ពិតជារឿងគួរឲ្យត្រេតអរណាស់ អង្គរវត្ត ទឹកដីវិសុទ្ធស្ថិតនៅខេត្តសៀមរាបនៃព្រះរាជាណាចក្រកម្ពុជា បានជាប់ចំណាត់ថ្នាក់លេខ១ ជាទីកន្លែងដ៏ល្អបំផុត ក្នុងចំណោមទីកន្លែងដែលគួរមកទស្សនាកម្សាន្ត ចំនួន ២៩ នៅក្នុងតំបន់អាស៊ីអាគ្នេយ៍។ នេះបើយោងតាមការស្ទង់មតិរបស់ក្រុមហ៊ុនមគ្គុទេសទេសចរណ៍ Touropia Travel Guides ដែលបានចេញផ្សាយកាលពីពេលកន្លងទៅថ្មីៗនេះ។

ក្រុមហ៊ុនមគ្គុទេសទេសចរណ៍ Touropia បានបញ្ជាក់យ៉ាងដូច្នេះថា៖ «ពេលនិយាយពីទីតាំងបុរាណវិទ្យា អ្នកទេសចរមិនចង់ខកខានការទស្សនាអង្គរវត្ត ដែលស្ថិតនៅប៉ែកខាងជើង នៃប្រទេសកម្ពុជាឡើយ។ ទីនោះពោរពេញទៅដោយវប្បធម៌យ៉ាងអស្ចារ្យបំផុតលើពិភពលោក។ អច្ឆរិយវត្ថុទាំងនោះរួមមាន ប្រាសាទអង្គរវត្តដ៏ធំស្គឹមស្កៃ ប្រាសាទបាយ័ន ដែលមានថ្មធំៗតម្រៀបគ្នាចេញជាព្រហ្មមុខ៤ និងប្រាសាទតាព្រហ្ម ដែលជាប្រាសាទពុទ្ធសាសនាដែលហ៊ុមព័ទ្ធទៅដោយដើមឈើធំៗ និងខ្ពស់ៗ»។

គួរបញ្ជាក់ផងដែរថា ក្រោយការស្តង់មតិពីអ្នកទេសចរនៅលើពិភពលោក ដោយវែបសាយអន្តរជាតិមួយឈ្មោះ «Rough Guides» ដែលជាទីភ្នាក់ងារទេសចរណ៍ និងជាក្រុមហ៊ុនបោះពុម្ពផ្សាយសៀវភៅមគ្គទេសក៍ដ៏ល្បីល្បាញ អំពីប្រទេសដែលរួសរាយរាក់ទាក់ជាងគេបំផុតនៅលើពិភពលោក «The World’s Friendliest Countries» បានបង្ហាញថា កម្ពុជាជាប់ចំណាត់លេខ១ ដែលមានអ្នកបោះឆ្នោតគាំទ្រច្រើនជាងគេ នៅក្នុងប្រព័ន្ធអ៊ីនធើណេតថា ជាប្រទេសដែលមានភាពរួសរាយរាក់ទាក់បំផុត នៅលើពិភពលោកផងដែរ៕

អត្ថបទដោយ៖ កាន់ ដារ៉ា (ស្មេរពនេចរ)