អ្នកឧកញ៉ា ម៉ុង ឫទ្ធី អគ្គនាយកក្រុមហ៊ុន Mong Reththy Group Co., Ltd. បានសម្រេចចិត្តកាប់ចោលដើមដូងប្រេងចំនួន ៥០០ហិកតា ស្ថិតក្នុងឃុំតានៃ ស្រុកព្រៃនប់ ខេត្តព្រះសីហនុ ក្រោយប្រមូលផលអស់រយៈពេល ២៥ឆ្នាំ។ នេះបើយោងតាមគណនីហ្វេសប៊ុករបស់អ្នកឧកញ៉ាផ្ទាល់ នាថ្ងៃទី២៦ ខែសីហា ឆ្នាំ២០២៥។
យ៉ាងណាមិញ ចំពោះមូលហេតុនៃការកាត់សំអាតដើមដូងប្រេងនេះ អ្នកឧកញ៉ា ម៉ុង ឫទ្ធី បានបញ្ជាក់យ៉ាងដូច្នេះថា៖ «ដូងប្រេងចាប់តាំងពីបណ្តុះកូនរហូតដល់វាបញ្ចេញផ្កាផ្លែ មានអាយុកាល៣៦ខែ យើងប្រមូលរយៈពេល២៥ឆ្នាំ វានឹងថយផល ដល់ពេលកាប់ចោលដាំដុះថ្មីជំនួសវិញ។ ចំណែកដើមចាស់គេត្រូវកាត់ចិញ្ច្រាំវាអោយទៅជាជីកំប៉ុស»។
ក្នុងនោះអ្នកឧកញ៉ា បានបន្ថែមទៀតថា នៅដើមរដូវវស្សាឆ្នាំ ២០២៦ខាងមុខ ក្រុមហ៊ុនគ្រោងដាំឡើងវិញចំនួន ៥០០ហិតា និងត្រូវបណ្តុះកូនដូងប្រេងដែលបាននាំចូលមកពីប្រទេសម៉ាឡេស៊ីចំនួន ៩០,០០០ដើម ខណៈដូងព្រេងដែលបានកាប់មានពូជមកពី ប្រទេសហ្សាអៀ និងកូស្តារីកាអាមេរិកខាងត្បូង និងបានដាំកាលពីឆ្នាំ១៩៩៦។
គួរជម្រាបផងដែរថា ក្រៅពីក្រុមហ៊ុនកសិកម្ម និងឧស្សាហកម្មធំៗ ដែលមានបុគ្គលិក-កម្មករ កំពុងបម្រើការជាង ១០,០០០នាក់ អ្នកឧកញ៉ា ម៉ុង ឫទ្ធី ក៏បានបង្កើតហាងលក់ទំនិញ ចំការខ្មែរ ផ្លែឈើខ្មែរ-Khmer Farm Khmer Fruits មានលក់គ្រឿងកសិ បន្លែ ផ្លែឈើ ត្រី សាច់ធម្មជាតិ និងសុវត្ថិភាពខ្ពស់ ដល់អតិថិជនផងដែរ។ ប្រសិនបើបងប្អូនមានតម្រូវការ អាចធ្វើការកម្ម៉ង់តាមរយៈលេខទូរស័ព្ទ ០៧០ ៩៨៧ ៥៣៥ ឬទៅកាន់ទីតាំងផ្ទាល់ស្ថិតនៅ ខាងលិចស្ថានទូតចិន, ផ្លូវ430 កែងផ្លូវ432, ផ្ទះលេខ119, រាជធានីភ្នំពេញ៕
