នៅក្នុងសង្គមខ្មែរយើងបញ្ហាខ្ចីលុយអត់សងមានជាហូរហែរ ជាពិសេសអំឡុងពេលដែលសេដ្ឋកិច្ចពិបាករកលុយ ហើយចំណូលអត់បាន ម្ចាស់បំណុលជាច្រើនជួបបញ្ហាកូនបំណុលខ្ចីលុយហើយតែមិនសងលុយទៅតាមការសន្យានិងពេលវេលាដែលបានកំណត់។

មានសំណួរតែងតែសួរថា បើកូនបំណុលខ្ចីលុយមិន តើម្ចាស់បំណុលអាចប្ដឹងកូនបំណុលបានដែរឬទេ?

ក្នុងករណីកូនបំណុលខ្ចីលុយមិនព្រមសងទៅពេលវេលាកំណត់នោះ ម្ចាស់បំណុលអាចធ្វើការប្ដឹងបាន។ ត្រង់នេះម្ចាស់បំណុលអាចដាក់ពាក្យបណ្ដឹងទៅកាន់ អាជ្ញាធរមានសមត្ថកិច្ច ឬតុលាការ នៅក្នុងតំបន់ដែលកូនបំណុលរស់នៅ ដើម្បីឱ្យអាជ្ញាធរមានសមត្ថកិច្ចឬតុលាការ ចេញលិខិតអញ្ជើញឬដីការកោះហៅកូនបំណុល និងម្ចាស់បំណុល ឱ្យមកដោះស្រាយនិងទទួលខុសត្រូវដោយបំពេញកាតព្វកិច្ចរបស់ខ្លួន។  អាជ្ញាធរមានសមត្ថកិច្ច អាចជាអាជ្ញាធរភូមិ ឃុំ/សង្កាត់ ស្រុក/ខណ្ឌ ជាដើម។

សំណូរមួយទៀតសួរថា តើបើកូនបំណុលខ្ចីលុយមិនសង តើម្ចាស់បំណុលអាចប្ដឹងដាក់គុកបានដែរឬទេ?

តាមពិតទៅ ជាទូទៅបើនិយាយពីការជំពាក់ប្រាក់ ការចងការប្រាក់គឺជារឿងទាក់ទងនឹងក្រមរដ្ឋប្បវេណីដូច្នេះមិនដល់ថ្នាក់ប្ដឹងដាក់ពន្ធនាគារឡើយ។ ប៉ុន្ដែម្ចាស់បំណុលអាចប្ដឹងកូនបំណុលដាក់គុកបានលុះត្រាតែម្ចាស់បំណុលរកឃើញភស្ដុតាំងថាកូនបំណុលមានចេតនាបោកប្រាស ដូច្នេះម្ចាស់បំណុលអាចប្ដឹងកូនបំណុលពីបទមានចេតនាបោកប្រាស់ដែលចូលបទព្រហ្មទណ្ឌ ហើយបទព្រហ្មទណ្ឌនេះជាកម្រិតទោសដែលយើងហៅថាទោសទាន់ឈានដល់ការជាប់ពន្ធធនាគារ។

ឧទាហរណ៍ កូនបំណុលខ្ចីលុយមិនសង ហើយម្ចាស់បំណុលរកឃើញថាកូនបំណុលមានចេតនាបន្លំ មានចេតនាក្លែងឋានៈ ឬមានគំនិតទុច្ចរិកដើម្បីខ្ចីលុយឲ្យបាន នោះម្ចាស់បំណុលអាចប្ដឹងចោទប្រកាន់ពីបទបោកប្រាស់ចូលទោសព្រហ្មទណ្ឌ ហើយទោសសព្រហ្មទណ្ឌនេះ ម្ចាស់បំណុលអាចប្ដឹងកូនបំណុលដាក់គុកបាន។

គួរបញ្ជាក់ផងដែរ ជាទូទៅនៅប្រទេសកម្ពុជា បញ្ហាពាក់ព័ន្ធនឹងការខ្ចីលុយនេះគេច្រើនតែដោះស្រាយបណ្ដឹងតាមក្រមរដ្ឋប្បវេណីជាជាងតាមក្រមព្រហ្មទណ្ឌ។ ត្រង់នេះបើកូនបំណុលខ្ចីលុយមិនសង ម្ចាស់បំណុលប្ដឹងអាចទៅតុលាការ ដើម្បីទាមទារប្រាក់ដើម ទាមទារការប្រាក់ប្រសិនបើការខ្ចីមានភ្ជាប់ជាមួយការប្រាក់ ហើយម្ចាស់បំណុលក៏អាចទាមទារការប្រាក់យឺតយ៉ាវផងដែរ។

នៅក្នុងករណីម្ចាស់បំណុលបានឈ្នះក្ដី ម្ចាស់បំណុលអាចដាក់ពាក្យសុំឲ្យតុលាការរឹបអូសទ្រ​ព្យសម្បត្តិណាមួយរបស់កូនបំណុលដើម្បីលក់ឡៃឡុងហើយប្រាក់ដែលបានពីការលក់នោះយកមកសងម្ចាស់បំណុល៕