កម្ពុជានឹងទិញយន្ដហោះ Boeing 737 max 8 ចំនួន ១០ គ្រឿង ពីសហរដ្ឋអាមេរិក ហើយមានជម្រើសអាចបង្កើនទិញ ១០ គ្រឿង បន្ថែមទៀត នាពេលអនាគត ដែលនឹងអាចដឹកមកដល់កម្ពុជានៅឆ្នាំ២០៣១ខាងមុខ។ នេះបើតាមការបញ្ជាក់របស់ឯកឧត្តមឧបនាយករដ្ឋមន្រ្តី ស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍន៍កម្ពុជា ក្នុងសន្នីសីទសារព័ត៌មាន ស្តីពីលទ្ធផលនៃអត្រាពន្ធគយបដិការរវាងកម្ពុជា និងសហរដ្ឋអាមេរិក កាលពីថ្ងៃទី ០១ ខែសីហា ឆ្នាំ២០២៥ នៅក្រុមប្រឹក្សាអភិវឌ្ឍន៍កម្ពុជា។
តើរថយន្ដដ៏ប្រណិត ដែលផលិតឡើងដោយក្រុមហ៊ុន Boeing របស់សហរដ្ឋអាមេរិកនេះមានតម្លៃប៉ុន្មាននៅក្នុងមួយគ្រឿងៗ?
បើយោងតាមការបញ្ជាក់របស់ឯកឧត្ដម ស៊ិន ចាន់សិរីវុត្ថា រដ្ឋលេខាធិការ និងជាអ្នកនាំពាក្យរដ្ឋលេខាធិការដ្ឋានអាកាសចរស៊ីវិល ដែលរកស្រង់ដោយក្រសួងព័ត៌មានកាលពីថ្ងៃទី៣ ខែសីហា ឆ្នាំ២០២៥ បានឱ្យដឹងថា យន្ដហោះ Boeing 737 Max 8 មានលក្ខណៈពិសេស និងសន្សំសំចៃច្រើន។ ខណៈយន្ដហោះនេះគឺប្រើប្រាស់សាំង មានសំឡេងលឺតិច និងការបំពុលបរិស្ថានមានកម្រិតទាបខ្លាំង បើប្រៀបធៀបនឹងប្រភេទយន្ដហោះផ្សេងទៀត ពិសេសការថែរក្សាក៏មានតម្លៃទាបផងដែរ។
ឯកឧត្ដមបន្ដថា យន្ដហោះBoeing 737 Max 8 ដែលកម្ពុជាគ្រោងទិញពីអាមេរិកនេះ គឺមានតម្លៃចន្លោះពី ៩០ លានដុល្លារទៅ ១២០ លានដុល្លារនៅក្នុង ១ គ្រឿង ដោយអាស្រ័យទៅលើប្រភេទ និងជម្រើសយន្ដហោះនីមួយៗ។ ហើយយន្ដហោះនេះ គឺមានកៅអីចន្លោះពី ១៦២ ទៅដល់ ២១០ អាស្រ័យលើការរៀបចំជា Business Class ឬក៏ Economic Classs និងអាចហោះហើរបានចម្ងាយជាង ៦៥០០គីឡូម៉ែត្រ។ ការហោះជិត ឬហោះឆ្ងាយអាស្រ័យលើម៉ាស៊ីន ដែលប្រភេទម៉ាស៊ីនខ្លះ អាចហោះបានឆ្ងាយជាង ៥៦០០គីឡូម៉ែត្រ។
