ធ្លាប់ជាសេដ្ឋិនីមានទ្រព្យជាង៤ពាន់លាន$ Elizabeth ប្រឈមមុខជាប់គុ.ក២០ឆ្នាំ ក្រោយបង្កើតកំហុសធំ១នេះ
Kan DaraDECEMBER 2 2022363 views

អតីតសេដ្ឋិនី Elizabeth Holmes ដែលធ្លាប់ប្រាថ្នាចង់ក្លាយជា Steve Jobs ទីពីរ ពេលនេះកំពុងប្រឈមមុខនឹងការកាត់ទោសពីបទចោទប្រកាន់ បានបោកប្រាស់លុយវិនិយោគិនអស់រាប់សិបលានដុល្លារ។ នេះបើយោងតាមការចុះផ្សាយរបស់ទីភ្នាក់ងាសារព័ត៌មាន BBC នាថ្ងៃទី០៩ ខែវិច្ចិកា ឆ្នាំ២០២២។

ក្រុមហ៊ុនជីវបច្ចេកវិទ្យា Theranos ដែលមានលោកស្រី Elizabeth Holmes ជាស្ថាបនិកនិងជានាយកប្រតិបត្តិ បានសន្យានៅក្នុងកិច្ចព្រមព្រៀងជាមួយវិនិយោគិនថា នឹងធ្វើបដិវត្តន៍ឧស្សាហកម្មថែទាំសុខភាព លើការធ្វើតេស្តឈាមពីបុរាណទៅបែបទំនើប តាមរយៈការធ្វើតេស្តតាមគ្លីនិកដោយការចាក់ម្រាមដៃបង្ហូរឈាមតែពីរបីតំណក់ប៉ុណ្ណោះអាចរកឃើញជំងឺភ្លាមៗ  ហើយគម្រោងនេះក្រុមហ៊ុននឹងអាចបង្កើនប្រាក់ចំណូលរាល់ពាន់លានដុល្លារ។ ប៉ុន្តែការអះអាងរបស់ក្រុមហ៊ុនបានចាប់ផ្តើមមានបញ្ហាត្រូវដោះស្រាយនៅឆ្នាំ២០១៥ បន្ទាប់ពីការស៊ើបអង្កេតរបស់ Wall Street Journal មួយបានបង្ហាញថា បច្ចេកវិទ្យាថ្មីនេះមិនដំណើរការទេ។

ក្នុងនោះការចោទប្រកាន់ប្រឆាំងលោកស្រី Elizabeth Holmes និងលោក Ramesh Balwani ដែលជាដៃគូធ្វើការរួមគ្នាយ៉ាងជិតស្និតជាមួយលោកស្រី រដ្ឋអាជ្ញាអាមេរិកចោទថា ពួកគេទាំងពីរមានចេតនាបំភាន់វិនិយោគិន វេជ្ជបណ្ឌិត និងអ្នកជំងឺ ពីព្រោះពួកគេដឹងច្បាស់ថាបច្ចេកវិទ្យារបស់ខ្លួនមិនសមស្រប និងបានធ្វើការឃោសនាជាសាធារណៈបំផ្លើសពីការពិត។ ការចោទប្រកាន់នេះមិនត្រឹមតែផ្តោតលើការអះអាងអំពីម៉ាស៊ីន TSPU (ម៉ាស៊ីនតេស្តឈាមរោគវិនិច្ឆ័យជំងឺផ្សេងៗ)ប៉ុណ្ណោះទេ ប៉ុន្តែវាក៏ជាប់ពាក់ព័ន្ធលើបញ្ហាហិរញ្ញវត្ថុរបស់ក្រុមហ៊ុនផងដែរ។

ក្នុងដំណើរការនៃការកាត់ក្តី ចៅក្រមបានរកឃើញកំហុសរបស់លោកស្រី Elizabeth Holmes តាមរយៈបទចោទប្រកាន់៤ករណី ក្នុងនោះមានការសមគំនិតប្រព្រឹត្តក្លែងបន្លំលើអ្នកវិនិយោគ និងការលួចបន្លំ៣ផ្សេងទៀត។ ស្ត្រីអាយុ៣៨ឆ្នាំរូបនេះ អាចប្រឈមនឹងការជាប់ពន្ធនាគាររហូតដល់២០ឆ្នាំ។

គួររំលឹកផងដែរថា Elizabeth Holmes បានជាប់ឈ្មោះជាមនុស្សម្នាក់ក្នុងចំណោមមនុស្សមានឥទ្ធិពលបំផុត១០០នាក់ ក្នុងឆ្នាំ២០១៥ ចេញផ្សាយដោយទស្សនាវដ្តី Time។ នៅឆ្នាំដដែលទស្សនាវដ្តីពាណិជ្ជកម្ម Forbes បានដាក់ឈ្មោះលោកស្រីថា ជាស្ត្រីកសាងភាពមានបានដោយខ្លួនឯងក្មេងជាងគេនិងមានជាងគេបំផុតនៅសហរដ្ឋអាមេរិកត្រឹមវ័យ៣១ឆ្នាំ ដោយមានទ្រព្យសម្បត្តិចំនួន ៤.៥ ពាន់លានដុល្លារ៕

អត្ថបទដោយ៖ កាន់ ដារ៉ា (ស្មេរពនេចរ)

អត្ថបទពេញនិយមប្រចាំខែ
អត្ថបទថ្មីៗ
Footer Background
Business Cambodia
បំផុសគំនិតរកស៊ី នាំមនុស្សឱ្យហ៊ានចេញរកស៊ីតាមក្ដីស្រមៃ
© 2025 Baksey Media. All Rights Reserved.
Developed by: Technology Cambodia