Steve Jobs គឺជាស្ថាបនិកក្រុមហ៊ុន Apple ដែលជាក្រុមហ៊ុនផលិតគ្រឿងអេឡិចត្រូឡិច មានទូរស័ព្ទ និងកុំព្យូទ័រឈានមុខគេនៅលើពិភពលោក ។ Steve បានទទួលមរណៈភាពនៅ ថ្ងៃទី០៥ ខែតុលា ឆ្នាំ២០១១ ។
មុននឹងស្លាប់ Steve Jobs បានបន្សល់ទុកពាក្យបណ្តាំ ក៏ដូចជាមេរៀនជាច្រើនសម្រាប់អ្នកជំនាន់ក្រោយ ។ ជាមួយនឹងបទពិសោធន៍ក្នុងការបង្កើតក៏ដូចជាការគ្រប់គ្រងអាជីវកម្មយ៉ាងជោគជាំអស់រយៈពេលជាច្រើនឆ្នាំ មុនពេលដែលលោកទទួលអនិច្ចកម្ម លោកបានថ្លែងក្នុងបទសម្ភាន៍មួយនាពេលកន្លងទៅថា៖ «ប្រសិនបើអ្នកចាប់ផ្តើមអាជីវកម្មព្រោះតែលុយ អ្នកគ្មានថ្ងៃស្គាល់ពាក្យថាជោគជ័យឡើយ ព្រោះការធ្វើអាជីវកម្មពិតជាលំបាកខ្លាំងណាស់ បើអ្នកពុំមានមូលហេតុរឹងមាំដើម្បីលើកទឹកចិត្តខ្លួនឯងទេ អ្នកនឹងបរាជ័យមិនខាន»។ ស្ថាបនិកក្រុមហ៊ុនបច្ចេកវិទ្យាយក្ស Apple រូបនេះបានបន្ថែមទៀតថា៖ «មនុស្សដែលមានកម្រិតអាចទទួលបានភាពជោគជ័យខ្ពស់ ភាគច្រើនពួកគេមិនមានក្តីស្រមៃចង់បើកក្រុមហ៊ុននោះទេ ប៉ុន្តែពួកគេចង់បង្ហាញគំនិតរបស់ពួកគេទៅកាន់ពិភពលោក»។
យ៉ាងណាមិញ លោកក៏បានលើកទឹកចិត្តឲ្យមនុស្សគ្រប់គ្នាត្រូវយកចិត្តទុកដាក់ មើលថែរក្សា ការពារ សុខភាពរាងកាយឱ្យបានល្អ ឱ្យបានស្មើរនិងការស្រឡាញ់ការងារ ឬមុខរបរ។ ប្រសិនបើអ្នកមិនយកចិត្តទុកដាក់មើលថែសុខភាពទេនោះ អ្នកនឹងស្លាប់ចោលគោលដៅ និងក្តីស្រមៃជាក់ជាមិនខាន។
ក្នុនោះលោក Steve Jobs បង្ហាញឱ្យអ្នកឃើញថា សុខភាពមានតម្លៃជាងទ្រព្យសម្បត្តិរាប់លានដង។ ទោះបីជា Steve ជាមហាសេដ្ឋីមានលុយចាយមិនអស់ ក៏មិនអាចជួយបានដែរប្រសិនបើបណ្តោយសុខភាពឱ្យធ្លាក់ទ្រុតទ្រោម ធ្លាក់ខ្លួនឈឺធ្ងន់ធ្ងរ គឺមិនអាចជួយសង្គ្រោះបានឡើយ ។
គួរជម្រាបផងដែរថា Steve Jobs បានដឹងថា ខ្លួនមានជម្ងឺមហារីកលំពែងតាំងពីឆ្នាំ២០០៣ ប៉ុន្តែទើបសម្រេចចិត្តធ្វើការវះកាត់នៅឆ្នាំ២០០៤។ ឆ្នាំ២០០៧ ក្នុងរូបរាងកាយដ៏ស្គម ដោយសារជម្ងឺ Steve Jobs នៅខំប្រឹងបង្ហាញខ្លួនជាសាធារណៈ ដើម្បីសម្ពោធដាក់លក់ Iphone។ ស្ថានភាពជម្ងឺរបស់ Steve Jobs កាន់តែដុនដាប រហូតធ្វើឲ្យលោកលាចេញពីតំណែងប្រធានAppleនៅដើមឆ្នាំ២០១១។ លើកចុងក្រោយដែលគេឃើញលោកចេញមុខជាសាធារណៈ គឺនៅពេលលោកឡើងបង្ហាញពីលទ្ធផលនៃគំនិតបង្កើតថ្មី របស់ខ្លួនមួយទៀតគឺ ម៉ាស៊ីន Ipad 2។
Steve Jobs ខុសពីមហាសេដ្ឋីដទៃទៀត ដោយលោកពុំមានទ្រព្យសម្បត្តិជាប់ខ្លួនច្រើនទេ។ ប្រាក់ចំណេញទាំងអស់ (៨,៣ពាន់លានដុល្លារ)ត្រូវលោកដាក់ចូលទៅក្នុងការវិនិយោគ និងភាគហ៊ុនរបស់Appleគ្មានសល់។
Steve Jobs ជាមនុស្សម្នាក់ដ៏កម្រ គឺជឿតែលើសមត្ថភាពរបស់ខ្លួនឯងប៉ុណ្ណោះ និងមានអធ្យាស្រ័យតិចតួចណាស់ ទៅលើអ្នកណាដែលមិនយល់ស្របជាមួយគាត់។ សមត្ថភាពដ៏អំណោយផលមិនអាចប្រកែកបានរបស់គាត់ គឺអាចមើលទាយដឹងមុនពីទីផ្សារ និង មានចក្ខុវិស័យខុសពីអ្នកដទៃ គាត់មានកែវភ្នែក ចេះមើលឃើញផលិតផលបង្កើតថ្មី ដែលអាចទាក់ទាញចំណូលចិត្តរបស់អតិថិជនបានយ៉ាងច្បាស់៕
អត្ថបទដោយ៖ កាន់ ដារ៉ា (ស្មេរពនេចរ) ម្ចាស់ស្នាដៃសៀវភៅ «ច្រវាក់ប្រាក់ខែ»
ទំនាក់ទំនងតាមរយៈ៖ Facebook Page: Kan Dara ឬ Telegram: 0964997366
