ដើម្បីក្លាយជាមេឆ្នើម មិនមែនគ្រាន់តែនិយាយច្រើនតែគ្មានសកម្មភាព ហើយក៏មិនមែនមានតែសកម្មភាពដោយមិនមានការនិយាយពាក្យល្អៗដែរ។ ប៉ុន្តែផ្អែកតាមហេតុផលចំនួន៤នេះរបស់ទស្សនាវដ្តី Forbes បានឱ្យដឹងថាមនុស្ស Introvert ដែលមិនសូវចេះនិយាយស្តី នឹងអាចក្លាយជាមេដឹកនាំឆ្នើមបាន៖
១. ដឹកនាំដោយឧទាហរណ៍៖ មនុស្ស Introvert ប្រហែលមិនមែនជាមេដឹកនាំ ដែលពូកែបញ្ចេញសុន្ទរកថាឱ្យគេរំជើបរំជួល ឬពូកែនិយាយហើយមិនធ្វើនោះទេ។ ប៉ុន្តែពួកគេតែងតែជាមេដែលដឹកនាំ តាមរយៈសកម្មភាពប្រចាំថ្ងៃរបស់គាត់ឱ្យមានភាពជាប់លាប់ ដើម្បីបង្កើតនូវទំនុកចិត្តឱ្យក្រុមការងារថាគាត់កំពុងធ្វើអ្វីនិងបានធ្វើអ្វីខ្លះ។
២. ជាអ្នកពូកែចរចារ១ទល់១៖ នៅក្នុងព្រឹត្តិការណ៍ឬទីតាំងដែលមានមនុស្សច្រើន ប្រភេទមនុស្ស Introvert អាចជាមេដែលខ្សោយក្នុងការចរចារ។ ប៉ុន្តែនៅក្នុងរង្វង់តូច និងការចរចារមួយទល់មួយ មេប្រភេទនេះនឹងអាចបង្កើនភាពស្និទ្ធស្នាល មានទំនាក់ទំនងស៊ីជម្រៅនិងរឹងមាំ១ដឹង១។
៣. ជាអ្នកគិតយុទ្ធសាស្ត្រ៖ មនុស្ស Introvert ជាគឺជាមនុស្សដែលស្ងប់ស្ងាត់ មិនសូវនិយាយស្តី ប៉ុន្តែពូកែគិតនិងមានគំនិតផ្តួចផ្តើមចូលចិត្តសង្កេតមើលនិងវិភាគច្បាស់លាស់មុននឹងធ្វើអ្វីមួយ។ ដូច្នេះហើយមេដែលមានអត្តចរិត Introvert តែងតែជាមនុស្សដែលមានការសម្រេចចិត្ត និងគិតគូរបានល្អន់ល្អិតក្នុងក្រុមហ៊ុនឬអាជីវកម្ម។
៤. មានម្ចាស់ការលើខ្លួនឯងខ្លាំង៖ ជាមនុស្សដែលមិនត្រូវការការលើកទឹកចិត្តពីខាងក្រៅថេរ ដូច្នេះហើយមនុស្ស introvert នេះតែងតែជាមនុស្សមានម្ចាស់ការលើខ្លួនឯងខ្លាំង។ ហេតុនេះមេដែលមានអត្តចរិត Introvert តែងតែអាចសម្រេចកិច្ចការធំ មិនងាយទន់ខ្សោយឬត្រូវជំរុញចិត្តពីកត្តាខាងក្រៅនោះទេ។
ជាក់ស្តែងសូម្បីតែក្រុមមហាសេដ្ឋី អ្នកដឹកនាំល្បីៗ ក៏ចូលចិត្តចំណាយពេលរស់នៅម្នាក់ឯងច្រើនជាងធម្មតា ព្រោះពួកគេត្រូវផ្តោតលើ ការស្វែងរកដំណោះស្រាយចំពោះរាល់បញ្ហាដែលកំពុងប្រឈម និងអភិវឌ្ឍខ្លួនឯងឲ្យកាន់តែមានភាពឆ្លាតវៃ។
យ៉ាងណាមិញការចូលចិត្តនៅម្នាក់ឯង ពុំមែនជារឿងអាក្រក់ទេ ត្បិតតាមការស្រាវជ្រាវរបស់ Medium មានមហាសេដ្ឋី ៩៨% ជុំវិញពិភពលោកជាប្រភេទមនុស្ស Introvert៕
អត្ថបទដោយ៖ ពីង ជូអេង