ក្រុមហ៊ុន វីរៈ ប៊ុនថាំ បន្ទាប់ពីជោគជ័យលើវិស័យដឹកជញ្ចូនទាំងផ្លូវគោក ផ្លូវទឹក ពេលនេះអ្នកឧកញ៉ា សូរ វីរៈ ទំនងជាចាប់យករបរផ្លូវអាកាសមួយទៀត ខណៈអ្នកជំនួញដ៏លេចធ្លោនៅកម្ពុជារូបនេះ ក៏កំពុងធ្វើអាជីកម្មគ្រាក់ៗជាច្រើនផ្នែកមធ្យាបាយដឹកជញ្ជូន នៅទូទាំងប្រទេសកម្ពុជា ថៃ និងវៀតណាម។
យ៉ាងណាមិញតាមរយៈការបង្ហោះនៅលើគេហទំព័រផ្ទាល់ខ្លួនរបស់អ្នកឧកញ្ញ៉ា នៅថ្ងៃទី២០ ខែកញ្ញា ឆ្នាំ២០២៤ ដោយភ្ជាប់ជាមួយរូបភាពយន្តហោះ បានសរសេររៀបរាប់យ៉ាងដូច្នេះថា “ការតាំងពិពណ៌យន្តហោះ VET Airways នៅប្រទេសម៉ាឡេស៊ី ជួបគ្នាឆាប់ៗនៅប្រទេសកម្ពុជា”។ ខណៈសារនេះទំនងជាចង់ បញ្ជាក់ថាក្រុមហ៊ុន វីរៈ ប៊ុនថាំ នឹងមានសេវាកម្មមួយទៀតលើផ្លូវអាកាស។
ដោយឡែកបើរំលឹកទៅដល់ឆ្នាំ២០២៣ អំឡុងខែតុលា អ្នកឧកញ្ញ៉ា សូរ វីរៈ ម្ចាស់ក្រុមហ៊ុន វីរៈ ប៊ុនថាំ ក៏បានប្រកាសបើកដំណើរការនូវរមណីយដ្ឋាន ដែលកែច្នៃចេញពីរថយន្តក្រុងចាស់ៗ ឱ្យក្លាយទៅជាបន្ទប់គេងបែបទំនើបក្នុងឡាន ដែលមានឈ្មោះថា Hotel Bus ដំបូងគេបង្អស់ក្នុងស្រុកខ្មែរនិងតំបន់អាស៊ី នៅឧទ្យានបោះតង់គីរីរម្យ នាខេត្តកំពង់ស្ពឺផងដែរ៕
អត្ថបទដោយ៖ ពីង ជូអេង