ខេត្តកំពង់ស្ពឺជាខេត្តដែលនៅគៀករាជធានីភ្នំពេញ ខណៈខេត្តនេះកំពុងតែទាក់ទាញអ្នកវិនិយោគជាច្រើន  ក៏ព្រោះតែស្ថានភាពភូមិសាស្ត្រខេត្តកំពង់ស្ពឺ មានភាពអំណោយផល មានសក្តានុពលវិនិយោគច្រើន ទើបធ្វើឱ្យខេត្តនេះមានការរីកចម្រើនគួរឱ្យកត់សម្គាល់មិនថាវិស័យកសិកម្ម និងឧស្សាហកម្ម ដែលជួយគាំទ្រដល់សេដ្ឋកិច្ចជាតិ និងបានបង្កើតចំណូលជូនដល់ប្រជាពលរដ្ឋនៅទូទាំងខេត្តមានជីវភាពល្អប្រសើរមួយកម្រិតផងដែរ។ ដោយសារកត្ដាទាំងនេះហើយទើបធ្វើឱ្យតំបន់មួយចំនួននៃខេត្តកំពង់ស្ពឺកំពុងត្រូវប៉ាន់ជាពិសេសដីនៅតំបន់ក្បែរ ឧទ្យានជាតិគិរីរម្យ និងតំបន់ផ្លូវជាតិ ៤៤ និង ១០៩។

ថ្លែងប្រាប់ Business Cambodiaលោក សេន ណាក់ ជា អនុប្រធាន គណៈកម្មាធិការផ្សព្វផ្សាយ ពិគ្រោះយោបល់ អភិវឌ្ឍន៍ដីធ្លី និង សំណង់ និង ជា ប្រធានទីផ្សារ នៅ ក្រុមហ៊ុន លី សមស័ក្ត រៀល អ៊ីស្ទេត បានបង្ហើបពីតំបន់ដែលត្រូវប៉ាន់ជាងគេនៅខេត្តកំពង់ស្ពឺគឺ តំបន់ក្បែរ ឧទ្យានជាតិគិរីរម្យ ដែលជាតំបន់កំពុងលេចធ្លោ ផ្នែកអេកូទេសចរណ៍ កម្សាន្តបែបធម្មជាតិ និង តំបន់ផ្លូវជាតិ ៤៤ និង ១០៩ ដែលជាតំបន់   កសិទេសចរណ៍ និង ឧស្សាហកម្ម ៖

១. តំបន់ក្បែរ ឧទ្យានជាតិគិរីរម្យ

តំបន់នេះមានការផ្ទុះការចាប់អារម្មណ៍ដោយសារមានកន្លែងទេសចរណ៍ជាច្រើនដូចជា រម្យណីយដ្ឋានទឹកធ្លាក់ចំបក់  តំបន់ដីជ្រោះធម្មជាតិ  មជ្ឈមណ្ឌលព្រះពុទ្ធសាសនា  រម្យណីយដ្ឋានវីគិរីរម្យរីសត តំបន់ថ្មលយ ។ ឆ្លងកាត់វិបតិ្ត កូវីដ១៩ មនុស្សចាប់ផ្តើមស្រលាញ់ធម្មជាតិ និង ទេសភាពជាងមុន ។ ជាពិសេសអ្នកភ្នំពេញនាំគ្នាសម្រុកទៅទិញដីក្បែរជើងភ្នំ ដែលមានទេសភាពស្អាតលេខ១ ភាគច្រើនទិញទុកលំហែ និង ទុកចំណេញ ។

២.តំបន់ផ្លូវជាតិ ៤៤  និង ផ្លូវលេខ១០៩

តំបន់នេះមានសក្តានុពលល្អសម្រាប់ធ្វើរោងចក្រ និង ឧស្សាហកម្មផ្សេងៗ ដោយសារមានផ្លូវធំ ហើយត្រង់ ងាយស្រួលដឹកទំនិញទៅកំពង់ផែនៅកំពង់សោម កំពត និង ចែកចាយនៅភ្នំពេញ ។ តំបន់ផ្លូវ ១០៩ ជាតំបន់មានតម្លៃទាប ហើយមានទេសភាពភ្នំ  និង អូរ ស្អាតបែបធម្មជាតិ ។ អ្នកវិនិយោគមួយចំនួនទិញដើម្បីទុកចំណេញរយៈពេលយូរ ចំណាយដើមទុនតិច ហើយអាចលំហែ ឬ ដាំដំណាំហូបផ្លែបានដោយដីមានជីវជាតិល្អ ៕

អត្ថបទដោយ៖ ឌឿក​ ស្រីនុត