នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម (Anwar Ibrahim) បាននិយាយនៅថ្ងៃព្រហ្មស្បត្ដិ៍ ទី៣១ ខែកក្កដា ឆ្នាំ២០២៥ នេះថា ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) នឹងចូលរួមកិច្ចប្រជុំកំពូលដ៏សំខាន់នៃប្រជាជាតិអាស៊ីអាគ្នេយ៍ក្នុងខែតុលាខាងមុខ។ នេះបើយោងតាមការចេញផ្សាយដោយសារព័ត៌មាន The Korea Time។
ថ្លែងទៅកាន់សភាម៉ាឡេស៊ី លោក Anwar បាននិយាយយ៉ាងដូច្នេះថា "ខ្ញុំមានឱកាសនិយាយជាមួយប្រធានាធិបតីសហរដ្ឋអាមេរិក Donald Trump ។ គាត់បានបញ្ជាក់ថាគាត់នឹងចូលរួមកិច្ចប្រជុំកំពូលអាស៊ានលើកទី ៤៧ នៅខែតុលា"។
លោក Anwar ក៏បានប្រាប់សមាជិកសភាដែរថា សម្រាប់កិច្ចព្រមព្រៀងពន្ធគយរវាងម៉ាឡេស៊ីជាមួយទីក្រុងវ៉ាស៊ីនតោន ត្រូវបានគេរំពឹងថានឹងត្រូវបានប្រកាសនៅថ្ងៃសុក្រខាងមុខនេះផងដែរ។
សូមជម្រាបថា កិច្ចប្រជុំកំពូលអាស៊ានលើកទី៤៧ គ្រោងនឹងប្រព្រឹត្តទៅរយៈពេល ៣ ថ្ងៃ គឺចាប់ពីថ្ងៃទី ២៦ ដល់ថ្ងៃទី ២៨ ខែតុលា ខាងមុខ។ កិច្ចប្រជុំនៃសមាគមប្រជាជាតិអាស៊ីអាគ្នេយ៍ត្រូវបានគេរំពឹងថានឹងក្លាយជាកិច្ចប្រជុំដ៏ធំបំផុតដែលមិនធ្លាប់មាន។
ក្រៅពីសហរដ្ឋអាមេរិក កិច្ចប្រជុំរយៈពេល 3 ថ្ងៃនេះ ក៏ត្រូវបានគេរំពឹងថានឹងមានការចូលរួមពីមន្ត្រីកំពូលមកពីប្រទេសចិន ជប៉ុន កូរ៉េខាងត្បូង និងឥណ្ឌា ព្រមទាំងប្រមុខរដ្ឋនៃប្រជាជាតិអាស៊ានផងដែរ៕
