តារាជួរមុខដ៏ល្បីល្បាញរបស់កូរ៉េខាងត្បូងកញ្ញា Hwang So-hee ត្រូវបានគេស្គាល់ឈ្មោះហៅក្រៅ DJ Soda បានចូលរួមសម្ពោធវីដេអូបទចម្រៀង “ទេវរាជ(Devarāja देवराज)” កាលពីថ្ងៃយប់ថ្ងៃទី២៦ ខែឧសភា ដែលស្នាដៃវីដេអូនេះបានរំលេចទស្សនីយភាព វប្បធម៌និងអរិយធម៌ខ្មែរដ៏រុងរឿងរបស់ អ្នកនាង ទេព បូព្រឹក្ស និងក្រុមការងារ ក្រោមការគាំទ្រដោយក្រសួងវប្បធម៌និងវិចិត្រសិល្បៈ និងបណ្តាក្រុមហ៊ុនដៃគូសហការ។
ក្រោយការចូលរួមកម្មវិធីសម្ពោធស្នាដៃបទចម្រៀងថ្មីបែបប្រវត្តិសាស្ត្រខ្មែរដ៏ធំនេះ DJ Soda ក្នុងរូបភាពសម្លៀកបំពាក់ប្រពៃណីខ្មែរ បានធ្វើការបង្ហោះសារ ទៅកាន់អ្នកនាង ទេព បូព្រឹក្ស នៅលើគណនី Facebook Page ផ្ទាល់ខ្លួនដែលមានអ្នកតាមដាន១០លាននាក់ ដូច្នេះថា “ សូមចូលរួមអបអរសាទរដល់ម្ចាស់ក្សត្រី ទេព បូព្រឹក្ស ដែលចេញវីដេអូបទចម្រៀងថ្មី សូមជូនពរឱ្យអ្នកទទួលបានជោគជ័យគ្មានទីបញ្ចប់ ហើយខ្ញុំនឹងទន្ទឹងរង់ចាំស្តាប់បទដ៏អស្ចារ្យជាច្រើនទៀតពីអ្នក!”
យ៉ាងណាមិញចំពោះស្នាដៃបទចម្រៀងថ្មីបែបប្រវត្តិសាស្ត្រខ្មែរដ៏ធំមិនធ្លាប់មានរបស់អ្នកនាង ទេព បូព្រឹក្ស ដែលមានចំណងជើងថា “ទេវរាជ” នេះបានដាក់សម្ពោធជាផ្លូវការ កាលពីយប់ថ្ងៃទី២៦ ខែឧសភា ឆ្នាំ២០២៤ ដោយក្នុងនោះមានការចូលរួមពីសំណាក់សិល្បករខ្មែរ និងបរទេសជាច្រើនរូប រួមទាំងទស្សនិកជនរាប់ពាន់នាក់ ខណៈបទ “ទេវរាជ” គឺជាចម្រៀងមួយដែលរៀបរាប់ពីភាពរុងរឿងនៃអាណាចក្រខ្មែរ តាំងពីសម័យនគរភ្នំ រហូតដល់សម័យអង្គរ ដំណាលរៀបរាប់ពីក្បួនទ័ព ការធ្វើសឹកចម្បាំង អក្សរសាស្ត្រ អក្សរសិល្បិ៍ កេរ្តិ៍ដំណែលរបស់បុព្វបុរសខ្មែរជាច្រើនទៀត។
គួរជម្រាបផងដែរថាតារាជួរមុខកូរ៉េខាងត្បូង DJ Soda ត្រូវបានគេទទួលស្គាល់ថាជា DJ កូរ៉េស្រីវ័យក្មេង មានមុខមាត់គួរឲ្យស្រលាញ់ និងកំពុងទាញចំណាប់អារម្មណ៍យ៉ាងខ្លាំង ដោយសារសម្រស់ និងជំនាញក្នុងការ Mix ភ្លេងរបស់នាង។ DJ វ័យ៣៦ឆ្នាំរូបនេះ បានសម្តែងនៅតាមបណ្តាប្រទេសជាច្រើនជុំវិញពិភពលោកដូចជា បាងកក សេអ៊ូល ចាកាតា និងកម្ពុជាជាដើម៕
អត្ថបទដោយ៖ ពីង ជូអេង
