នៅថ្ងៃចន្ទទី២៣ ខែកញ្ញា ឆ្នាំ២០២៤នេះ តាមរយៈទីភ្នាក់ងារសារព័ត៌មាន CNA បានរាយការណ៍ថា មនុស្ស៦នាក់បានស្លាប់បន្ទាប់ពីមានភ្លៀងធ្លាក់ខ្លាំង បង្កជាទឹកជំនន់និងការបាក់ដីនៅក្នុងខេត្ត Ishikawa ដោយគេសង្ស័យថាព្រោះការងើបឡើងនៃគ្រោះរញ្ជួយដី។
ប្រភពដដែលបានឱ្យដឹងថាក្រៅពីការបាត់ខ្លួននិងស្លាប់មនុស្សចំនួន៦នាក់ ពេលនេះផ្ទះសរុបចំនួន ៤០០០ គ្រួសារត្រូវបានដាច់អគ្គិសនីនិងតំបន់ខ្លះត្រូវបានដាច់ផ្លូវ មានការរអិលបាក់ដីនិង ទឹកជំនន់លិចសឹងដល់ដំបូងផ្ទះ។
បច្ចុប្បន្ននេះបុគ្គលិកយោធាត្រូវបានបញ្ជូនជាបន្តបន្ទាប់ ទៅកាន់តំបន់ Ishikawa ដើម្បីចូលរួមជាមួយក្រុមអ្នកជួយសង្គ្រោះតាំងពីថ្ងៃសោរ៍ ខណៈអ្នករស់នៅក្នុងស្រុកនេះរាប់ម៉ឺននាក់ត្រូវបានជំរុញឱ្យជម្លៀសចេញ។
ក្នុងនោះអ្នកព្យាករណ៍របស់ JMA លោក Satoshi Sugimoto បានលើកឡើងកាលពីថ្ងៃសៅរ៍ថា "វាជាស្ថានភាពមួយដែលអ្នកត្រូវតែធានាសុវត្ថិភាពរបស់អ្នកជាបន្ទាន់" ។
ដូច្នេះសូមបងប្អូនប្រជាពលរដ្ឋទាំងអស់មេត្តាប្រុងប្រយ័ត្ននិងរក្សាសុវត្ថិភាពខណៈក្រសួងការងារកម្ពុជាក៏បានជូនដំណឹងដល់បងប្អូនខ្មែរដែលរស់នៅនិងធ្វើការក្នុងតំបន់ Ishikawa ឱ្យមានការប្រុងប្រយ័ត្នខ្ពស់បំផុត៕
អត្ថបទដោយ៖ ពីង ជូអេង