ការរក្សាដង្ហើមនិងអាយុជីវិត របស់អាជីវកម្មឬមុខរបរមួយឱ្យឈរជើងបានយូរ មួយផ្នែកធំគឺពឹងផ្អែកទៅលើ «របៀបនៃការចាប់ផ្ដើមអាជីវកម្មមួយនោះ»។ បើអ្នកចាប់ផ្ដើមត្រូវ អាជីវកម្មមួយនឹងមានសង្ឃឹមរស់ដោយភាពរឹងមាំ តែបើឈានជើងផ្ដើមទាំងឫសពុកផុយ វាអាចនាំឱ្យឡុងចុងទៅមុខលែងរួចក៏ថាបាន។

ពាក់ព័ន្ធនឹងបញ្ហានេះដែរ ក្នុងបទសម្ភាសន៍ជាមួយក្រុមការងារ Business Cambodia ស្ថាបនិកនៃ ហាងលំហែមាត់បឹង លោក ប៉ាវ ឈុនគីម បានបង្ហើបប្រាប់នូវ គន្លឹះពិសេស៤ ដែលយុវជនសម័យថ្មី ត្រូវតែគិតនិងត្រៀមឱ្យបានរួចរាល់ មុនចាប់ផ្ដើមបើកទ្វារដំណើរការអាជីវកម្មរបស់ខ្លួន។ គន្លឹះពិសេសទាំង៤នោះរួមមាន៖

១. គិតមុនឱ្យបាន១ឆ្នាំ

ជំហានដំបូង លោក ឈុនគីម ប្រាប់ថាត្រូវផ្ដើមចេញពីការចំណាយពេលគិតគូរមុនឱ្យបានយ៉ាងតិច កន្លះឆ្នាំទៅមួយឆ្នាំ។ លោកអ្នកត្រូវគិតឱ្យបានស៊ីជម្រៅថា តើចង់រកស៊ីលើអ្វី គួរចាប់ដៃគូជាមួយអ្នកណាខ្លះ ហើយគួរបែងចែកការងារគ្នាដូចម្ដេច តើនរណាជាអតិថិជនគោលដៅរបស់អាជីវកម្មរបស់អ្នក?

លោកបន្តថា រឿងនីមួយៗដែលត្រូវគិត គឺត្រូវធ្វើឡើងដោយលម្អិត គិតឱ្យបានហ្មត់ចត់ ទាំងអំពីប្រភពចំណូលដែលអាចបង្កើតពីអាជីវកម្មមួយនោះ និងរបៀបនៃការចាត់ចែងប្រាក់ចំណេញឱ្យដល់ដៃគូសហការទាំងអស់គ្នា។

២. សិក្សាទីតាំង

ជំហានបន្ទាប់ សហគ្រិនវ័យក្មេងរូបនេះថា ត្រូវគិតទៅលើការរើសទីតាំងណាមួយដែលល្អបំផុតតាមដែលអាចរកបាន។ ទីតាំងត្រូវតែមានចម្ងាយនៅជិតល្មម ពីកន្លែងស្នាក់នៅរបស់អតិថិជនគោលដៅដែលបានកំណត់ មានភូមសាស្រ្តល្អបូករួមជាមួយទេសភាពជុំវិញ ដែលសមស្របតាមប្រភេទអាជីវកម្មរបស់អ្នក។

តួយ៉ាងដូចជា លំហែមាត់បឹង របស់លោកផ្ទាល់ គឺមានភាពស្រស់ស្អាតទាក់ទាញខ្លាំងមែនទែន អ្វីដែលសំខាន់គឺស្ថិតនៅជិតក្រុង អ្នករស់នៅភ្នំពេញទាំងអស់​សុទ្ធតែអាចធ្វើដំណើរទៅលេងបាន។ មានទេសភាពស្រស់ត្រកាល ល្អសម្រាប់អ្នកចង់ចំណាយពេលសម្រាកលំហែលចិត្តពីការងារប្រចាំថ្ងៃ ពួកគាត់អាចទៅអង្គុយញ៉ាំអាហារឆ្ងាញ់ៗ ស្ទូចត្រីហ្វ្រីៗបានយ៉ាងសប្បាយរីករាយ។

