បុរសវ័យក្មេង Charlie Chang អាចរកចំណូលបាន១១ម៉ឺនដុល្លារក្នុង១ខែ បច្ចុប្បន្នលោកអាចសល់ទ្រព្យជាង២លាន ៣០ម៉ឺនដុល្លារហើយ បន្ទាប់ពីគាត់បានចាយពេលជាង៦ឆ្នាំ ក្នុងនាមជា Youtuber ផលិតមាតិកាអំពីលុយ និងការប្រើប្រាស់លុយកាក់។ ធ្លាប់ជាក្មេងប្រុសដែលម្តាយបង្ខំឱ្យរៀនជំនាញដែលខ្លួនមិនចូលចិត្ត ទោះខំរៀនយ៉ាងណាក៏មិនចេះ ធ្វើការច្រើនមុខ ប៉ុន្តែគាត់បែរជាមកកាក់កប នឹងជំនាញ៥ដែលនាំឱ្យគាត់អាចរកចំណូលច្រើនជាងមុន១០០ដងឯណោះ។
១.ជំនាញសរសេរ
បុរសវ័យ២៩ឆ្នាំរូបនេះ គឺជាអ្នកធ្វើវីដេអូយូធូប ដូច្នេះហើយគាត់និយាយថាវីដេអូតម្រូវឱ្យគាត់នៅមុខកាមេរ៉ាវាមិនមែនដោយសារគាត់អាចនិយាយវាចេញមកដោយឯកឯងហើយត្រូវរហូតនោះទេ គឺវាបានមកពីជំនាញសរសេរ ដែលគាត់អាចសរសេរ សាច់រឿងនិងប៉ារ៉ូលសម្រាប់និយាយឱ្យបានច្បាស់ល្អ និងមានប្រធានបទល្អ ដើម្បីវីដេអូគុណភាព។
ជំនាញសរសេរនេះវាផ្តល់សារៈសំខាន់ខ្លាំងណាស់ ព្រោះថាវាធ្វើឱ្យគាត់មានភាពច្នៃប្រឌិត ចងចាំបានល្អ និងមានគំនិតថ្មីជាហូរហែ ម្យ៉ាងវិញទៀតវាមិនមែនសំខាន់ទាល់តែចេះឆ្អិនអីណាស់ណានោះទេ សំខាន់ឱ្យតែចាប់ផ្តើមសរសេរអ្វីដែលអ្នកនឹកឃើញ យ៉ាងហោចណាស់ចាយពេលជាមួយការសរសេរឱ្យបាន១០នាទីក្នុង១ថ្ងៃអ្នកនឹងឃើញរឿងអស្ចារ្យស្មានមិនដល់ ។
២. ជំនាញនិយាយ
ការនិយាយគឺមានសារៈសំខាន់ណាស់ ព្រោះវាជាធ្នាក់សម្រាប់ទាក់អ្នកទិញ ហើយវាជាស្នៀតពិសេសមួយដែលបានកើតចេញពីការសរសេរ ពាក្យពេចន៍ល្អៗនិងប្រយោគទាក់ចិត្ត ជំនាញនេះអាចនាំអ្នកចាប់យកឱកាសថ្មីៗ និយាយឱ្យគេសប្បាយចិត្ត ទាក់បេះដូងភ្ញៀវជាដើម។ ដូចជាមហាសេដ្ឋីល្បីៗនៅជុំវិញពិភពលោក សុទ្ធតែជាវាគ្មិនពូកែនិយាយនិងមានជំនាញលក់។
សាកស្រមៃបន្តិចទៅមើល ប្រសិនបើអ្នកជាអ្នកលក់ផលិតផលអ្វីមួយ តើអ្នកអាចនិយាយអំពីការលក់បានល្អដោយរបៀបម៉េច តើអ្នកនឹងពន្យល់អតិថិជន អ្នកដោយលម្អិតនឹងខ្លីខ្លឹមដោយរបៀបណា? ការនិយាយល្អគឺកើតចេញពីការស្តាប់ ការសរសេរ និងការអាន។
៣.ជំនាញលក់
