កាលពីម៉ោង ១:៣០នាទីព្រឹក (USA) ម្សិលមិញ មានកប៉ាល់ដឹកទំនិញមួយគ្រឿងបានបើកបុកធ្នឹមស្ពាន Francis Scott Key នៅទីក្រុង Baltimore រដ្ឋ Maryland សហរដ្ឋអាមេរិក បណ្តាលឲ្យស្ពានមួយនោះបាក់ ហើយរថយន្តជាច្រើនគ្រឿង រួមជាមួយនឹងមនុស្ស បានធ្លាក់ចូលទៅក្នុងទន្លេ ខណៈមូលហេតុនៃការបុកមិនទាន់រកឃើញនៅឡើយ។ នេះបើយោងតាមការឲ្យដឹងពីទីភ្នាក់ងារសារព័ត៌មាន Reuters។
យ៉ាងណាមិញ កប៉ាល់ដែលបង្កឧប្បត្តិហេតុត្រូវបានគេស្គាល់ឈ្មោះថា Dali មានប្រវែង ៩៤៨ ហ្វីត (ប្រហែល ២៨៨.៩៥ម៉ែត្រ) ជាកម្មសិទ្ធិរបស់ក្រុមហ៊ុន Grace Ocean Private ផ្តល់សេវាកម្មដឹកជញ្ជូនតាមផ្លូវទឹក មានមូលដ្ឋាននៅប្រទេសសិង្ហបុរី។ ក្នុងដំណើរនេះ វាត្រូវបានគ្រប់គ្រងដោយក្រុមហ៊ុន Synergy Marine Group សម្រាប់ដឹកទូកុងតឺន័រជិត ៤,៧០០ របស់ក្រុមហ៊ុន Maersk ឆ្ពោះទៅកាន់ប្រទេសស្រីលង្កា។
គួរជម្រាបផងដែរថា ពាក់ព័ន្ធហេតុការណ៍ខាងលើ អាជ្ញាធរដឹកជញ្ជូនរដ្ឋ Maryland បានប្រកាសលើបណ្តាញសង្គម X ថា គ្រប់ចរាចរណ៍ដែលភ្ជាប់ទៅស្ពាននេះ ត្រូវបានបិទទាំងស្រុង ខណៈ Francis Scott Key មានប្រវែង ២៥០០ម៉ែត្រ និងមានអាយុកាល៤៧ឆ្នាំ ជាស្ពានតភ្ជាប់ដ៏សំខាន់ទៅផ្លូវហាយវ៉េដែលព័ទ្ធជុំវិញទីក្រុង Baltimore និងជាកំពង់ផែដ៏ធំបំផុតមួយផងដែរនៅក្នុងសហរដ្ឋអាមេរិក៕
