នៅក្នុងវីដេអូមួយ កំឡុងពេលកូនប្រុសពៅរបស់លោក Donald Trump និងប្រពន្ធទី៣ Melina Trump មានអាយុ៤ឆ្នាំ។ ជាឪពុកម្នាក់ដែលមានតួនាទីធំ Trump បានទូន្មាននិងដាក់កំហិតចំនួន៤យ៉ាងទៅកាន់ កូនប្រុសឈ្មោះ Barron Trump តាំងពីគេចូលរៀនថា្នក់មត្តេយ្យ។
ក្នុងវីដេអូមួយបង្ហាញអំពីសកម្មភាពរបស់ Trump ជាឪពុកនៅក្នុងការិយាល័យធ្វើការ ជាមួយក្មេងប្រុសតូចម្នាក់ស្លៀកពាក់ ទៅសាលារៀន លោកឪពុកបាននិយាយថា “ខ្ញុំចង់ឱ្យអ្នកបាននិទ្ទេស A ទាំងអស់នៅសាលារៀន ហើយនៅពេលដែលអ្នកធំឡើង មិនត្រូវប៉ះពាល់ថ្នាំញៀនទេ ហាមប្រើជាតិអាល់កុល កាន់តែមិនត្រូវជក់បារី ហើយកុំឱ្យមានស្នាមសាក់ឱ្យសោះ ខ្ញុំមិនចង់ឃើញមានស្នាមសាក់លើខ្លួនអ្នកទេ”។
តាមរយៈដំបូន្មានឱ្យកូនបែបនេះ អ្នកជំនាញផ្នែកកុមារលោក Alfie Kohn និងអ្នកនិពន្ធសៀវភៅ Unconditional Parenting បានប្រាប់កាសែត Forbes ថាផ្អែកលើការសិក្សាស្រាវជ្រាវ ចិញ្ចឹមកូនរបៀបចិញ្ចឹមនេះគឺតឹងរឹង ផ្តាច់ការនិងជាការរំពឹងខ្ពស់បំផុតមួយរបស់ឪពុកម្តាយ ដែលតម្រូវឱ្យកូនត្រូវរៀនឱ្យបានពិន្ទុល្អបំផុតលើសគេនៅក្នុងសាលារៀន។
វាជាការដាក់សម្ពោធ ធ្វើឱ្យកូនមានជំងឺថប់បារម្ភ មិនហ៊ានប្រឈមនឹងការបរាជ័យ មួយវិញទៀតនឹងឱ្យពួកគេរៀនមើលឃើញខ្លួនឯងថាពួកគេគួរឱ្យស្រឡាញ់ក្នុងភ្នែកឪពុកម្តាយ លុះត្រាតែពួកគេនាំយកលំដាប់ពិន្ទុល្អមកផ្ទះ។
ប៉ុន្តែនោះជាការល្អម្យ៉ាងនៃរបៀបចិញ្ចឹមកូនរបស់ លោក Donald Trump ក្នុងការនិយាយជាមួយកូនអំពីគ្រឿងញៀននិងគ្រឿងស្រវឹង។ យ៉ាងណាមិញដើម្បីឱ្យកាន់តែល្អឪពុកម្តាយគួរតែបែងចែកការសន្ទនាប្រៀនប្រដៅ ដាក់កំហិតនេះជាពីរផ្លូវបន្ថែមទៀតគឺ ទី១លើកទឹកចិត្តដល់កូនឱ្យសួរសំណួរ និងទី២បង្ហាញការស្តាប់ពីអ្វីដែលពួកគេចង់និយាយ ជាជាងគ្រាន់តែប្រើពាក្យបញ្ជាដ៏តឹងរ៉ឹងឱ្យគេធ្វើតាម៕
អត្ថបទដោយ៖ ពីង ជូអេង
