កាលពីពេលថ្មីៗកន្លងទៅនេះក្រុមហ៊ុន Royal Railway Cambodia បានចុះអនុស្សារណៈជាមួយក្រុមហ៊ុន ៣ ទៀតរួមមាន៖ ក្រុមហ៊ុន Samaiden Energy (Cambodia)Co., Ltd, ក្រុមហ៊ុន Management Venture Asia(Cambodia) Ltd. និងក្រុមហ៊ុន Panna Energy Sdn. Bhd លើគម្រោងអភិវឌ្ឍដីដែលមិនទាន់ប្រើប្រាស់នៅតាមបណ្ដោយផ្លូវរថភ្លើងពីប៉ោយប៉ែតទៅខេត្ដព្រះសីហនុ។
តាមការបញ្ជាក់ពីក្រុមហ៊ុន Samaiden Group ការចុះអនុសារណៈនេះ មានគោលបំណងក្នុងការអភិវឌ្ឍន៍គម្រោងលើដីដែលមិនទាន់បានប្រើប្រាស់របស់ក្រុមហ៊ុន Royal Railway សម្រាប់ការអភិវឌ្ឍថាមពលកកើតឡើងវិញ និងសកម្មភាពសេដ្ឋកិច្ចប្រកបដោយនិរន្តរភាព។ ដោយក្នុងនោះនឹងមានការដំឡើងសូឡាខ្នាតតូច ឧបករណ៍ប្រើប្រាស់ ហេដ្ឋារចនាសម្ព័ន្ធសម្រាប់ជួល ដាំដើមឈើ ផ្ទះកញ្ចក់ ដាំបន្លែ សណ្តែកសៀង ជាដើម។
ថ្លែងនៅក្នុងពិធីខាងលើលោក Fong Yeng Foon នាយកប្រតិបត្តិក្រុមហ៊ុន Samaiden Energy បានបញ្ជាក់ថា៖ «សំខាន់ជាងនេះទៅទៀត គឺការសម្រេចបាននូវគម្រោងនេះ នឹងជួយទ្រទ្រង់សេដ្ឋកិច្ចដ៏ពិតប្រាកដ។ ការសិក្សាលទ្ធភាពដែលនឹងត្រូវអនុវត្តគឺមានសារៈសំខាន់សម្រាប់ការអភិវឌ្ឍសេដ្ឋកិច្ចកម្ពុជា។ ការអភិវឌ្ឍដីនៅតាមបណ្តោយផ្លូវរថភ្លើងនឹងជួយផលិតជាប្រភពថាមពលកកើតឡើងវិញ ហើយក៏នឹងជួយបញ្ជូនបច្ចេកវិទ្យាកសិកម្មប្រកបដោយនិរន្តរភាពផងដែរ»។
សូមជម្រាបផងដែរថា កំណាត់ផ្លូវរថភ្លើងពីក្រុងប៉ោយប៉ែតមកដល់ខេត្ដព្រះសីហនុ មានប្រវែងសរុប ៦៥២ គីឡូម៉ែត្រ ដោយក្នុងនោះផ្លូវរថភ្លើងពីប៉ោយប៉ែតមកភ្នំពេញ (ផ្លូវរថភ្លើងភាគខាងជើង) មានប្រវែង ៣៨៦ គីឡូម៉ែត្រ និងពីភ្នំពេញទៅខេត្ដព្រះសីហនុ (ផ្លូវរថភ្លើងភាគខាងត្បូង) មានប្រវែង ២៦៤ គីឡូម៉ែត្រ៕
អត្ថបទ៖ កឹម ប៊ុនធឿន
