Telegram គឺជាបណ្ដាញសង្គមដ៏ពេញនិយមមួយសម្រាប់ប្រជាជនកម្ពុជា ដែលពួកគាត់ប្រើប្រាស់ក្នុងការទាក់ទងគ្នាក្នុងការរស់នៅប្រចាំថ្ងៃ ក្នុងការងារនិងការរកស៊ីជាដើម។ យ៉ាងណាមិញTelegram មិនត្រឹមតែជាបណ្ដាញសង្គមសម្រាប់ទំនាក់ទំនងប៉ុណ្ណោះទេតែយើងក៏អាចប្រើប្រាស់វាឲ្យមានប្រយោជន៍តាមរយៈការបង្កើត Channel Telegram ផ្សព្វផ្សាយលក់ផលិតផលឬសេវាកម្មដើម្បីរកចំណូលនិងរបៀបរកចំណូលផ្សេងៗទៀតពីTelegram។

ជុំវិញការប្រើប្រាស់Telegram ឲ្យមានប្រយោជន៍ បច្ចុប្បន្ននេះ អ្នកប្រើប្រាស់Telegram នៅកម្ពុជាយើងក៏អាចប្រើប្រាស់Telegramដើម្បីរកចំណូលពីកម្មវិធីTelegram មួយដែលយើងហៅថា” Telegram Ads Platform” ដែលកម្មវិធីនេះគឺជាវេទិកាផ្សព្វផ្សាយពាណិជ្ជកម្មផ្លូវការរបស់ Telegram ដែលអនុញ្ញាតឲ្យក្រុមហ៊ុនផ្សេងៗជាច្រើនអាចផ្សព្វផ្សាយសារ(message ដែលពិពណ៌នាពីសេវាកម្មឬផលិតផលរបស់ពួកគេនៅក្នុង Channel Telegramរបស់អ្នក។

ចំពោះចំណូលដែលបានពីក្រុមហ៊ុនផ្សព្វផ្សាយតាមរយៈបង្ហាញជាសារ(message)ក្នុងChannel Telegram របស់អ្នកនេះគឺ Telegram ចែកគ្នាម្នាក់ពាក់កណ្ដាលជាមួយនឹងម្ចាស់ Channel ផ្ទាល់។ ឧទាហរណ៍បើចំណូលពីផ្សព្វផ្សាយទទួលបាន១០០ដុល្លារនោះ Telegram យក៥០ដុល្លារ ហើយអ្នកជាម្ចាស់ Channel Telegram បាន៥០ដុល្លារ ពោលគឺចែកគ្នាស្មើម្នាក់៥០%តែម្ដង។

 ត្រង់នេះសូមបញ្ជាក់ផងដែរថាចំណូលដែលអ្នកទទួលបានពីការផ្សព្វផ្សាយក្នុង Channel របស់អ្នកមិនមែនទទួលបានជាលុយដោយផ្ទាល់នោះ ពោលគឺTelegram ផ្ដល់ឲ្យអ្នកជាលុយឌីជីថលដែលមានឈ្មោះថាTON ជាលុយឌីជីថលអភិវឌ្ឍនដោយក្រុមហ៊ុនTelegram ផ្ទាល់តែម្ដង។ ដើម្បីប្ដូរពីកាក់TON ទៅជាលុយពិតប្រាកដដូចជាលុយដុល្លារ គឺTelegram តម្រូវឲ្យអ្នកមានកាក់TON ចាប់ពី១០កាក់ឡើងទៅ។

ខាងក្រោមនេះគឺជាជំហានដែលអ្នកត្រូវដើម្បីមានឱកាសអាចរកចំណូលតាមអនឡាញតាមរយៈTelegram របស់អ្នកផ្ទាល់៖

១. បង្កើត Channel Telegram

អ្នកត្រូវបង្កើត Channel Telegram មួយផ្ទាល់ខ្លួនហើយChannel នេះគឺត្រូវតែជា Channel សាធារណៈ( Public Channel) ដែលអនុញ្ញាតឲ្យមនុស្សទូទៅអាចចូលក្នុងChannel បាន។ ហើយចំពោះលក្ខណៈដែលអាចរកចំណូលបានគឺ Channel របស់អ្នកត្រូវមាន Subscriber ចាប់ពី១០០០នាក់ឡើងទៅ។

ចែករំលែកជាប្រចាំ

បន្ទាប់ពីបានបង្កើត Channel រួចហើយអ្នកត្រូវតែធ្វើការចែករំលែកនៅក្នុង Channel របស់អ្នកនូវចំណេះដឹង បទពិសោធន៍ដែលមានប្រយោជន៍ទៅដល់អ្នកគាំទ្រ( Subscriber) ដោយចែករំលែកជារៀងរាល់ថ្ងៃ។ ត្រង់នេះអ្នកអាចជ្រើសរើសប្រធានបទជាក់លាក់ដែលជាប្រយោជន៍ដល់អ្នកតាមដាន។ ឧទាហរណ៍ អ្នកអាចចែករំលែកចំណេះជំនាញ បទពិសោធន៍ដែលអ្នកមាន។

ជាក់ស្ដែងលោក ទឿយ ហុង អ្នកស្រាវជ្រាវហិរញ្ញវត្ថុនៅ Business Cambodia មានChannel ដែលមាន Subscriber ជាង១២០០០នាក់ លោកបានចែករំលែកជាប្រចាំទាក់ទងនឹងការវិនិយោគលើផ្សារហ៊ុននិងការវិនិយោគ ហើយមកដល់ពេលនេះលោកចាប់ផ្ដើមរកចំណូលពី Channel Telegram បណ្ដើរៗហើយ។

សរុបមក អ្វីដែលបានរៀបរាប់ខាងលើគឺធ្វើឲ្យយើងបានដឹងខ្លះៗពីរបៀបរកចំណូលតាមTelegram ហើយបងប្អូនអាចយកទៅអនុវត្តបានសម្រាប់ខ្លួនឯងដើម្បីបើកផ្លូវឲ្យខ្លួនឯងមានឱកាសរកចំណូលបន្ថែមតាមអនឡាញដោយប្រើប្រាស់ចំណេះជំនាញនិងបទពិសោធន៍អ្នកមាន។

ខាងក្រោមនេះគឺជារូបភាពដែលបង្ហាញពីកន្លែងដែលអ្នកអាចមើលពីចំណូលដែលអ្នករលបាននៅក្នុង Channel Telegram របស់អ្នក៕