យុវជនគឺជាទីពឹងរបស់សង្គម និងអនាគតរបស់ពិភពលោកដែលជឿនលឿនទៅមុខឥតឈប់ឈរ។ ការចេញមកប្រឡូកនៅក្នុងសង្គមការងារ និងជំនាញមួយឱ្យពិតប្រាកដអាច មិនមែនជារឿងងាយស្រួលនោះឡើយ ព្រោះថានិន្នាការសង្គមតែងតែប្រែប្រួលជានិច្ច។ យ៉ាងណាមិញក្នុងនោះដែរ អ្នកឧកញ៉ា វេជ្ជបណ្ឌិត គួច ម៉េងលី បានបង្ហាញផ្លូវដល់យុវជនសម្រាប់ជំនាញនិងការងារ ដែលយុវជនគួរធ្វើសម្រាប់រយៈពេល៥ ទៅ១០ឆ្នាំខាងមុខដើម្បីទាន់និន្នាការ។
ថ្លែងក្នុងកម្មវិធីពិពណ៌ការងារ របស់វិទ្យាស្ថានបច្ចេកទេសអង្គរ នាខេត្តសៀមរាបលោកឧកញ៉ា បានមានប្រសាសន៍ថា “ខ្ញុំសង្ឃឹមថាយុវជនខ្មែរយើងនឹងបន្តការខិតខំរៀនសូត្រ បន្តការខិតខំចាប់ជំនាញណាមួយឱ្យចំមួយៗ ដើម្បីចូលចិត្តនឹងរៀនចូលចិត្តនឹងធ្វើការ ដោយក្លាយជាអ្នកបច្ចេកទេសមួយក្នុងការងារណាមួយ ដែលអាចចូលរួមជួយជាតិ កសាងប្រទេសដែលកំពុងអភិវឌ្ឍន៍ ដែលនឹងឈានចូល ប្រទេសប្រាក់ចំណូលមធ្យម នៅឆ្នាំ២០៣០នេះ”។
អ្នកឧកញ៉ាបានបន្តជាមួយនឹងក្តីសង្ឃឹមយ៉ាងមុតមាំថា “ជាចម្បងខ្ញុំចង់ឱ្យយុវជនយល់ថា ជំនាញសំខាន់ៗណាខ្លះដែលប្រទេសជាតិកំពុងត្រូវការ ជាពិសេសមិនថាប្រទេសខ្មែរ ឬប្រទេសណាៗទេ យុគសម័យឌីជីថលសេដ្ឋកិច្ច គឺត្រូវការជំនាញឌីជីថលច្រើន ដូចជា ICT, DATA , Coding, Information Computer ដែលជាជំនាញប្រទេសៗណាក៏ត្រូវការដែរនាពេលខាងមុខ”។
គួរជម្រាបផងដែរថា អ្នកឧកញ៉ា វេជ្ជបណ្ឌិត គួច ម៉េងលី ស្ថាបនិកនិងជាអគ្គនាយកសាលារៀន AIS ធ្លាប់បានបញ្ជាក់ជាច្រើនផងដែរទាក់ទងនឹងយុវជនដែលមានវ័យ២០ ទើបប្រលងបាក់ឌុបចប់គប្បីជ្រើសរើសជំនាញណាមួយដែលខ្លួនពិតជាស្រលាញ់ ចំណេះដឹងភាសាដែលខ្លួនស្រឡាញ់ពិតប្រាកដ ហើយ សម្រាប់ប្អូនៗដែលចប់ថ្នាក់បរិញ្ញាបត្រចេញធ្វើការហើយគួររើសកន្លែងណាដែលមានអ្នកដឹកនាំល្អ និងគួរតែចេះទាំងជំនាញរឹងមួយទុកជា ជំនាញស្នូលពិតប្រាកដ ដើម្បីទទួលបានការងារល្អៗធ្វើ៕
អត្ថបទដោយ៖ ពីង ជូអេង
