ពេលនិយាយដល់ការសម្ភាសន៍ការងារ មនុស្សភាគច្រើនប្រាកដជាមានអារម្មណ៍ថាតានតឹង ជាមួយសំណួរដែលអ្នកសម្ភាសន៍បម្រុងនឹងចោទសួរ និងអារម្មណ៍ព្រួយបារម្ភដែលត្រូវឆ្លើយយ៉ាងណាឱ្យត្រូវនឹងគោលដៅរបស់សំណួរ។ កត្តានេះហើយ ដែលធ្វើឱ្យបេក្ខជន ឬបេក្ខនារីមួយចំនួន សម្រេចចិត្តនិយាយកុហកក្រុមហ៊ុនលើចំណុចមួយចំនួន។
ជាមួយគ្នានោះបើសិនជាត្រូវបានជួបសម្ភាសន៍ជាមួយនឹងបុរសដែលមានជាងគេលើលោក មហាសេដ្ឋី Elon Musk ដែលមានតម្រូវការខ្ពស់គឺលោកសួរតែ១សំណួរប៉ុណ្ណោះនឹងអាចដឹងថាមនុស្សកហុកឬអត់។
នៅក្នុងកិច្ចប្រជុំកំពូលរបស់រដ្ឋាភិបាលមួយកាលពីឆ្នាំ២០១៧ លោកមហាសេដ្ឋី Elon Musk បាននិយាយថាលោកបានសួរបេក្ខជនមួយរូបជាមួយសំណួរ១នេះប៉ុណ្ណោះដែលធ្វើឱ្យលោកអាចដឹងថាមនុស្សនោះអាចនិយាយកុហកឬអត់។ “តើនៅពេលដែលជួបបញ្ហាតើអ្នកនឹងដោះស្រាយបញ្ហានោះយ៉ាងដូចម្តេច?”លោកបន្តថា “អ្នកដែលដោះស្រាយបញ្ហាពិតជាដឹងច្បាស់ពីរបៀបដែលពួកគេបានដោះស្រាយ ពួកគេនឹងដឹងព្រមទាំងអាចពណ៌នាបានលម្អិតបំផុត”។ ប្រសិនបើបុគ្គលម្នាក់គាត់និយាយកុហក គាត់នឹងមិនអាចនិយាយរៀបចំចំពោះរឿងរ៉ាវទាំងនោះបានលម្អិត និងរលូននោះទេ។
ម្យ៉ាងវិញទៀតអ្នកវិទ្យាសាស្ត្រក៏គាំទ្រទ្រឹស្តីរបស់នាយកប្រតិបត្តិក្រុមហ៊ុន Tesla រូបនេះដែរ។ ដោយយោងទៅតាមការសិក្សានាឆ្នាំ ២០២០ ដែលបានចេញផ្សាយនៅក្នុង Journal of Applied Research in Memory and Cognition បានពិនិត្យលើបច្ចេកទេសសម្ភាសន៍ការងារជាច្រើន ហើយបានរកឃើញថាទ្រឹស្តីដែលលោក Elon Musk លើកឡើងពិតជា មានប្រសិទ្ធភាពក្នុងការកំណត់ថាអ្នកណាជាអ្នកកុហកនិងអ្នកណាមិនមែន។
គួរបញ្ជាក់ផងដែរថាការជ្រើសបុគ្គលិកដោយប្រើតិចនិកនេះ អាចបង្កើនឱកាសរបស់អ្នកសម្ភាសន៍ក្នុងការរកឃើញអ្នកនិយាយកុហកអត្រា ៧០% នេះបើយោងតាមការចុះផ្សាយរបស់សារព័ត៍មាន Best life កាលពីថ្ងៃទី៣១ ខែកក្កដា ឆ្នាំ២០២២ កន្លងទៅនេះ៕
អត្ថបទដោយ៖ ពីង ជូអេង ( កូនត្រចៀកកាំ )
