បច្ចុប្បន្ននិន្នាការនៃការបង់រំលស់របស់របរកាន់តែមានការពេញនិយមខ្លាំងជាពិសេសការបង់រំលស់សម្ភារនិយមដូចជា ម៉ូតូ ឡាននិងគ្រឿងអេឡិចត្រូនិចផ្សេងៗជាដើម។ តាមពិតការបង់រំលស់មិនអាក្រក់ទាំងអស់នោះទេ តែមានរឿងមួយចំនួនអ្នកគួរដឹងមុននឹងសម្រេចចិត្តបង់រំលស់ចៀសជួបបញ្ហាអំឡុងពេលបង់រំលស់។

១. លទ្ធភាព(ចំណូល)

រឿងទីមួយមុននឹងសម្រេចចិត្តបង់រំលស់របស់អ្វីមួយ អ្នកត្រូវដឹងច្បាស់ពីលទ្ធភាពខ្លួនឯងថាមានលទ្ធភាពបង់រំលស់ប្រចាំខែទៀតទាត់ឬអត់។ លទ្ធភាពត្រង់នេះគឺចង់សំដៅចំណូលរបស់អ្នកថាតើអ្នកមានចំណូលគ្រប់គ្រាន់ក្នុងការបង់រំលស់ប្រចាំខែឬអត់។ គន្លឹះមុនបង់រំលស់យើងត្រូវយកចំណូលយើងមកកត់ថាតើយើងរកចំណូលបានប៉ុន្មានហើយបូកទាំងចំណូលបន្ថែមប៉ុន្ដែត្រូវចាំថាចំណូលបន្ថែមមិនប្រាកដថាយើងរកបានរាល់ខែនិងថេរឡើយ។ ការធ្វើបែបនេះដើម្បីយើងដឹងពីលទ្ធភាពយើងច្បាស់ចៀសវាងវេទនាអំឡុងពេលបង់រំលស់។

២. ការបង់ប្រចាំខែ

 ជាទូទៅទឹកប្រាក់ដែលត្រូវចំណាយក្នុងការបង់រំលស់ប្រចាំខែ អ្នកគួរបង់ប្រចាំខែត្រឹមតែ៣០% នៃចំណូលសរុបប្រចាំខែរបស់អ្នកបានហើយ ដើម្បីចៀសវាងរងសម្ពាធហិរញ្ញវត្ថុអំឡុងពេលបង់រំលស់។ ឧទាហរណ៍បើអ្នកមានប្រាក់ខែ១ពាន់ដុល្លារ អ្នកគួរបង់រំលស់ប្រចាំខែតែ៣០០ដុល្លារប៉ុណ្ណោះ។

 ត្រូវចាំថាក្នុងការស់នៅ អ្នកមានតម្រូវការចាំបាច់ជាច្រើនដែលត្រូវចំណាយ ដូច្នេះបើអ្នកចំណាយលើការបង់រំលស់ប្រចាំខែច្រើនពេកនោះនឹងធ្វើឲ្យអ្នករស់នៅរងសម្ពាធនៃលុយកាក់ ស៊ីអត់ស៊ីឃ្លានព្រោះតែរវល់យកលុយមួយផ្នែកធំទៅបង់រំលស់ប្រចាំខែ។

៣. តើរបស់នោះចាំបាច់អត់?

 សំណួរត្រូវសួរខ្លួនឯងមុននឹងសម្រេចចិត្តបង់រំលស់នោះគឺថាតើរបស់នោះចាំបាច់អត់? ឧទាហរណ៍ទូរស័ព្ទអ្នកនៅប្រើប្រាស់បានធម្មតាស្រាប់តែមានម៉ាក់ទូរស័ព្ទថ្មីចេញមក អ្នកក៏សម្រេចចិត្តទិញទូរស័ព្ទដៃនោះបង់រំលស់វាមិនមែនជារឿងល្អនោះទេ។ 

ត្រង់នេះមានយុវតីនិងយុវជនច្រើនណាស់ សម្រេចចិត្តបង់រំលស់ព្រោះតែចង់ប្រើប្រាស់របស់ឲ្យគេមើលមកឡូយ ទាំងរបស់ទាំនោះពេលខ្លះវាមិនចាំបាច់នោះទេ ដូច្នេះហើយធ្វើឲ្យពួកគាត់មួយចំនួនជួបបញ្ហាលុយកាក់គ្មានលទ្ធភាពបង់សងប្រចាំខែហើយឈានដល់ការខ្ចីលុយគេធ្លាក់ក្នុងបំណុលទៀតផង។ សេដ្ឋី Warren Buffett បានលើកឡើងនូវឃ្លាមួយថា” បើអ្នកទិញរបស់មិនចាំបាច់ មិនយូរទេ អ្នកនឹងលក់របស់ចាំបាច់”។

៤. បាត់បង់ឱកាសកសាងទ្រព្យ

ភ្ជាប់ទៅនឹងចំណុចទី៣ដែលបានរៀបរាប់ខាងលើ បើអ្នកបង់រំលស់របស់ដែលមិនចាំបាច់នោះចំណុចអវិជ្ជមានមួយនោះគឺអ្នកនឹងបាត់បង់ឱកាសក្នុងការខ្ចីលុយយកមកធ្វើអាជីវកម្មព្រោះយើងមិនមានលទ្ធភាពច្រើនទេហើយមនុស្សម្នាក់ៗមានលទ្ធភាពមានកំណត់។ ឧទាហរណ៍បើអ្នកមានប្រាក់ខែ៥០០ដុល្លារ ហើយប្រចាំខែចាយ៣០០ដុល្លារ សល់២០០ដុល្លារបង់រំលស់អស់លើសម្ភារនិយម ដូច្នេះបើចង់ខ្ចីគេមកធ្វើអាជីវកម្មគឺមិនអាចទៅរួចហើយ។