នេះជាឱកាសដ៏ល្អមួយសម្រាប់អ្នករកស៊ីឬម្ចាស់ក្រុមហ៊ុននៅក្នុងប្រទេសកម្ពុជា ខណៈនាពេលនេះស្ថានទូតសហរដ្ឋអាមេរិកកំពុងស្វែងរកអាជីវករឬក្រុមហ៊ុនដែលមានចំណាប់អារម្មណ៍ធ្វើធុរកិច្ចនាពេលអនាគតជាមួយស្ថានទូតលើការផ្គត់ផ្គង់ទំនិញ និង សេវាកម្មផ្សេងៗដល់ខ្លួន។

ជាក់ស្តែង បើយោងតាមការចុះផ្សាយដោយស្ថានទូតអាមេរិកបានឱ្យដឹងថា ចំពោះគោលបំណងដែលស្ថានទូតបង្កើតឱកាសនេះឡើងមក គឺដើម្បីចង់បង្កើនចំនួនអាជីវករ/ក្រុមហ៊ុនដែលយើងមាន ហើយក៏ចង់អញ្ជើញអាជីវករ/ក្រុមហ៊ុនដែលមិនធ្លាប់ធ្វើការជាមួយស្ថានទូត មកចូលរួមវេទិកានេះ ដើម្បីស្វែងយល់ពីឱកាសធុរកិច្ចជាមួយស្ថានទូត សហរដ្ឋអាមេរិក ទាក់ទងនឹងដំណើរការលទ្ធកម្មលើទំនិញ និងសេវាកម្ម ដែលស្ថានទូតទិញជាប្រចាំហើយនឹងមានកិច្ចសន្ទនាជាមួយអាជីវករដោយមានការធ្វើបទបង្ហាញជាភាសាអង់គ្លេស នឹងខ្មែរផងដែរ។

សម្រាប់ កាលបរិច្ឆេទ និងពេលវេលាគឺធ្វើឡើងនៅថ្ងៃទី២៥ ខែ មេសា ឆ្នាំ ២០២៤ ម៉ោង ១៥:០០ - ១៧:០០ រសៀល។ ទីកន្លែង៖ ពត៌មានទីកន្លែងនឹងជំរាបជូនដល់អ្នកចូលរួម៣ថ្ងៃមុនពេលកម្មវិធី។

ប៉ុន្តែសម្រាប់ អាជីវករដែលមានបំណងចូលរួមវេទិកានេះ សូមធ្វើការទាក់ទងមកការិយាល័យលទ្ធកម្មរបស់ស្ថានទូត សហរដ្ឋអាមេរិកតាមរយៈអ៊ីមែល PhnomPenhProcurement@state.gov អោយបានត្រឹមថ្ងៃទី ១៩ ែខ មេសា ឆ្នាំ ២០២៤ នេះ។

គួរជម្រាបថា ស្ថានទូតសហរដ្ឋអាមេរិកនៅទីក្រុងភ្នំពេញ ជាស្ថាប័នធ្វើប្រតិបត្តិការលទ្ធកម្មធំមួយ ដែលមានការបញ្ជាទិញ ប្រចាំឆ្នាំក្នុងតម្លៃប្រហែល ៥ លានដុល្លាអាមេរិក។