អ្នកណាៗក៏ស្រលាញ់ក្រដាសប្រាក់១០០ដុល្លារព្រោះជាក្រដាសប្រាក់ធំបំផុតរបស់អាមេរិក ហើយកាលណាពួកគាត់មានក្រដាសប្រាក់នេះពួកគាត់នឹងសប្បាយចិត្ត។ យ៉ាងណាមិញបច្ចុប្បន្នមនុស្សជាជួបញ្ហាដោយសារតែមិនមានក្រដាស១០០ដុល្លារ។ ខាងក្រោមនេះគឺជាសម្ដីមាសរបស់លោកតាក្នុងក្រដាស១០០ដុល្លារ Benjamin Franklin ដែលអ្នកគួរធ្វើតាមបើមិនចង់ជួបបញ្ហាលុយកាក់។

១. សន្សំស្មើនឹងចំណូល  

 រាល់ថ្ងៃមនុស្សជាច្រើន ជួបបញ្ហាលុយកាក់ដូចជាខ្វះខាតលុយនិងបំណុលគេដោយសាររកលុយបានមិនយកចិត្តទុកដាក់លើការសន្សំលុយ។ ដូចសម្ដីរបស់លោកតាក្រដាស១០០ដុល្លារបានលើកឡើងថា”ការសន្សំគឺស្មើនឹងចំណូល”។  ដូច្នេះរកលុយបានត្រូវចេះដកលុយមួយផ្នែកមកសន្សំទុកប្រចាំដើម្បីទុកជាទុនសម្រាប់សម្រេចគោលហិរញ្ញវត្ថុផ្សេងៗក្នុងជីវិត ជាពិសេសកាលអ្នកចេះសន្សំ លុយអ្នកកាន់តែកើនស្មើនឹងអ្នករកចំណូលបានកាន់តែច្រើន។

២. ការវិនិយោគលើចំណេះដឹងគឺជាការវិនិយោគល្អបំផុត

 លោកតា១០០ដុល្លារបានលើកឡើងថាការវិនិយោគលើខ្លួនឯងដែលសំដៅដល់ការវិនិយោគលើចំណេះដឹង ជំនាញ គឺប្រើធៀបដូចជាអ្នកសន្សំលុយសម្រាប់អនាគតអ៊ីចឹង។ ជាការពិតណាស់ បិតាស្ថាបនិកសហរដ្ឋអាមេរិករូបនេះគឺជាមនុស្សម្នាក់ដែលផ្ដោតលើការវិនិយោគលើចំណេះដើម្បីបង្កើនសមត្ថភាពខ្លួនឯង។ ជាក់ស្ដែងលោកធ្លាប់អង្គុយរៀនភាសាបារំាង អេស្ប៉ាញ អ៊ីតា ឡាតាំងដោយប្រើភ្លើងទៀតបង្កើនសមត្ថភាពនិងចំណេះដឹងរបស់ខ្លួន។ បណ្ដាំរបស់លោកតាគឺធ្វើការឲ្យខ្លាំង រៀនឲ្យច្រើនជីវិតអ្នកនឹងជោគជ័យ។

៣. កើតមកក្រមិនបញ្ហា ឲ្យអ្នកតែខំអ្នកនឹងជោគជ័យ

 ដូចសម្ដីគាត់ដែលបានរៀបរាប់ខាងលើរួចមកហើយថាគាត់គឺជាមនុស្សដែលផ្ដោតលើការរៀនសូត្រ។ គាត់កើតក្នុងគ្រួសារធម្មតា ប៉ុន្ដែអាចជោគជ័យក្លាយជាមនុស្សដែលប្រជាជនអាមេរិកតែងតែចងចាំគឺដោយសារលោកជាមនុស្សពូកែធ្វើការ ឆ្លាតនិងពូកែរៀនសូត្រជាប់ជានិច្ច។ ដូច្នេះបើកើតមកក្រត្រូវប្រឹងធ្វើការ វិនិយោគលើចំណេះពោលគឺកើតមកក្រចុះ តែសូមកុំបណ្ដាយខ្លួនឲ្យក្រចំណេះ ព្រោះបើអ្នកក្រចំណេះ អ្នកនឹងក្រជារៀងរហូត។

៤. រស់តាមលទ្ធភាពជាជាងចាយលើសមាឌ ធ្លាក់ក្នុងបំណុល

សម្ដីត្រង់នេះ លោកតា Franklin ចង់ដាស់តឿនមនុស្សឲ្យចេះរស់នៅទៅតាមលទ្ធភាពដែលខ្លួនមាន ជាជាងការទៅខ្ចីលុយគេ គ្រាន់ដើម្បីភាពឡូយឆាយតែខ្លួនឯងបែរជាជាប់បំណុលគេទៅវិញ។ អ្វីដែលកាន់ពិបាកនោះ បើអ្នកដឹងថាខ្លួនឯងខ្វះខាត តែនៅតែខ្ចីគេចំណាយលើរបស់ដែលមិនបង្កើតចំណូលនោះអ្នកនឹងកាន់តែវេទនាហើយ។

៥. ចំណាយតិចជាងចំណូល

លោកតា Franklin ថា​បើអ្នកចំណាយតិចជាងចំណូលអ្នកដែលរកបានប្រចាំខែមានន័យថា អ្នកជាមនុស្សចេះទុកដាក់គ្រប់គ្រងលុយបានគ្រាន់បើ ព្រោះអ្នកនឹងមិនធ្លាក់ខ្លួនដើរខ្ចីលុយគេ ហើយថែមទាំងអាចសល់លុយបានជាដុំកំភួនផងដែរ។

ចង់ចេះប្រើលុយឲ្យមានប្រសិទ្ធភាព ប្រើលុយឲ្យចំណេញនិងវិនិយោគលុយដើម្បីបង្កើនទ្រព្យអាចតាមដាន Facebook page របស់ខ្ញុំ Toeuy Hong-ទឿយ ហុងឬចូលគ្រុបតេឡេក្រាម: https://t.me/toeuy_hong