កាលពីពេលថ្មីៗកន្លងទៅរដ្ឋាភិបាលរបស់ប្រទេសជប៉ុនបានសម្រេចចេញគោលការណ៍ថ្មីសម្រាប់ទេសចរកម្ពុជា អាចធ្វើការស្នើសុំ eVisa ដើម្បីចូលទៅលេងប្រទេសជប៉ុនបានដល់ ៩០ថ្ងៃ ហើយការស្នើសុំ eVisa នេះអាចស្នើសុំបានតាមប្រព័ន្ធអនឡាញ។

ថ្លែងក្នុងជំនួបពិភាក្សាការងាររវាងឯកឧត្តម ថោង ខុន រដ្ឋមន្ត្រីក្រសួងទេសចរណ៍ លោក អេណុ អាត់ស៊ូស្ស៊ឹ ឯកអគ្គរាជទូតជប៉ុនប្រចាំប្រទេសកម្ពុជា បានឱ្យដឹងថា នេះជាលើកដំបូងហើយដែលប្រទេសជប៉ុនអនុញ្ញាតឱ្យមាន eVisa ជូនប្រទេសចំនួន ១០ រួមទាំងកម្ពុជា អាចទៅលេងប្រទេសជប៉ុនបានដល់៩០ថ្ងៃ។លោកបន្តថា ការចេញគោលការណ៍នេះ ធ្វើឡើងក្នុងគោលបំណងដើម្បីជម្រុញវិស័យទេសចរណ៍ឱ្យកាន់តែមានភាពល្អប្រសើរឡើងថែមទៀត។

ជាការឆ្លើយតប ឯកឧត្តមរដ្ឋមន្ត្រី ថោង ខុន បានចាត់ទុកគោលការណ៍អនុញ្ញាតឱ្យមានការស្នើសុំទិដ្ឋការអនឡាញនេះ គឺពិតជាល្អប្រសើរណាស់សម្រាប់វិស័យទេសចរណ៍ប្រទេសទាំង២ ក្នុងនោះភ្ញៀវទេសចរមិនចំណាយពេលយូរ សន្សំសំចៃប្រាក់ ងាយស្រួល ព្រមទាំងទទួលបានរយៈពេលយូរក្នុងការស្នាក់នៅ ឬដើរទស្សនាប្រទេសជប៉ុន ហើយក៏អាចប្រើទិដ្ឋការនោះចេញចូលប្រទេសជប៉ុនបានច្រើនដងថែមទៀត។

ក្រៅពីការលើកឡើងអំពីគោលការណ៍ស្នើសុំ eVisa នេះ លោក អេណុ អាត់ស៊ូស្ស៊ឹ  ក៏បានសន្យាថានឹងបន្តទាក់ទាញវិនិយោគិនជប៉ុនឱ្យមកបណ្តាក់ទុនរកស៊ីនៅកម្ពុជាកាន់តែច្រើនបន្ថែមទៀត ជាពិសេសក្នុងវិស័យទេសចរណ៍។ខណៈបច្ចុប្បន្នកម្ពុជាបាននឹងកំពុងធ្វើការរៀបចំផែនការមេអភិវឌ្ឍន៍វិស័យទេសចរណ៍បេតិកភណ្ឌធំៗនៅកម្ពុជា ព្រមទាំងតំបន់ដែលមានសក្តានុពលផ្សេងទៀតជាច្រើនផងដែរ៕

អត្ថបទដោយ៖សម្បត្តិ សុខឡាង