បាំងតែមួយថ្ងៃទៀត ការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) ឆ្នាំសិក្សា ២០២៥ នឹងចាប់ផ្តើមទូទាំងប្រទេសកម្ពុជា ខណៈមានបេក្ខជនសរុបចំនួន ១៤៦,៧២០នាក់, ថ្នាក់សង្គមមានចំនួន ១០៦,០៤២នាក់ និងថ្នាក់វិទ្យាសាស្ត្រពិតមានចំនួន ៤០,៦៧៨នាក់។
ក្នុងនោះ ក្រសួងអប់រំ យុវជន និងកីឡា បានប្រកាសណែនាំដល់បេក្ខជនមិនត្រូវធ្វើសកម្មភាពមួយចំនួន ជាពិសេសគឺ មិនត្រូវយក សៀវភៅ ឬសំណៅឯកសារគ្រប់រូបភាព និង ឧបករណ៍អេឡិចត្រូនិកគ្រប់ប្រភេទ ចូលក្នុងមណ្ឌលប្រឡងឡើយ។ ប្រសិនបើរកឃើញ អាចនឹងត្រូវដកសិទ្ធប្រឡងភ្លាមៗ។
ទន្ទឹមនឹងនេះ រដ្ឋមន្ត្រីក្រសួងអប់រំ បណ្ឌិតសភាចារ្យ ហង់ជួន ណារ៉ុន បានផ្ដាំផ្ញើដល់បេក្ខជនទាំងអស់ ត្រូវរក្សាអនាម័យ និងសុខភាពឱ្យបានល្អ ដោយត្រូវសម្រាក បរិភោគអាហារ និងទទួលទានទឹកស្អាតឱ្យបានគ្រប់គ្រាន់ ជាពិសេសទទួលទានអាហារពេលព្រឹក ដើម្បីធ្វើឱ្យមានភាពក្លាហាន អារម្មណ៍នឹងន ប្រកបដោយភាពជឿជាក់ ប្រុងប្រយ័ត្នពេលធ្វើដំណើរទៅ-មកមណ្ឌលប្រឡង រួមទាំងជូនពរឲ្យទទួលបានលទ្ធផលល្អគ្រប់ៗគ្នាផងដែរ៕
