នៅវិមានសនិ្តភាពថ្ងៃទី២០ ខែកុម្ភៈ ឆ្នាំ២០២៥ សម្តេចមហាបរវធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានអនុញ្ញាតជូនបុគ្គលិកជាន់ខ្ពស់ដែលអ្នកជាគ្រប់គ្រងទីផ្សារនៃក្រុមហ៊ុន SpaceX របស់មហាសេដ្ឋី Elon Musk ចូលជួបសម្តែងការគួរសមនិងពិភាក្សាការងារ។
នៅក្នុងជំនួបទ្វេភាគី សម្តេចមហាបរវធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងនាយិកាទីផ្សារក្រុមហ៊ុន SpaceX - Starlink លោកស្រី Rebecca Hunter បានគូសបញ្ជាក់ថាកម្ពុជាគឺជាគោលដៅអាទិភាពខ្ពស់សម្រាប់ការវិនិយោគរបស់ក្រុមហ៊ុន នៅក្នុងឆ្នាំ២០២៥នេះ
បន្ថែមពីនោះលោកស្រីនាយិកាទីផ្សារ ក្រុមហ៊ុន SpaceX – Starlink ក៏បានបញ្ជាក់ជូនសម្តេចបវរធិបតីថា គណៈប្រតិភូរបស់លោកស្រីក៏នឹងមានជំនួបពិភាក្សាការងារជាមួយក្រសួង-ស្ថាប័នពាក់ព័ន្ធរបស់កម្ពុជា នៅក្នុងឱកាសនៃដំណើរទស្សនកិច្ចនេះផងដែរ។
ជាការឆ្លើយតប សម្ដេចបវរធីបតី ហ៊ុន ម៉ាណែត បានសម្ដែងនូវការស្វាគមន៍ចំពោះក្រុមហ៊ុនដែលបង្ហាញអំពីចំណាប់អារម្មណ៍ក្នុងការស្វែងរកឱកាសវិនិយោគ ក៏ដូចជាការផ្សារភ្ជាប់ទំនាក់ទំនងជាមួយកម្ពុជា។
សូមបញ្ជាក់ថា SpaceX គឺជាក្រុមហ៊ុនអវកាសឯកជនធំបំផុតមួយលើពិភពលោក បន្ទាប់ពីអង្គការ NASAដែលជារបស់រដ្ឋាភិបាលសហរដ្ឋអាមេរិក។ SpaceX គឺជាក្រុមហ៊ុនដែលបង្កើតឡើងក្នុងឆ្នាំ២០០២ ដោយមហាសេដ្ឋីលេខ១លើពិភពលោក Elon Musk សម្រាប់បង្កើតរ៉ុក្កែតនិងយានអវកាស។
ក្រុមហ៊ុននេះមានបេសសកម្ម ធ្វើឱ្យការហោះហើរទៅអវកាស ក្លាយជាទៅរឿងសាមញ្ញ និងមានតម្លៃសមរម្យ។ បន្ថែមពីនោះយោងតាមរបាយការណ៍របស់ Payload បានឱ្យដឹងថាប្រាក់ចំណូលរបស់ SpaceX បានកើនឡើង១៣.១ពាន់លានដុល្លារក្នុងឆ្នាំ ២០២៤ បើធៀបនឹងឆ្នាំ២០២៣ ដែលមានចំនួន ៨.៧ពាន់លានដុល្លារ។
នាពេលបច្ចុប្បន្នប្រភពចំណូលធំរបស់ SpaceX បានមកពី Starlink ដែលជាសេវាកម្មអ៊ីនធឺណេតផ្កាយរណបពង្រីកខ្លួននៅជុំវិញពិភពលោកប្រមាណ៧០ប្រទេស ជាមួយនឹងអ្នកបង់លុយប្រើអ៊ីនធឺណេតផ្កាយរណបនេះមានចំនួន២.២ លាននាក់ ដោយទទួលបានប្រាក់ចំណូលជាង៤ពាន់លានដុល្លារ ក្នុងឆ្នាំ២០២៣៕
អត្ថបទដោយ៖ ពីង ជូអេង
