ឯកឧត្ដម ស៊ុន ចាន់ថុល ទេសរដ្ឋមន្ដ្រី រដ្ឋមន្ដ្រីក្រសួងសាធារណការ និងដឹកជញ្ជូន បានមានប្រសាសន៍ឲ្យដឹងថា ក្រុមហ៊ុនសាជីវកម្មថ្នល់ និងស្ពានចិន (CRBC) ដែលជាក្រុមហ៊ុនបានបណ្ដាក់ទុនសាងសង់ផ្លូវល្បឿនលឿននៅកម្ពុជា បង្ហាញចំណាប់អារម្មណ៍នៅក្នុងការដាក់ទុនសាងសាង់គម្រោងព្រែកជីកហ្វូណនតេជោ ដែលជាគម្រោងប្រចាំប្រវត្ដិសាស្រ្ដរបស់កម្ពុជា។ ខណៈកកន្លងមកក្រុមហ៊ុនមួយនេះក៏បានចូលរួចក្នុងការជួយសិក្សាគម្រោងខាងលើផងដែរ។

ការលើកឡើងរបស់ឯកឧត្ដមទេសរដ្ឋមន្ដ្រីនេះត្រូវបានធ្វើនៅក្នុងកិច្ចសម្ភាសពិសេសស្ដីពី«សមិទ្ធផលសំខាន់ធំៗ ក្នុងវិស័យសាធារណការ និងដឹកជញ្ជូន ពីឆ្នាំ២០១៨ ដល់ឆ្នាំ២០២៣»កាលពីថ្ងៃទី២១ ខែមិថុនា ឆ្នាំ២០២៣។

ថ្លែងក្នុងកិច្ចសម្ភាសខាងលើឯកឧត្ដមបានមានប្រសាសន៍ថា “មានក្រុមហ៊ុនសាងសង់ផ្លូវល្បឿនលឿនភ្នំពេញទៅព្រះសីហនុ ភ្នំពេញទៅបាវិត ត្រៀមធ្វើពីភ្នំពេញទៅសៀមរាប (CRBC) គាត់ជួយសិក្សាយើង។ គាត់ក៏ចង់ដាក់ទុនដែរ ដោយសារគាត់ឃើញគម្រោងវាល្អ អ៊ីចឹងគាត់អាចចរាចររៀបចំចុះកិច្ចព្រមព្រៀង ឬជា MOU សិនក៏បានដែរ ដើម្បីពិនិត្យមើលតើការសាងសង់ត្រឹមត្រូវ ឬមិនត្រឹមត្រូវ ផ្ដល់ចំណេញមកគាត់វិញទទួលបានទេ ដាក់លុយ ១៧០០ លានដុល្លារនៀក តើចំណេញវិញឬអត់”។

សូមជម្រាបផងដែរថា កាលពីខែឧសភា កន្លងទៅថ្មីៗនេះ រាជរដ្ឋាភិបាលបានសម្រេចឲ្យអនុវត្ដគម្រោងព្រែកជីកផ្លូវទឹកខាងលើនេះ ដើម្បីសម្រួលដល់ការទឹកទំនិញទៅកាន់កំពង់ផែសមុទ្រ។ តាមការសិក្សាបង្ហាញថា គម្រោងផ្លូវទឹកនេះមានប្រវែង ១៨០ គីឡូម៉ែត្រ ចាប់ផ្ដើមពីព្រេកតាកែវនៃទន្លេមេគង្គ ឆ្លងកាត់តាមព្រែកតាឯកនៃទន្លេបាសាក់ រួចតាមព្រែកតាហ៊ីងនៃទន្លេបាសាក់ស្រុកកោះធំ និងបន្ដរហូតដល់សមុទ្រខេត្ដកែប ដោយឆ្លងកាត់ខេត្ដចំនួន ៤ រួមមាន៖ ខេត្ដកណ្ដាល ខេត្ដតាកែវ ខេត្ដកំពត និងខេត្ដកែប។

តាមការប៉ាន់ស្មានគម្រោងផ្លូវទឹកថ្មីនេះ នឹងត្រូវចំណាយទុនវិនិយោគប្រមាណ ១៧០០លានដុល្លារអាមេរិក និងប្រើប្រាស់រយៈពេលសាងសង់ប្រមាណ ៤ឆ្នាំ។ នៅពេលសាងសង់រួចផ្លូវទឹកនេះ នឹងជួយកាត់បន្ថយរយៈពេល និងចម្ងាយនៃការដឹកជញ្ជូននាពេលបច្ចុប្បន្ន ដែលត្រូវឆ្លងកាត់តាមកំពង់ផែកៃមែបរបស់វៀតណាមប្រមាណ ៦៩គីឡូម៉ែត្រ ពីកំពង់ផែស្វយ័តក្រុងភ្នំពេញ ទៅកំពង់ផែក្រុងព្រះសីហនុ និងប្រមាណ ១៣៥គីឡូម៉ែត្រ ពីកំពង់ផែស្វយ័តក្រុងភ្នំពេញ ទៅកំពង់ផែខេត្តកំពត៕