រាជរដ្ឋាភិបាលកម្ពុជា និងរដ្ឋាភិបាលសាធារណរដ្ឋប្រជាមានិតចិន បានព្រមព្រៀងរួមគ្នាលើកិច្ចសហការដើម្បីអភិវឌ្ឍលើច្រក របៀងមច្ឆា និងអង្ករ ដែលស្ថិតនៅភាគពាយ័ព្យ នៃប្រទេសកម្ពុជា និងនៅតំបន់បឹងទន្លេសាប អភិវឌ្ឍកសិកម្មអេកូឡូស៊ីទំនើបនៅក្បែរបឹងទន្លេសាប។ ខណៈកិច្ចសហការនេះធ្វើឡើងដើម្បីបង្កើន និងពង្រីកទំហំពាណិជ្ជកម្ម ជាពិសេសផលិតផលកសិផល។
ជាក់ស្ដែង កាលពីពេលកន្លងទៅថ្មីៗនេះឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានដឹកនាំកិច្ចប្រជុំពិភាក្សាស្តីពី «សេចក្តីព្រាងផែនការកិច្ចសហប្រតិបត្តិការរវាងរាជរដ្ឋាភិបាលកម្ពុជា និងរដ្ឋាភិបាលសាធារណរដ្ឋប្រជាមានិតចិនស្តីពីការអភិវឌ្ឍរួមគ្នាក្នុងកិច្ចសហប្រតិបត្តិការ ច្រករបៀងមច្ឆា និងអង្ករ» ផងដែរនៅទីស្តីការក្រសួង។
យោងតាមការដកស្រង់ពីក្រសួងព័ត៌មាននៅថ្ងៃទី២០ ខែកញ្ញា ឆ្នាំ២០២៤ ឯកឧត្តម ឃឹម ហ្វីណង់ អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានបញ្ជាក់ថា៖ សេចក្តីព្រាងផែនការកិច្ចសហប្រតិបត្តិការនេះ កំពុងស្ថិតនៅក្នុងដំណាក់កាលព្រាងនៅឡើយ ហើយនឹងបន្តធ្វើការបន្ថែមទៀត។ ឯកឧត្ដមពន្យល់ថា «ច្រករបៀងមច្ឆា និងអង្ករ នឹងបើកច្រកថ្មីសម្រាប់ទីផ្សារកសិផលកម្ពុជាទៅប្រទេសចិន បើទោះបីជាទើបតែចាប់ផ្តើម និងត្រូវប្រើពេលបន្តិចទៀតទើបអាចឃើញលទ្ធផលក៏ដោយ តែនេះគឺជាវឌ្ឍនភាពថ្មីប្រកបដោយសក្តានុពលមួយទៀតសម្រាប់វិស័យកសិកម្មនៅកម្ពុជា និងសម្រាប់ពុកម៉ែបងប្អូនកសិករខ្មែរទាំងអស់គ្នា»។
សូមជម្រាបថា កម្ពុជាមានខេត្តចំនួន៤ នៅប៉ែកពាយ័ព្យដូចជា៖ ខេត្តបាត់ដំបង បន្ទាយមានជ័យ ពោធិ៍សាត់ និងខេត្តប៉ៃលិន ដែលជាជង្រុកនៃកសិកផលយុទ្ធសាស្ត្របម្រើឱ្យទាំងតម្រូវការសន្តិសុខស្បៀងនៅក្នុងស្រុក និងការនាំចេញទៅកាន់ទីផ្សារនៅលើពិភពលោក។ តំបន់ទាំងនេះត្រូវបានចាត់ទុកថាជាប៉ូលសេដ្ឋកិច្ចទី៤នៃកម្ពុជា ដែលជាប៉ូលកសិកម្ម និងជាផ្នែកមួយនៃគំនិតផ្តួចផ្តើម«ច្រករបៀងមច្ឆានិងអង្ករ»។
ក្នុងចំណោមខេត្តទាំង៤នេះមានខេត្តចំនួន២នៅជាប់នឹងបឹងទន្លេសាប គឺខេត្តបាត់ដំបង និងខេត្តពោធិសាត់។យ៉ាងហោចណាស់មួយភាគបី(៣៤,៥%)នៃកសិកម្មកម្ពុជាទាំងមូលត្រូវបានផលិតចេញពីខេត្តទាំង៤នេះ ក្នុងនោះ ៩៧%នៃផ្លែក្រូច, ៩០%នៃផ្លែមៀន ,៧៦% នៃដំណាំពោត សុទ្ធតែចេញពីតំបន់នេះ។ ជាងមួយភាគបួននៃដំណាំស្រូវ ផ្លែទុរេន និងផ្លែប៊័រ ក៏ត្រូវបាននាំចេញពីទីនេះ៕