សារព័ត៌មាន Nikkei បានរាយការណ៍ថា ក្រុមហ៊ុនផលិតរថយន្តរបស់ជប៉ុន Honda និង Nissan គ្រោងចរចារ ចាប់ច្របាច់បញ្ចូលក្រុមហ៊ុនរួមគ្នាមួយ ដើម្បីទប់ទល់នឹងកំណើនឧស្សាកម្មរថយន្តអគិ្គសនី និងការប្រកួតប្រជែងជាសកលរបស់ក្រុមហ៊ុនយក្សចិន BYD និង Tesla អាមេរិក។
យ៉ាងណាមិញនៅថ្ងៃទី១៨ ខែធ្នូ ឆ្នាំ២០២៤ ក្រុមហ៊ុនទាំងពីរបានចេញមុខបដិសេធថា ចំពោះគម្រោងច្របាច់ក្រុមហ៊ុនបញ្ចូល នៅមិនទាន់សម្រេចផ្លូវការនៅឡើយទេ។
ប៉ុន្តែបើតាមរបាយការណ៍ពីកាសែត Nikkei បានបញ្ជាក់ថាក្រុមហ៊ុនទាំង២អាចនឹងធ្វើកិច្ចចរចារព្រមព្រៀងគ្នា នៅអំឡុងសប្តាហ៍ក្រោយនេះ ក្នុងនាមជាដៃគូសហការគូជិតស្និទ្ធ ដើម្បីទប់ទល់នឹងបញ្ហាប្រឈមពីរថយន្តអគ្គិសនីដែលជាវិបត្តិរួម។
ឥទ្ធិពលរបស់រថយន្តអគ្គិសនីបាន ក្លាយជាការប្រឈមរបស់ឧស្សាហកម្ម រថយន្តដើរដោយថាមពលឥន្ធនៈ ហើយក្រុមហ៊ុនផលិតរថយន្តជប៉ុនបានដើរក្រោយគូប្រជែងធំៗដែលផលិតរថយន្ត EV ស្របពេល ដែលក្រុមហ៊ុនកំពូលៗរបស់ជប៉ុនទាំងនេះ បានដើរតួជាបងធំក្នុងឧស្សាកម្មរថយន្ត រាប់សិបឆ្នាំមកហើយ។
ក្នុងនោះកាលពីខែវិច្ឆិកាកន្លងទៅថ្មីៗនេះ ក្រុមហ៊ុន Nissan ក៏បានកាត់បន្ថយសង្វាក់ផលិតកម្មសកលរបស់ខ្លួនចំនួន៦% និងទិន្នផលសម្រេច២០% ក៏ដូចជាការងាររបស់មនុស្ស ចំនួន៩០០០កន្លែង នៅទូទាំងពិភពលោកផងដែរ បន្ទាប់ពីប្រាក់ចំណេញធ្លាក់ចុះ។
ទន្ទឹមគ្នានេះបើយោងតាមក្រុមហ៊ុនស្រាវជ្រាវ EV Rho Motion បានឱ្យដឹងថា រថយន្ត EV ១៥.២ លានគ្រឿងត្រូវបានលក់ទូទាំងពិភពលោក ពីចន្លោះខែមករាដល់ខែវិច្ឆិកា ក្នុង២០២៤ ដែលជាការកើនឡើង២៥ភាគរយលើសពីឆ្នាំមុន។ ដោយក្នុងរយៈពេលដូចគ្នានោះដែរ ប្រទេសចិនបានលក់ចេញរថយន្ត EV ដល់ទៅ ៩.៧ លានគ្រឿង៕
អត្ថបទដោយ៖ ពីង ជូអេង
