កាលពីព្រឹកថ្ងៃទី០៥ ខែមេសា ឆ្នាំ២០២៥ ក្រុមហ៊ុន អាយជី ត្រេឌីង គ្រុប (IG Trading Group Co., Ltd.) បានរៀបចំកម្មវិធីមនុស្សធម៌ទៅកាន់មណ្ឌលមែកឈើដែលមានទីតាំងស្ថិតនៅសង្កាត់កំបូល ខណ្ឌកំបូល រាជធានីភ្នំពេញ ក្រោមប្រធានបទ “រួមគ្នាផ្តល់ភាពកក់ក្តៅ និងក្តីសង្ឃឹមដល់កុមារ" ។
ក្នុងការជជែកជាមួយថ្នាក់ដឹកនាំរបស់ក្រុមហ៊ុនអាយជី ត្រេឌីង គ្រុប លោក ផន ផល្លា ប្រធានមណ្ឌលមែកឈើ បានបញ្ជាក់ថា ក្មេងកំព្រាគ្មានទីពឹងចំនួន ១៨២ នាក់ ដោយសារតែ ឪពុកម្ដាយស្លាប់ចោល ឬបោះបង់ចោល ត្រូវបានមើលថែយ៉ាងយកចិត្តទុកដាក់ ដោយមណ្ឌលមែកឈើ ព្រមជាមួយការផ្គត់ផ្គង់ហូបចុក ស្នាក់នៅ និងទទួលបានការសិក្សារយៈពេលវែង ដូចកុមារដទៃទៀតដែរ។
ការអះអាងនេះធ្វើឡើង បន្ទាប់ពីមានការចូលរួមពីលោក គឹម ពុធគីរី ប្រធានក្រុមប្រឹក្សាភិបាល នៃក្រុមហ៊ុន អាយជី ត្រេឌីង គ្រុប ដែលបានដឹកនាំបុគ្គលិកគ្រប់ជាន់ថ្នាក់ ធ្វើការងារសប្បុរសធម៌ នាំយកអំណោយជា គ្រឿងឧបភោគបរិភោគ និងសម្ភារសិក្សា ទឹកដោះគោម្សៅ (Gain for Growth) សាប៊ូកូនក្មេងសរីរាង្គម៉ាក Klen ទាំងដុសខ្លួន កក់សក់ និងលាងដប របស់របស់ប្រើប្រាស់សម្រាប់អូនៗ ព្រមទាំងថវិការមួយចំនួនផងដែរ ជូនដល់ក្មេងកំព្រាគ្មានទីពឹងទាំង ១៨២ នាក់ នៅមណ្ឌលមែកឈើ នាព្រឹកថ្ងៃទី ០៥ ខែមេសា ឆ្នាំ២០២៥ នៅសង្កាត់កំបូល ខណ្ឌកំបូល រាជធានីភ្នំពេញ ។
ក្រៅពីវត្តមានរបស់ថ្នាក់ដឹកនាំ និងបុគ្គលិកនៃក្រុមហ៊ុន អាយជី ត្រេឌីង លោក លោក សំ កុសល នាយកប្រតិបត្តិក្រុមហ៊ុន Business Cambodia និងក្រុមសម្តែងរឿងភាគបែបអប់រំ លោក Zero ក៏បានចូលរួមជាភ្ញៀវកិត្តិយស ដើម្បីញុំាងកម្មវិធីឱ្យកាន់តែឱឡារិក ក៏ដូចជាជួយផ្សព្វផ្សាយបន្តដល់បងប្អូនសាធារណជន ដែលមានបំណងចង់ធ្វើសកម្មភាពសប្បុរសធម៌ជួយដល់កុមារកំព្រាដែលកំពុងជួបការខ្វះខាតផងដែរ។
ឆ្លៀតក្នុងឱកាសនោះដែរ ទាំងលោក ផន ផល្លា និងតំណាងក្រុមហ៊ុន អាយជី ត្រេឌីង គ្រុប សុទ្ធតែបានអំពាវដល់សប្បុរសជនជិតឆ្ងាយ សូមចូលរួមគាំទ្រជាថវិកាក្ដី សម្ភារសិក្សាក្ដី គ្រឿងឧបភោគបរិភោគក្ដី ដើម្បីបន្តការផ្គត់ផ្គង់ដល់ក្មេងៗកុមារកំព្រានៅ មណ្ឌលមែកឈើ សំដៅជួយកសាងអនាគតពួកគេ ឱ្យក្លាយជាពលរដ្ឋល្អ មានការសិក្សាអប់រំ និងមានសមត្ថភាពចូលរួមកសាង ប្រទេសជាតិទៅជំនាន់ក្រោយៗ៕
