្នាំ២០២២ មកម្ល៉េះដើម្បីវែកមុខរកក្រុមជើងឯកបាល់ទាត់ពិភពលោក៕
អត្ថបទដោយ៖ ពីង ជូអេង
