ប៉ុន្មានឆ្នាំចុងក្រោយនេះ វិស័យសំណង់កម្ពុជានៅតែបង្ហាញពីកំណើនខ្ពស់គួរឲ្យកត់សម្គាល់ ដោយសង្កេតឃើញវត្តមានអគារខ្ពស់ៗរះបន្តកន្ទុយគ្នានៅចំកណ្តាលបេះដូងរាជធានីភ្នំពេញ។ តោះ! ថ្ងៃនេះ Business Cambodia នឹងដឹកដៃមិត្តអ្នកអានមកស្គាល់អគារខ្ពស់បំផុតទាំង៥ និងមេធំឈរពីក្រោយសមិទ្ធផលទាំងនេះ៖
១/. អគារ The Peak Shangri-la៖ គឺជាអគារពាណិជ្ជកម្មខ្ពស់ជាងគេបំផុតក្នុងរាជធានីភ្នំពេញគិតត្រឹមឆ្នាំ២០២២ ដែលមានកម្ពស់ ៥៥ជាន់ ស្មើនឹង ២២៤ម៉ែត្រ ឈរបង្អួតរាងនៅក្បែរស្ពាននាគកោះពេជ្រ ត្រូវបានវិនិយោគដោយក្រុមហ៊ុនសិង្ហបុរី។ ជាអគារមជ្ឈមណ្ឌលពាណិជ្ជកម្មដ៏ប្រណីត និងមានសណ្ឋាគារ The Shangri-La ជាសណ្ឋាគារលំដាប់ផ្តាយប្រាំ ប្រកបដោយកិត្យានុភាព ដែលមានខុនដូចំនួន ១០១៤យូនីត ជាមួយនឹងទុនវិនិយោគ ៥៨០លានដុល្លារ។
២/. អគារ Gold Tower ភ្នំពេញ៖ ជាអគារពាណិជ្ជកម្មមួយដ៏លេចធ្លោមានកម្ពស់ ៤២ជាន់ ស្មើនឹង ២១១ម៉ែត្រ រះលើដងមហាវិថីព្រះសីហនុ កែងមហាវិថីព្រះមុនីវង្ស អភិវឌ្ឍដោយក្រុមហ៊ុនកូរ៉េដែលមានតម្លៃវិនិយោគ ២៤០លានដុល្លារ និងបានបញ្ចប់ការសាងសាងនៅពាក់កណ្តាល ឆ្នាំ២០២០។
៣/. អគារ Morgan Tower៖ អគានេះមានកម្ពស់ ៤៦ជាន់ ស្មើនឹង ២១០ម៉ែត្រ បានបញ្ចប់ការសាងសង់ជាស្ថាពរ កាលពីចុងឆ្នាំ២០២០។ ក្រុមហ៊ុនចិន Morgan Tower ប្រើប្រាស់ទុនវិនិយោគប្រមាណជា ១៦០ លានដុល្លារអាមេរិកក្នុងការសាងសង់គម្រោងនេះ។ ជាអគារការិយាល័យបានទទួលពានរង្វាន់ មាសលំដាប់អន្តរជាតិចំនួន៤ ក្នុងនោះមានមជ្ឈមណ្ឌលអាជីវកម្មស្នូលរបស់ប្រទេសកម្ពុជា ពីអង្គការអន្តរជាតិ LEED និងក្រុមហ៊ុនអចលនទ្រព្យ PropertyGuru Asia ក៏បង្ហាញថាប្រទេសកម្ពុជាបានបើកជំនួញទីក្រុងអន្តរជាតិជំនាន់ថ្មី។
៤/. អគារវឌ្ឍនៈ (Vattanac Capital Tower)៖ គឺជាអគារពាណិជ្ជកម្ម និងបណ្តុំសេវាកម្មចម្រុះដ៏ខ្ពស់មួយរះកណ្ដាលទីក្រុងភ្នំពេញ សាងសង់ឡើងមានរាងជានាគរាជ ស្រោបកញ្ចក់ បំពាក់ដោយបរិក្ខារទំនើបៗ មានកម្ពស់ ១៨៧,៣ ម៉ែត្រ ឈរលើផ្ទៃដីសរុប ១៣១,០០០ ម៉ែត្រការ៉េ ចែកជា ៣៩ជាន់។ អគារនេះមានឈ្មោះថា អគារវឌ្ឍនៈកាពីតាល់ ដែលមានតម្លៃជាង ១០០លានដុល្លារ ត្រូវបានដាក់សម្ពោធជាផ្លូវការ ក្នុងឆ្នាំ២០១៨។ សមិទ្ធផលធំមហិមានេះ កើតចេញពីញើសឈាមរបស់ប្តីប្រពន្ធខ្មែរមួយគូ គឺអ្នកឧកញ៉ា ឈុន លាង ត្រូវជាប្រពន្ធ និងអ្នកឧកញ៉ា សំ អាង ជាស្វាមី ដែលជាស្ថាបនិកក្រុមហ៊ុន វឌ្ឍនៈ គ្រុប។
៥/. អគារ Gia Tower៖ អគារដ៏ទំនើបបំផុតនេះ មានទីតាំងស្ថិតនៅកោះពេជ្រ ត្រូវបានអភិវឌ្ឍឡើងដោយក្រុមហ៊ុន GIA International Real Estate Company (Overseas Cambodian Investment Corporation ) មានកម្ពស់៤២ជាន់ ស្នើនឹង ១៧៨ម៉ែត្រ។ មជ្ឈមណ្ឌលពាណិជ្ជកម្មនេះប្រើប្រាស់សំរាប់ការិយាល័យ និងលក់រាយចំនួន៨យូនីត ទីតាំងសម្រាប់ការិយាល័យខ្នាតតូចចំនួន៣០៦យូនីត ការិយាល័យខ្នាតធំចំនួន១១យូនីត រួមជាមួយជាន់អាហារដ្ឋាន Sky bar ផងដែរ។ បន្ថែមពីនេះក៏មានទីធ្លាសម្រាប់ទុកយានយន្តបានរហូតដល់ទៅ៣៨២គ្រឿង៕
អត្ថបទដោយ៖ កាន់ ដារ៉ា (ស្មេរពនេចរ)
សៀវភៅ «ច្រវាក់ប្រាក់ខែ» (កសាងចំណូលច្រើនប្រភពលើសពីប្រាក់ខែ) តម្លៃពិសេសត្រឹម ១២$ ប៉ុណ្ណោះ។
កក់តាម
https://t.me/hangchhengH24
