ភ្នំពេញ, ថ្ងៃទី២៣ ខែមិថុនា ឆ្នាំ២០២៥ – យើងសង្កេតឃើញថាប្រជាជនកម្ពុជាមានកំណើនកើនឡើង ក្នុងការចូលរួមជួយបរិច្ចាគឈាម​ តែទោះជាយ៉ាងណាក៍បរិមាណឈាមដែលទទួលបានអំពីការបរិច្ចាគនៅមិនទាន់គ្រប់គ្រាន់ដើម្បីឆ្លើយតបទៅនឹងតម្រូវការសង្គ្រោះជីវិតអ្នកជំងឺ បើយោងតាមរបាយការណ៍របស់មជ្ឈមណ្ឌលជាតិផ្តល់ឈាម។ ដូច្នេះ ក្រុមហ៊ុន ចតុមុខ សឺវីស បានរៀបចំយុទ្ធនាការបរិច្ចាគឈាមដោយស្ម័គ្រចិត្ត ក្រោមប្រធានបទ "ឈាមអ្នក ជីវិតខ្ញុំ" នៅថ្ងៃទី២៣ ខែមិថុនា ឆ្នាំ២០២៥ នៅទីស្នាក់ការកណ្តាលក្រុមហ៊ុន។

កម្មវិធីនេះមានគោលដៅប្រមូលឈាមដើម្បីគាំទ្រដល់មជ្ឈមណ្ឌលជាតិផ្តល់ឈាមរបស់ក្រសួងសុខាភិបាល ដែលជាអង្គការសំខាន់ក្នុងការចែកចាយឈាមទៅកាន់មន្ទីរពេទ្យនានា ជួយសង្គ្រោះអ្នកជំងឺដែលស្ថិតក្នុងស្ថានភាពបន្ទាន់។ក្រុមហ៊ុន ចតុមុខ សឺវីស សូមលើកទឹកចិត្តដល់ប្រជាពលរដ្ឋទូទៅ ជាពិសេសអ្នកដែលមានសុខភាពល្អ ឱ្យចូលរួមការបរិច្ចាគឈាមតាមលទ្ធភាព។ ការបរិច្ចាគឈាមមិនគ្រាន់តែជួយសង្គ្រោះជីវិតអ្នកដទៃប៉ុណ្ណោះទេ ថែមទាំងអាចជាការធានាថា នៅពេលដែលខ្លួនអ្នកត្រូវការឈាមការព្យាបាល អ្នកក៏នឹងទទួលបានការគាំទ្រពីមជ្ឈមណ្ឌលដូចគ្នាផងដែរ។

តាមរយៈយុទ្ធនាការនេះ យើងសង្ឃឹមថានឹងអាចបំផុសគំនិត ឱ្យសាធារណជនមានការយល់ដឹងពីសារៈសំខាន់នៃការបរិច្ចាគឈាម និងជម្រុញអោយមានការចូលរួមរួមចំណែកក្នុងសកម្មភាពសប្បុរសធម៌នេះ។ អ្នកបរិច្ចាគទាំងអស់ គឺជាវីរជនពិតប្រាកដ ក្នុងការជួយសង្គ្រោះជីវិតមនុស្ស។