នាយកប្រតិបត្តិក្រុមហ៊ុនអាកាសចរណ៍ Jeju Air លោក Kim E-bae បានចេញមុខសុំទោសជាសាធារណៈ ដោយឱនក្បាលគោរពចំពោះគ្រួសារជនរងគ្រោះដែលបានជួបហេតុការធ្លាក់យន្តហោះ ដែលហោះពីទីក្រុង Bangkok ប្រទេសថៃទៅកូរ៉េខាងត្បូង នៅក្នុងសន្និសីទកាសែតកាលល្ងាចថ្ងៃ២៩ ខែធ្នូ ឆ្នាំ២០២៤ B ពីភាគខាងលិចនៃទីក្រុងសេអ៊ូល។
ក្នុងនោះលោក Kim E-bae បានបញ្ជាក់នៅក្នុងសន្និសីទថា៖ «មិនថាមានមូលហេតុអ្វីទេ ខ្ញុំទទួលខុសត្រូវទាំងស្រុងក្នុងនាមជា CEO»។
បន្ថែមពីនោះលោក Kim ក៏បានចូលរួមរំលែកទុក្ខដល់ជនរងគ្រោះនិងក្រុមគ្រួសាររបស់ពួកគេថា៖ «យើងសូមចូលរួមរំលែកទុក្ខ និងសុំទោសយ៉ាងជ្រាលជ្រៅបំផុតចំពោះអ្នកដំណើរ និងក្រុមគ្រួសារនៃសពដែលបានបាត់បង់ជីវិតក្នុងឧបទ្ទវហេតុ ក្រុមហ៊ុន Jeju Air នឹងខិតខំប្រឹងប្រែងឱ្យអស់ពីសមត្ថភាព ដើម្បីដោះស្រាយឧបទ្ទវហេតុនេះឲ្យបានឆាប់រហ័ស និងផ្តល់ការឧបត្ថម្ភទាំងអស់ដល់គ្រួសារអ្នកដំណើរ»។
មកទល់នឹងពេលនេះប្រតិបត្តិការជួយសង្គ្រោះនៅតែបន្ត និងមានការស៊ើបអង្កេតពីរដ្ឋាភិបាលកូរ៉េខាងត្បូង ដោយមានការគាំទ្រពីក្រុមហ៊ុនអាកាសចរណ៍ Jeju Air បានបញ្ជូនបុគ្គលិកប្រហែល ២៦០ នាក់ទៅកាន់អាកាសយានដ្ឋាន Muan ដើម្បីជួយគាំទ្រឧបត្ថម្ភដល់ក្រុមគ្រួសារជនរងគ្រោះ និងលើជួយការស៊ើបអង្កេតអំពីមូលហេតុបន្ថែមទៀត។
យ៉ាងណាមិញប្រធានាធិបតីស្តីទីកូរ៉េខាងត្បូង លោក Choi Sang-mok ក៏បានបញ្ជាឱ្យក្រសួងដឹកជញ្ជូន អនុវត្តឱ្យដិតដល់លើការត្រួតពិនិត្យសុវត្ថិភាពជាបន្ទាន់នៃប្រព័ន្ធប្រតិបត្តិការអាកាសចរណ៍របស់ក្រុមហ៊ុនទាំងអស់ក្នុងប្រទេស។ បន្ថែមពីនោះ លោក Choi ក៏បានប្រកាសថានឹងកាន់ទុក្ខក្នុងប្រទេសរយៈពេលប្រាំពីរថ្ងៃផងដែរ។
គួរបញ្ជាក់ផងដែរថាកាលពីព្រឹកថ្ងៃទី២៩ ខែធ្នូ ឆ្នាំ២០២៤ យន្តហោះមួយគ្រឿងរបស់ក្រុមហ៊ុនអាកាសចរណ៍ Jeju Air ជើងហោះហើរ 7C 2216 ដែលបានហោះពីប្រទេសថៃ ដឹកអ្នកដំណើរចំនួន១៧៥នាក់និងនាវិកចំនួន៦នាក់ បានធ្លាក់ឆេះនៅឯអាកាសយានដ្ឋាន Muan ស្ថិតនៅភាគនិរតីនៃប្រទេសកូរ៉េខាងត្បូង ៕
អត្ថបទដោយ៖ ពីង ជូអេង
