បញ្ហាសម្ពាធផ្លូវចិត្តនៅកន្លែងការងារដូចជា បុគ្គលិកមានអារម្មណ៍ហត់នឿយ អស់កម្លាំង អស់សង្ឃឹម មានគំនិតគិតចង់លាឈប់ជាដើម គឺទាមទារឲ្យអ្នកដឹកនាំយកចិត្តទុកដាក់ឲ្យខ្លាំងបន្តិច បើមិនដូច្នេះទេ ប្រសិទ្ធភាពការងារនឹងទទួលរងផលប៉ះពាល់ជាពុំខាន។ ខាងក្រោមនេះ គឺជារឿងធំៗ៥ ដែលថ្នាក់ដឹកនាំត្រូវប្រញាប់ធ្វើភ្លាម ពេលបុគ្គលិកស្ថិតក្នុងស្ថានភាពខាងលើ៖
១/. បើកកិច្ចប្រជុំជជែកពីបញ្ហារបស់បុគ្គលិក
ក្នុងនាមជាអ្នកគ្រប់គ្រងម្នាក់ វាជារឿងសំខាន់ដែលអ្នកត្រូវយកចិត្តទុកដាក់បុគ្គលិកក្រោមបង្គាប់។ អ្នកអាចបើកកិច្ចប្រជុំជជែកដេញដោរវែកញែកជុំវិញបញ្ហាដែលពួកគេកំពុងជួបប្រឈម ស្តាប់សង្កេតឲ្យបានម៉ត់ចត់តាមដែលអ្នកអាចធ្វើបាន នៅពេលដែលពួកគេលើកឡើងពីបន្ទុកការងាររបស់ខ្លួន។
បន្ទាប់ពីកិច្ចប្រជុំ អ្នកត្រូវតាមដានសកម្មភាពរបស់បុគ្គលិក តើពួកគេមានអារម្មណ៍តានតឹង ធុញថប់ បង្ហាញកាយវិការព្រួយបារម្ភចំពោះគម្រោងការងារ ឬមានអាកប្បកិរិយាផ្លាស់ប្ដូរដែរឬទេ? បើបញ្ហាទាំងនេះបានកើតឡើងខុសប្លែកពីធម្មតា អ្នកគួរចូលទៅសន្ទនា និងជជែកពិភាក្សាជាមួយពួកគេបែបឯកជនដើម្បីឲ្យពួកគេកាន់តែបើកចិត្តបង្ហាញអារម្មណ៍ពិត និងលើកឡើងពីបញ្ហាច្បាស់លាស់ស៊ីជម្រៅជាងមុន ហើយអ្នកអាចប្រឹក្សាយោបល់ដោយផ្ទាល់បាន។
២/. ព្យាយាមបង្កើនភាពស្និទ្ធស្នាល
បើទោះបីអ្នកមានតំណែងខ្ពស់ និងប្រាក់ខែច្រើនជាងបុគ្គលិកក្រោមបង្គាប់ក្តី ប៉ុន្តែមិនត្រូវបង្ហាញពីរនាំង
វណ្ណៈខ្លាំងពេកនៅកន្លែងការងារឡើយ ព្រោះវានាំឲ្យខ្វះភាពជិតស្និតជាមួយបុគ្គលិក។ ការបង្កើនភាពជិតស្និត គឺពិតជាសំខាន់ខ្លាំងណាស់ព្រោះការធ្វើបែបនេះអាចជួយឲ្យពួកគេយល់ឃើញថា អ្នកគឺជាថ្នាក់ដឹកនាំល្អ មិនប្រកាន់ខ្លួន និងចេះរួមសុខទុក្ខជាមួយពួកគេ។ ដូច្នេះហើយក្រុមបុគ្គលិកនឹងមានអារម្មណ៍កក់ក្តៅ ហើយក៏ព្យាយាមធ្វើការអស់ពីសមត្ថភាពផងដែរ។
៣/. សរសើរនៅពេលធ្វើបានល្អ និងណែនាំត្រឹមត្រូវនៅពេលមានកំហុស
