ការទិញដីគឺជាមានសារៈសំខាន់ខ្លាំងណាស់សម្រាប់មនុស្សយើង វាមិនដូចជាម៉ូតូឡានដែលប្រើប្រាស់ហើយ អាចលក់ចេញ ឬដូរចោលភ្លាមៗនោះទេ ពោលគឺយើងអាចបន្សល់ដីនោះទុកជាមរតក សម្រាប់កូនចៅជំនាន់ក្រោយក្នុងការសង់ផ្ទះដើម្បីរស់នៅបន្ត ឬប្រកបរបរស៊ីរាប់រយឆ្នាំបន្ថែមទៀតបានប្រសិនបើយើងរើសទីតាំងដែលបានល្អ។ មែនទែនទៅគេជឿថាដីល្អនឹងនាំមកនូវភាពរុងរឿងដល់ម្ចាស់ផ្ទះ និង សមាជិកគ្រួសារ។ ផ្អែកលើ ក្បួន ហុងស៊ុយ ស្ថានភាព និង ទិសរបស់ដី គឺជាលក្ខណៈវិនិច្ឆ័យចម្បងសម្រាប់ការជ្រើសរើសដី។ ម្យ៉ាងវិញទៀត ដីដែលមានថាមពល ហ៊ុងស៊ុយ ទាប ក៏នឹងអាចប៉ះពាល់ដល់ម្ចាស់ផងដែរ។ ដូច្នេះលោកអ្នកគួរមើលពីរបៀបដែលជាគោលការណ៍របស់ ហុងស៊ុយ ដែលបានផ្តល់ឱ្យសម្រាប់ការជ្រើសរើសមើលទិញដី។
យោងតាមការដកស្រង់ចេញពីគេហទំព័រ SCB របស់ប្រទេសថៃបានបង្ហាញពីគន្លឹះ មួយចំនួនដែលលោកអ្នកត្រូវដឹង ដើម្បីទិញដីត្រូវតាមក្បួនហុងស៊ុយ៖
១. ពិនិត្យប្រភពដើមនៃដី
ពិតណាស់ការឆែកមើលប្រវត្តិដីមុនពេលទិញគឺជារឿងដែលោកអ្នកមិនអាចរំលងបាន ហើយការឆែកមើលនេះគឺដើម្បីមើលពីរបៀបដែលវាត្រូវបានប្រើប្រាស់ពីមុនមក។ គេចាត់ទុកដីដែលល្អ គឺជាដីដែលមិនត្រូវបានប្រើប្រាស់ទាក់ទងនឹងបញ្ហា ឬការស្លាប់ពីមុនមក ដូចជា មន្ទីរពេទ្យ ឃាតកម្ម ភ្លើងឆេះផ្ទះជាដើម។ ក្រៅពីនេះ មិនត្រូវមានមនុស្សស្លាប់នៅក្នុងដីនោះឡើយ។ បើមានគួររៀបចំពិធីសាសនាដើម្បីថ្វាយបង្គំខាងវិញ្ញាណ។ ជាងនេះទៅទៀត អតីតម្ចាស់ដីត្រូវតែមានបំណងប្រគល់ដីនោះទៅឱ្យម្ចាស់ថ្មី ដោយសុច្ចចិត្ត ព្រោះដីខ្លះ ម្ចាស់ថ្មីអាចនឹងរងនូវបណ្តាសាពីបុព្វបុរស ដែលជាម្ចាស់ដីដើមមិនមែនជាសមាជិកគ្រួសាររបស់គេ។ ដោយផ្អែកលើ ហុងស៊ុយ ដីដែលត្រូវបានប្រើប្រាស់ជាប្រចាំ នឹងមានថាមពលខ្លាំង ហើយថាមពលនោះនៅតែដំណើរការនៅពេលដែលដីត្រូវបានផ្លាស់ប្តូរទៅម្ចាស់ថ្មីមួយទៀត។ ដូច្នេះសូមណែនាំឱ្យតាមដានប្រភពដើមនៃដីនោះមុននឹងធ្វើការសម្រេចចិត្តទិញថាតើអតីតម្ចាស់មានសុខុមាលភាព ឬមានបញ្ហាអ្វីខ្លះ។ ឧទាហរណ៍៖ ដីធ្លាប់ធ្វើជារោងចក្រ ហើយបន្ទាប់មកម្ចាស់បានលក់វាទៅទិញដីថ្មីសម្រាប់ពង្រីកអាជីវកម្ម ដែលមានន័យថាដីនេះពោរពេញដោយថាមពលវិជ្ជមាន។
២. ស្ថានភាពដី
ដីដែលមានរាងការ៉េ គឺល្អបំផុត ព្រោះកន្លែងអាចប្រើប្រាស់បានពេញលេញ និងងាយស្រួលរៀបចំរចនាសម្ព័ន្ធផ្សេងៗ។ វាល្អសម្រាប់ដំណើរការអាជីវកម្មគ្រប់ប្រភេទ ឬសាងសង់លំនៅដ្ឋាន ដោយសារការសាងសង់មានកម្រិតតិចតួច ហើយបើលក់បន្តក៏មានតំលៃខ្ពស់ផងដែរ។ ដីប្រភេទទីពីរ គឺមានរាងចតុកោណកែង ជាពិសេសកន្លែងដែលទទឹងរបស់វាតភ្ជាប់ទៅផ្លូវធំ ដែលសាកសមសម្រាប់អាជីវកម្ម ពាណិជ្ជកម្ម ដោយសារមានច្រកចូល និង ច្រកចេញជាច្រើន។ លើសពីនេះ ដីចតុកោណកែងដែលមានផ្នែកខាងមុខតូចចង្អៀត និងជម្រៅវែងសក្តិសមនឹងការធ្វើរោងចក្រផលិត ឬ ផ្ទះដ៏ល្អ ដោយសារវាមានភាពឯកជន។ យោងទៅតាមក្បួន ហុងស៊ុយ បើអាចធ្វើទៅបាន សូមកុំជ្រើសរើសដីដែលមានរាងត្រីកោណ ព្រោះវាបង្កប់ន័យអសន្តិសុខដែលនឹងនាំមកនូវជំងឺ ឬអាជីវកម្មបរាជ័យដល់ម្ចាស់ដី។ នៅពេលពិចារណាលើការប្រើប្រាស់ ដីរាងត្រីកោណមិនផ្តល់មុខងារប្រើប្រាស់ច្រើនទេ ហើយវាពិបាកក្នុងការលក់វិញ បើប្រៀបធៀបនឹងទម្រង់ផ្សេងទៀតនៃដី។
៣.បរិស្ថានជុំវិញដី
ដីល្អត្រូវតែមានភាពអ៊ូអរ ហើយហ៊ុំព័ទ្ធដោយផ្លូវថ្នល់ ទន្លេ សំបូរទៅដោយមនុស្សឆ្លងកាត់ ហើយជាកន្លែងដែលងាយស្រួសក្នុងការធ្វើដំណើរ។ ដោយសារដីប្រៀបបាននឹងវដ្តជីវិត ទីតាំងល្អសម្រាប់ប្រកបអាជីវកម្ម និងរកប្រាក់បាន ព្រោះស្ថិតនៅតំបន់សហគមន៍ដែលមានភាពអ៊ូអរ។ វាក៏មានអត្ថប្រយោជន៍ផងដែរ ដែលងាយស្រួលចូលទៅរហ័សដល់ទីតាំង។ ដីនឹងកាន់តែល្អប្រសិនបើវានៅជាប់ផ្លូវធំ និងតំបន់អំណោយផល។ ជាងនេះទៅទៀត ដីដែលមានច្រកចេញចូលច្រើនពេក ត្រូវបានគេចាត់ទុកថាមិនល្អ ។ ខាងក្រោយដី មិនគួរជាប់ជាមួយផ្លូវ ទន្លេ ឬប្រឡាយឡើយ។ ប្រសិនបើមានផ្លូវ ឬប្រឡាយ នោះក៏មិនគួរនៅជិតរបងផ្ទះពេកទេ។ វាចាំបាច់ណាស់ក្នុងការត្រួតពិនិត្យដីជុំវិញថាតើមានផ្ទះដែលគេបោះបង់ចោល លូបង្ហូរទឹកស្អុយ ព្រៃរបោះ ទីបញ្ចុះសព ឬទីបូជា ទីតាំងដែលមានដែនទំនាញជាដើម។ មូលហេតុដែលមិនចង់អោយមានរបស់ទាំងនោះ ព្រោះវានឹងបំផ្លាញទេសភាព ហើយវានឹងពិបាកក្នុងការលក់ដីនោះផងដែរ។ តាមហុងស៊ុយ ជឿថាទ្រព្យសម្បត្តិដែលគ្របដណ្តប់ដីអាចផ្តល់ថាមពលអវិជ្ជមានដល់ដីក្បែរៗនោះ។
៤. ទិសនៃដី
ជៀសវាងការជ្រើសរើសដីបែរមុខទៅទិសខាងលិច ព្រោះវាស្ថិតក្នុងតំបន់ក្តៅដែលមានពន្លឺថ្ងៃចាំងពេញមួយពេលរសៀល។ វានឹងធ្វើឱ្យអ្នករស់នៅ ឬអ្នកលក់ដូររស់នៅមិនសប្បាយចិត្តនៅទីនោះ។ ដំណោះស្រាយ គឺដាំដើមឈើជាម្លប់ពេលមានពន្លឺថ្ងៃ ឬជីកស្រះនៅមុខផ្ទះ ឬលំនៅឋាន ដើម្បីកាត់បន្ថយកម្ដៅ។
៥.ពិនិត្យមើលថាតើដីនេះមិនធ្លាប់ជាផ្លូវសាធារណៈទេ
ដីល្អមិនត្រូវប្រើប្រាស់ជាផ្លូវសាធារណៈសម្រាប់ប្រជាពលរដ្ឋក្នុងតំបន់ឡើយ។ តាមក្បួនហុងស៊ុយ គេជឿថាប្រសិនបើមនុស្សអាចដើរឆ្លងកាត់បាន វិញ្ញាណក៏អាចធ្វើដូច្នោះបានផងដែរ។
៦. ដីមិនត្រូវនៅជាប់ជាមួយផ្លូវដែលមានរាងត្រីកោណទេ
នៅក្នុងក្បួនហុងស៊ុងគេ ចាត់ទុកផ្លូវរាងត្រីកោណជាផ្លូវខ្មោចដែលមិនស័ក្តិសមសម្រាប់ការធ្វើអាជីវកម្ម ឬការស្នាក់នៅ។ តាមពិត ផ្លូវត្រីកោណអាចបង្កគ្រោះថ្នាក់ចរាចរណ៍ ហើយពិបាករកកន្លែងចតឡានថែមទៀតផង។ ការស្វែងរកដីទំនេរតាមការដែលចង់បានគឺពិតជាមិនងាយស្រួលទេ លើសពីនេះការរកអោយបានត្រឹមត្រូវតាមក្បួន ហុងស៊ុយ។ ដូច្នេះកុំគិតច្រើន ប្រសិនបើអ្នករកបានដីល្អ ប៉ុន្តែធាតុមួយចំនួនអាចមិនត្រូវ នឹងក្បូន ហុងស៊ុយព្រោះថា ជាទូទៅក្បួន ហ៊ុងស៊ុយ គឺជាគោលការណ៍ណែនាំសម្រាប់ជ្រើសរើសទិស និងស្ថានភាព ដី៕
អត្ថបទដោយ៖ ឌឿក ស្រី នុត
