ថ្លែងប្រាប់ Business Cambodia លោកបានលើកឡើងយ៉ាងដូច្នេះថា “សម្រាប់ខុនដូ ខ្ញុំមើលឃើញ ៣, ៤ ទីតាំងដែរ ដែលមានឱកាសសម្រាប់ការវិនិយោគ ទី១ តំបន់ផ្លូវ ៦០ ម៉ែត្រ ខាងផ្សារទំនើបអ៊ីអន ៣ បច្ចុប្បន្នកំពុងបុកខ្លាំងទៅលើការអភិវឌ្ឍខុនដូ ខណៈរាជរដ្ឋាភិបាលបានរៀបចំជាក្រុងរណបថ្មី១ទៀតផងដែរ (ទីក្រុងរណប ING City)។ មួយទៀតតំបន់កោះនរា ក៏ជាទីតាំងដែលមានចំណុចពិសេសៗ ដោយសារបន្ដិចទៀតគេក៏នឹងបុកសាងសង់ខុនដូដែរ។ ក្រៅពីកោះនរា ខ្ញុំមើលឃើញតំបន់សែនសុខ និងតំបន់ត្រោយម្ខាង ចំនៀរជ្រោយចង្វារ”។

លោក អ៊ុយ សុជី លើកឡើងបន្ដថា សម្រាប់ជនបរទេសដែលគេជ្រើសរើសខុនដូតែម្ដង ភាគច្រើនគឺជ្រើសរើសយកតំបន់បឹងកេងកង ដោយសារនៅតំបន់ហ្នឹងប្រជុំទៅដោយ special economic ច្រើន ហើយអ្វីក៏មានដែរនៅតំបន់នោះ។ ហើយទិដ្ឋភាពមួយនេះគឺងាយស្រួលសម្រាប់ការចេញចូលរបស់ភ្ញៀវ​បរទេស។ ដោយឡែកសម្រាប់តម្លៃជួលវិញលោកបានបញ្ជាក់ថា ខុនដូតំបន់បឹងកេងកងគឺមានតម្លៃជួលថ្លៃជាងគេ ប៉ុន្ដែតម្លៃខុនដូ ក៏ខ្ពស់ជាងគេផងដែរ។  

ការទិញខុនដូ ដែលអាចវិនិយោគបាន គឺអាចស្រ័យលើអ្នកវិនិយោគផ្ទាល់ បើក្នុងករណីទិញទិញផ្ដាច់ខុនដូដែលមានស្រាប់ គឺអាចដាក់ជួលភ្លាមនៅក្នុងឆ្នាំថ្មីបាន ប៉ុន្ដែក្នុងករណីទិញមិនបាន ឬទិញបានខុនដូកំពុងសាងសង់ទេ ត្រូវចាយពេលវេលាចន្លោះពី ១ ឆ្នាំទៅ ២ ឆ្នាំទៀតដើម្បីអាចដាក់ជួលបាន។ អ៊ីចឹងបើធៀបទៅ សម្រាប់គំនិតខ្ញុំបើមានលុយឥឡូវ គួរទិញខុនដូដែលសាងសង់ហើយ ដោយសារម្ចាស់មួយចំនួនដែលគាត់បង់ពីមុនមក គាត់អាចជួបបញ្ហាហិរញ្ញវត្ថុ ហើយអាចនឹងដាក់លក់ក្នុងតម្លៃមួយដែលទាបជាងពេលធម្មតា។ ប៉ុន្ដែសម្រាប់ការទិញគម្រោងខុនដូដែលកំពុងសាងសង់ ក៏ល្អម្យ៉ាងដែរព្រោះតម្លៃនៅទាប ដូច្នេះពេលគម្រោងសង់រួចតម្លៃនឹងកើនឡើងដែលអាចទាញផលចំណេញបាន។ នេះបើតាមការបញ្ជាក់បន្ថែមរបស់លោក។

លោក អ៊ុយ សុជី លើកឡើងទៀតថា ខុនដូជាហេតុផលមួយដែលយើងអាចទាញអ្នកវិនិយោគបរទេសបានច្រើន ជាពិសេសចិន តៃវ៉ាន់ ហុងកុង សឹហ្គាពួរ តែងតែមកវិនិយោគនៅខ្មែរយើងទាក់ទងនឹងខុនដូនេះតែម្ដង។ ហើយកាលពីពេលថ្មីៗកន្លងទៅនេះ រាជរដ្ឋាភិបាលក៏បានអញ្ជើញអ្នកធុរកិច្ចមកកម្ពុជាដើម្បីមកសិក្សាពីការវិនិយោគផងដែរ ហើយជាធម្មតាជនបរទេសមិនមានសិទ្ធិក្នុងការទិញអចលនទ្រព្យជាប់នឹងដីបានទេ អ៊ីចឹងគឺមានតែទិញខុនដូនេះតែប៉ុណ្ណោះ៕