គណបក្សមួយក្នុងប្រទេសជប៉ុន បានប្រកាសថា ខ្លួននឹងយកបញ្ញាសិប្បនិម្មិត (AI) ធ្វើជាថ្នាក់ដឹកនាំថ្មី ជំនួសមនុស្ស ក្រោយបរាជ័យក្នុងការបោះឆ្នោត។ នេះបើយោងតាមទីភ្នាក់ងារសារព័ត៌មាន The Japan Times ចេញផ្សាយនាថ្ងៃទី ១៦ ខែកញ្ញា ឆ្នាំ២០២៥។

គណបក្សខាងលើមានឈ្មោះថា “មាគ៌ាឆ្ពោះទៅកាន់ការកើតឡើងវិញ” (Path to Rebirth) ដែលមានលោក Shinji Ishimaru ជាស្ថាបនិក ខណៈលោកធ្លាប់ជាអតីតអភិបាលទីក្រុងតូចមួយនៅភាគខាងលិចប្រទេសជប៉ុន។ ប៉ុន្តែក្រោយការបោះឆ្នោតមិនទទួលបានជោគជ័យនៅថ្ងៃទី ២០ ខែសីហានេះ លោកក៏សម្រេចចិត្តដើរចេញពីតួនាទីក្នុងបក្សតែម្តង។

ស្របពេលជាមួយគ្នានេះ លោក Koki Okumura ដែលបានអះអាងថាខ្លួនជាជំនួយការប្រធាន បានលើកឡើងនៅក្នុងសន្និសីទសារព័ត៌មានថា បញ្ញាសិប្បនិម្មិត (AI) នឹងក្លាយជាមេដឹកនាំថ្មី។ ក្នុងនោះ AI នឹងមិនបញ្ជាទាំងស្រុងលើសកម្មភាពនយោបាយទេ ប៉ុន្តែវានឹងត្រូវប្រើសម្រាប់ការបែងចែកធនធានក្នុងគណបក្ស, សម្រេចចិត្តផ្ទៃក្នុងដែលអាចប្រើទិន្នន័យ និងវិភាគជាដើម៕

អត្ថបទដោយ៖ កាន់ ដារ៉ា (ស្មេរពនេចរ) សៀវភៅ «ច្រវាក់ប្រាក់ខែ» (កសាងក្ដីស្រមៃនៅកន្លែងការងារ ចេះបង្កើតចំណូលច្រើនប្រភព) តម្លៃពិសេសត្រឹម ១២$ ប៉ុណ្ណោះ។ បញ្ជាទិញតាម    https://t.me/BusinessCambodiaBook