បន្ថែមពីនេះ លោក ឈុនគីម ក៏បានប្រាប់ទៀតថា កុំភ្លេចសម្លឹងមើលនៅជុំវិញខ្លួនផង ថាតើមានអ្នករកស៊ីលើរបរដូចអ្នកដែរឬទេ? បើមានតើយើងត្រូវរកវិធីសាស្រ្តណា ដើម្បីទាញអតិថិជនឱ្យជ្រើសរើសយកយើង? អាចជាការពង្រឹងគុណភាពសេវាកម្ម ឬបង្កើតចំណុចពិសេសផ្សេងៗដែលជារបស់ខ្លួនឯងផ្ទាល់ជាដើម។

៣. សូនគំនិតចាស់ ឆ្លាក់គំនិតថ្មី

ចំណុចសំខាន់មួយដែលអាជីវកម្មគ្រប់ប្រភេទ ត្រូវតែមានគឺ ការចេះកែច្នៃគំនិតចាស់ៗឱ្យក្លាយជាគំនិតប្លែកថ្មីដ៏ទាក់ទាញតាមតម្រូវការថ្មីៗរបស់អតិថិជន នៅក្នុង ស.វ ទី២១។ ជាក់ស្ដែងដូចជាហាងលំហែមាត់បឹង​ផ្ទាល់ ម្ចាស់ហាងបានកែច្នៃពីខ្ចុះលក់អាហារធម្មតា ទៅជាទីតាំងដែលស្រស់ស្អាតប្លែក។

ម្ចាស់ហាងគាត់បានបង្កើតភាពទាក់ទាញដាច់ពីគេតាមរយៈ ការបង្កើតខ្ចុះបែរមុខទៅរកទេសភាពថ្លៃលិចដ៏សល់ត្រកាល, ធ្វើខ្ចុះដែលគ្មានបង្កាន់ដៃជួយឱ្យអ្នកទៅលេងបានឃើញទេសភាពច្បាស់ៗពេលអង្គុយទទួលទានអាហារ, អនុញ្ញាតឱ្យអតិថិជនទាំងអស់ស្ទូចត្រីហ្វ្រី (កន្លែងមួយចំនួនគេគិតលុយ), មិនគិតថ្លៃខ្ចុះនិងមិនកំណត់ពេលវេលាអង្គុយជាដើម។

៤. ចំនួនប្រជាជន

ចំណុចចុងក្រោយនិងជាចំណងដ៏សំខាន់បំផុតនៅក្នុងការរឹតអាជីវកម្មឱ្យណែន ដែលស្ថាបនិកវ័យក្មេងរូបនេះបានណែនាំគឺ ការសម្លឹងមើលសក្កានុពលនៃប្រជានដែលរស់នៅជុំវិញទីតាំងអាជីវកម្មរបស់យើង។ សម្លឹងមើលថា តើនៅជុំវិញនោះមានអតិថិជនគោលដៅច្រើនទេ? តើប្រជាជនក្បែរៗនេះមានលទ្ធភាពប្រើប្រាស់សេវាកម្មនៃអាជីវកម្មរបស់យើងកម្រិតណាដែរ?

គួរជម្រាបផងដែរថា ហាងលំហែមាត់បឹង ជាទីតាំងសម្រាកលំហែក្បែរក្រុងដ៏សក្តិសមបំផុត សម្រាប់អ្នករស់នៅក្នុងក្រុងមមាញឹកជាមួយការងារច្រើន។ លោកអ្នកអាចសម្រាកអង្គុយមើលទឹកលើខ្ចុះឥតគិតថ្លៃ ស្ដាប់ភ្លេង ញ៉ាំអាហារឆ្ងាញ់ៗជាង២០០មុខអមជាមួយខ្យល់ពេលល្ងាចដ៏ត្រជាក់ ព្រមទាំងស្ទូចត្រីលេងកម្សាន្តដោយឥតគិតថ្លៃថែមទៀតផង។ សម្រាប់ទីតាំងលោកអ្នកអាចស្វែងរកបានតាមរយៈការទាក់ទងទៅកាន់ទូរស័ព្ទលេខ ០៦៩ ៩៨៤​ ៨៨៦ ឬតាម Google Map: លំហែមាត់បឹង-Leisure Lake (https://maps.app.goo.gl/T7E1jFmKgn6vJwUo7?g_st=ic) ។

អត្ថបទដោយ៖ សូ​ សុខលី (កូនស្មេរចល័តចរ)
លោកអ្នកអាចទំនាក់ទំនងផ្សព្វផ្សាយអាជីវកម្មរបស់អ្នកតាមរយៈទូរស័ព្ទលេខ៖ ០១៥២០២៥៤២