ស្រមៃដល់អារម្មណ៍គេងក្នុងវីឡាលើផ្ទៃសាគរដ៏ធំល្វឹងល្វើយ មនុស្សជាច្រើនពិតជាមិនភ្លេចគិតដល់កោះម៉ាល់ឌី ដែលស្ថិតនៅលើមហាសមុទ្រឥណ្ឌានោះទេ។ ដោយឡែកក្រៅពីមានទេសភាពដូចឋានសួគ៌ក្រោមមេឃផងនោះ យើងងាកមកស្គាល់មហាសេដ្ឋី៣រូប នៃប្រទេសដែនកោះមួយនេះ មានទ្រព្យសម្បត្តិពាន់លានដុល្លារ និងក្តោបក្តាប់ជំនួញគ្រាក់ទាំងប៉ុន្មាននេះ។
១.លោក Buruma Qasim ត្រូវបានគេស្គាល់ថាគឺជាមហាសេដ្ឋីកំពូលជំនួញរបស់ប្រទេសម៉ាល់ឌីវ ដែលមានទ្រព្យសម្បត្តិ១០.៩ លានដុល្លារ នេះបើយោងតាមការចុះផ្សាយរបស់គេហទំព័រ topmost10 ។ ក្នុងឆ្នាំ១៩៧៦គាត់បានចាប់ផ្តើមអាជីវកម្មជួញដូរទំនិញដូចជា អង្ករថ្នាំជក់ ប្រេងម៉ាស៊ូតនិងប្រេងកាតជាដើម។
ដោយមើលឃើញពីការរីកចម្រើនយ៉ាងឆាប់រហ័សរបស់ប្រទេសម៉ាល់ឌីវ រូបលោកបានសម្រេចចិត្តខ្ចីប្រាក់ពីធនាគារចំនួន២០០០$ ដើម្បីពង្រីកវិសាលភាពមុខជំនួញរហូតអាចក្លាយជាអាណាចក្រ Villa Group ដែលជា ក្រុមហ៊ុនចែកចាយផ្តាច់មុខមួយ នាំចូលប្រេងមានកប៉ាល់ដឹកជញ្ជូន សំណង់ ការផលិតឧស្ម័ន អភិវឌ្ឍន៍ទេសចរណ៍កោះម៉ាល់ឌីវ ជំនួញផលិតស៊ីម៉ងត៍ និងក្រុមហ៊ុនប្រព័ន្ធផ្សព្វផ្សាយ ។
២.លោក Hussain Afeef ជាមនុស្សទី១ដែលគេនឹកដល់ឈ្មោះពេលឃើញពីការអភិវឌ្ឍនៅរីសតម៉ាល់ឌីវ។
ជាក់ស្តែងលោកគឺជាស្ថាបនិកនិងប្រធានប្រតិបត្តិ ក្រុមហ៊ុន Crown ជាឧស្សាហកម្មមួយគ្រប់គ្រងរមណីយដ្ឋានដែលល្អស្រស់ដូចក្រមុំព្រហ្មចារីនេះ រួមមានដូចជា Conrad Maldives កោះ Rangali កោះ Veligandu និងការវិនិយោគលើបង្កើតភោជនីយដ្ឋានក្រោមសមុទ្រដំបូងគេរបស់ពិភពលោក និងត្រូវបានគេប៉ាន់ស្មានថាទ្រព្យសម្បត្តិសុទ្ធ របស់គាត់គឺមានចំនួន ៣.៧ ពាន់លានដុល្លារ។
៣.លោក Shuaib Shah មេធាវីមួយរូបសិ្ថតក្នុងចំណាមមហាសេដ្ឋីម៉ាល់ឌីវផងដែរ។ វិនិយោគិនរូបនេះបានដើរតួយ៉ាងសំខាន់ក្នុង រៀបចំរចនាសម័្ពន្ធលើកោះម៉ាល់ឌីវ ប្រតិបត្តិការធនាគារដែលមានតម្លៃរាប់សិបលានដុល្លារ គម្រោងហិរញ្ញាវត្ថុ លក់ចេញទិញចូល សណ្ឋាគាររមណីយដ្ឋាន ថែមទាំងជាអ្នកផ្តល់ហិរញ្ញប្បទានដល់ រមណីយដ្ឋានប្រណីតៗលំដាប់ពិភពលោក និងម្ចាស់ក្រុមហ៊ុនអាកាសចរណ៍ប្រតិបត្តិករផ្សេងៗ ដែលទ្រព្យសម្បត្តិរបស់លោកត្រូវបានគេប៉ាន់ស្មានថាមានចំនួន ៦៥០លានដុល្លារ។
គួរជម្រាបផងដែរថាសាធារណរដ្ឋម៉ាល់ឌីវ គឺជាប្រទេសដែនកោះឯករាជ្យមួយដែលធ្លាប់ទទួលរងអាណានិគមពីប្រទេសអង់គ្លេស និងទទួលបានឯករាជ្យពេញលេញនាឆ្នាំ១៩៦៥ ហើយគឺជាប្រទេសមួយដែលអភិវឌ្ឍន៍ពីប្រទេសក្រីក្របំផុតក្លាយជាប្រទេសដែលមានប្រាក់ចំណូលមធ្យមបានយ៉ាងឆាប់រហ័ស ដោយភាគច្រើននៃប្រភពចំណូលនោះគឺបានមកវិស័យជលផល និងវិស័យទេសចរណ៍៕
អត្ថបទដោយ៖ ពីង ជូអេង