នៅពេលបុគ្គលិកសាងស្នាដៃ អ្នកគ្រប់គ្រងត្រូវចេះលើកទឹកចិត្តតាមរយៈពាក្យកោតសរសើរ ឬ ផ្តល់រង្វាន់ជាដើម។ រីឯបុគ្គលិកសាងកំហុស ក៏មិនគួរស្តីបន្ទោសខ្លាំងនៅចំពោះមុខអ្នកដទៃឡើយ ព្រោះការធ្វើបែបនេះមិនអាចកែប្រែអ្វីបានទេ ថែមទាំងរុញស្ថានភាពកាន់តែស្មុគស្មាញ។ ជម្រើសដ៏ល្អគឺគួរហៅបុគ្គលិកដែលធ្វើខុសនោះមកនិយាយគ្នាតទល់ ហើយព្យាយាមប្រាប់អំពីកំហុសដែលពួកគេបានសាង និង ប្រាប់អំពីវិធីដែលការពារកុំឲ្យដើរជាន់ដានផ្លូវចាស់ទៀត។
៤/. ផ្តល់ការបណ្តុះបណ្តាលដល់ពួកគេ
ក្នុងនាមជាអ្នកគ្រប់គ្រងម្នាក់ អ្នកត្រូវធ្វើឲ្យបុគ្គលិកមានសមត្ថភាពកាន់តែខ្លាំងឡើង។ សូមចាំថា ក្រៅពីការបណ្តុះបណ្តាលទាក់ទងទៅនឹងចំណេះដឹងថ្មីៗជុំវិញការងាររបស់ពួកគេ អ្នកក៏ត្រូវបណ្តុះបណ្តាលពួកគេពីរបៀបគ្រប់គ្រងស្តេ្រស ការគ្រប់គ្រងពេលវេលា និងការដោះស្រាយបញ្ហាជាដើមដើម្បីបង្ការក៏ដូចជាកាត់បន្ថយភាពតានតឹងផ្លូវចិត្តរបស់ពួកគេ។
៥/.ផ្តល់រង្វាន់
ក្រៅពីប្រាក់ខែ ថ្នាក់ដឹកនាំត្រូវចេះផ្តល់រង្វាន់លើកទឹកចិត្តបុគ្គលិក។ ពេលខ្លះបុគ្គលិកបានខិតខំប្រឹងប្រែងការងារខ្លាំងហើយ ប៉ុន្តែបើអ្នកមើលរំលងសមត្ថភាព និងការខិតខំប្រឹងប្រែងរបស់ពួកគេ មិនឲ្យតម្លៃ ឬលើកទឹកចិត្តពួកគេ វាអាចបណ្តាលឲ្យបុគ្គលិករបស់អ្នកមានអារម្មណ៍មិនកក់ក្តៅ និងខកចិត្តជាដើម។ ការផ្តល់រង្វាន់នេះអាចជារបស់ ការកោតសរសើរ ឬដំឡើងប្រាក់ខែជាដើម វានឹងធ្វើឲ្យពួកគេមានទឹកចិត្តកាន់តែខ្លាំងឡើងក្នុងការបំពេញការងារ។
យ៉ាងណាមិញ បញ្ហាជាច្រើនរយលានជំពូក មិនថាបញ្ហាស្តេ្រស ឬសម្ពាធផ្លូវចិត្ត គឺជារឿងធម្មតាសម្រាប់មនុស្សម្នាក់ៗ ហើយវាបានកើតឡើងស្ទើរគ្រប់ទីកន្លែងទាំងអស់មិនថានៅកន្លែងការងារ ឬនៅក្នុងជីវិតប្រចាំថ្ងៃនោះទេ។ ម្ល៉ោះហើយក្នុងនាមជាមេដឹកនាំម្នាក់ ការមើលថែសុខភាពផ្លូវចិត្តរបស់បុគ្គលិកគឺជាអទិភាពមួយ បើអ្នកប្រងើយកន្តើយវានឹងក្លាយទៅជាជំងឺមហារីកមិនខាន៕
អត្ថបទដោយ៖ កាន់ ដារ៉ា (ស្មេរពនេចរ) ម្ចាស់ស្នាដៃសៀវភៅ «ច្រវាក់ប្រាក់ខែ»
ចែករំលែកគំនិត ឬផ្សព្វផ្សាយអាជីវកម្មអ្នកទីនេះ សូមទំនាក់ទំនង ០៩៦ ៤៩៩ ៧៣ ៦៦