ជំនាញមួយនេះគឺជាជំនាញដែលសហគ្រិនភាគច្រើនចេះស្រាប់ ព្រោះវាជាជំនាញមួយដែលមិនអាចខ្វះបាន និងជាជំនាញដែលអាចបង្កើនប្រាក់ចំណេញដែលជាចំណូលមិនចេះចាស់គំរិលនោះទេ ។ ក្រៅពីរកស៊ីលក់ដូរខ្លួនឯង យើងអាចធ្វើជាឈ្មួលកណ្តាលលក់និងផ្សាយផលិតផលឱ្យគេ។ ជំនាញនេះវាកើតចេញពីការរៀនពីទំនាក់ទំនង រៀនពីបុគ្គលពូកែលក់ និងការអនុវត្តផ្ទាល់ ហើយវាបង្កប់ទៅដោយទំនុកចិត្តលើផលិតផលរបស់ខ្លួនយើងផ្ទាល់ គួបផ្សំនឹងការបម្រើសេវាកម្មទៅដល់អតិថិជនឱ្យល្អបំផុតតាមដែលយើងអាចធ្វើបាន។
៤. ជំនាញបង្រៀន
ជំនាញដែលមិនត្រឹមតែបានលុយនោះទេ ថែមទាំងបាននូវគុណតម្លៃទៀត ព្រោះយើងបានបង្រៀនមនុស្សឱ្យចេះអ្វីដែលថ្មី។ ជារួមការបង្រៀននេះវាមិនចាំបាច់ទាល់តែអ្នកចេះគ្រប់យ៉ាងនោះទេ តែប្រាកដថាអ្នកមានជំនាញបង្រៀនអ្នកដទៃនូវអ្វីដែលអ្នកបានចេះ។
ឧទាហរណ៍ Charlie Chang គាត់បានបើកវគ្គសិក្សាអំពីរបៀបធ្វើវីដេអូយូធូប និងលក់ផលិតលើអនឡាញខណៈដែលគាត់កំពុងអនុវត្តន៍វាស្រាប់ ហើយនេះជាអ្វីដែលគាត់អាចរកចំណូលបានមួយប្រភពទៀតដោយគាត់យកបទពិសោធន៍គាត់ក្នុងការធ្វើវាយកទៅបង្រៀនគេបន្តទៀត ឱ្យយល់នឹងអនុវត្តបាន ហើយគាត់បើក វគ្គសិក្សាតាមកម្មវិធី Zoom និងគិតតម្លៃ ៥០០ដុល្លារក្នុង១ម៉ោង អំពីរបៀបរកលុយ។
៥.ជំនាញគ្រប់គ្រង
ជំនាញដឹកនាំក្រុម គឺអាចនាំអ្នកដទៃធ្វើការឱ្យអ្នកដោយរីករាយនឹងរួមការងារជាមួយគ្នា ការគ្រប់គ្រងមនុស្សគឺជារឿងមួយដែលលំបាក។ ប៉ុន្តែ Charlie Chang និយាយថាគាត់គឺជាអ្នកធ្វើវីដេអូហើយគាត់គួរតែរកនរណាម្នាក់មកកាត់វីដេអូឱ្យគាត់គឺល្អបំផុតហើយ ព្រោះអ្នកធ្វើអាជីវកម្មគ្មានអ្វីក្រៅពីយកពេលទៅវិនិយោគលើលុយ ហើយយកលុយមកវិនិយោគលើពេលវេលាវិញដើម្បីភាពរីកចម្រើនមិនចេះរីងស្ងួតនោះទេ៕
គួរជម្រាបផងលោក Charlie Chang គឺជាសហគ្រិនវ័យ២៩ឆ្នាំ ជាជនជាតិជប៉ុន-អាមេរិក កើតក្នុងឆ្នាំ១៩៩២ នាទីក្រុង Los Angles សហរដ្ឋអាមេរិក។ នាពេលបច្ចុប្បន្ននេះ មាតិកានិងការធ្វើយូធូបរបស់គាត់អាចទាញអ្នកតាមដានប្រមាណជាង ៨៧ម៉ឺននាក់ជាង និងរកចំណូលបានរាប់ម៉ឺនដុល្លារក្នុងមួយខែៗ៕
អត្ថបទដោយ៖ ពីង ជូអេង
