វិបត្តិក្នុងឆ្នាំ ២០០៨ គឺជាការប៉ះទង្គិចដ៏ធំបំផុតចំពោះប្រព័ន្ធហិរញ្ញវត្ថុសកលក្នុងរយៈពេលជិតមួយសតវត្សរ៍ ខណៈវាបានជម្រុញប្រព័ន្ធធនាគារ និងសេដ្ឋកិច្ចពិភពលោកឲ្យឆ្ពោះទៅរកការដួលរលំ។ ខាងក្រោម គឺជាឫសគល់ធំៗ៣ ដែលនាំឲ្យកើតមានវិបត្តិនេះឡើង យោងតាមការវិភាគរបស់អ្នកជំនាញជាច្រើនរូប៖

១/. ការខ្ចីប្រាក់ទ្រង់ទ្រាយធំ៖ លោក Scott Newton ជាសាស្ត្រាចារ្យផ្នែកវិទ្យាសាស្ត្រប្រវត្តិសាស្រ្តអង់គ្លេស និងអន្តរជាតិ បាននិយាយថា ឬសគល់ដែលនាំឲ្យកើតមានវិបត្តិភ្លាមៗ គឺការរួមបញ្ចូលគ្នានៃសកម្មភាពដែលប៉ាន់ស្មាននៅក្នុងទីផ្សារហិរញ្ញវត្ថុដោយផ្តោតលើប្រតិបត្តិការទ្រព្យសម្បត្តិ និងលទ្ធភាពទទួលបានឥណទានថោក ដែលធ្វើឲ្យមនុស្សនាំគ្នាសម្រុកទៅខ្ចីលុយធនាគារភ្លូកទឹកភ្លូកដី ជាពិសេសនៅសហរដ្ឋអាមេរិក និងអឺរ៉ុបខាងលិច។

២/. វិនិយោគលើអចលនទ្រព្យតែមួយច្រក៖ ការខ្ចីប្រាក់ទ្រង់ទ្រាយធំនេះ គឺដើម្បីផ្តល់ហិរញ្ញប្បទានដែលជាការវិនិយោគតែមួយផ្លូវគត់លើការកើនឡើងតម្លៃអចលនទ្រព្យ។ ប៉ុន្តែការរីកដុះដាលនៅទីបំផុតមិនមាននិរន្តរភាពទេ ពីព្រោះចាប់ពីឆ្នាំ ២០០៥ គម្លាតរវាងប្រាក់ចំណូល និងបំណុលបានចាប់ផ្តើមរីករាលដាល។ នេះបណ្តាលមកពីការកើនឡើងតម្លៃថាមពលនៅលើទីផ្សារពិភពលោកដែលនាំឱ្យមានការកើនឡើងនូវអត្រាអតិផរណាសកល។

៣/. បាត់បង់លទ្ធភាពសងធនាគារ៖ ការវិវត្តន៍នេះបានធ្វើឲ្យអ្នកដែលបានខ្ចីលុយពីធនាគារ ពួកគេភាគច្រើនមានភាពលំបាកជាខ្លាំងក្នុងការព្យាយាមសងប្រាក់កម្ចីទាំងនោះ។ តម្លៃអចលនទ្រព្យចាប់ផ្តើមធ្លាក់ចុះយ៉ាងគំហុក ដែលនាំឲ្យតម្លៃទ្រព្យសម្បត្តិស្ថិតក្រោមការកាន់កាប់ដោយស្ថាប័នហិរញ្ញវត្ថុជាច្រើនបានដាំក្បាលចុះដូចគ្នា រហូតដល់វិស័យធនាគារនៅអាមេរិក និងចក្រភពអង់គ្លេសជិតដួលរលំ និងត្រូវតែជួយសង្គ្រោះជាបន្ទាន់ដោយការអន្តរាគមន៍របស់រដ្ឋ។

គួរជម្រាបផងដែរថា ការជាប់គាំងហិរញ្ញវត្ថុឆ្នាំ ២០០៨ គឺជាការប៉ះទង្គិចដ៏ធំបំផុតចំពោះប្រព័ន្ធហិរញ្ញវត្ថុសកលក្នុងរយៈពេលជិតមួយសតវត្សរ៍។ វាបានជម្រុញប្រព័ន្ធធនាគារពិភពលោកឆ្ពោះទៅរកការដួលរលំទ្រង់ទ្រាយធំ។ ក្នុងនោះត្រឹមរយៈពេល ២-៣ សប្តាហ៍ ក្នុងខែកញ្ញា ឆ្នាំ ២០០៨ ស្ថាប័នហិរញ្ញវត្ថុដ៏ធំបំផុត Lehman Brothers បានប្រកាសក្ស័យធន ខណៈលុយ  ១១៧ពាន់លានដុល្លារ ត្រូវបានបាត់ចេញពីតម្លៃក្រុមហ៊ុនធំៗរបស់អង់គ្លេសត្រឹមមួយថ្ងៃប៉ុណ្ណោះ៕

អត្ថបទដោយ៖ កាន់ ដារ៉ា (ស្មេរពនេចរ) សៀវភៅ «ច្រវាក់ប្រាក់ខែ» (កសាងក្ដីស្រមៃនៅកន្លែងការងារ ចេះបង្កើតចំណូលច្រើនប្រភព) តម្លៃពិសេសត្រឹម ១២$ ប៉ុណ្ណោះ។ បញ្ជាទិញតាម  https://t.me/BusinessCambodiaBook