ការធ្វើដំណើរតាមរយៈផ្លូវអាកាស អ្វីដែលជាកង្វល់សម្រាប់មនុស្សមួយចំនួននោះគឺការចំណាយច្រើន ជាមួយនឹងសំបុត្រយន្តហោះដែលមានតម្លៃខ្ពស់។ យ៉ាងណាមិញពេលនេះក្រុមហ៊ុនអាកាសចរណ៍ដែលមានតម្លៃហោះហើរទាបសមរម្យបំផុតលើពិភពលោកគឺ Air Asia បានដាក់ដំណើរការជើរហោះហើររបស់ខ្លួននៅកម្ពុជាជាផ្លូវការហើយ នាថ្ងៃទី០២ ខែឧសភា ឆ្នាំ២០២៤។
យោងតាមគេហទំព័រផ្លូវការរបស់ សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានឱ្យដឹងថា “សូមស្វាគមន៍យន្តហោះគ្រឿងទី១របស់ Air Asia Cambodia ដែលបានមកដល់អាកាសយានដ្ឋានអន្តរជាតិភ្នំពេញ នៅថ្ងៃទី២០ ខែមេសា ឆ្នាំ២០២៤នេះ ដោយបានរចនារូបប្រាសាទអង្គរវត្តនិងអក្សរ Cambodia យ៉ាងស្រស់ស្អាត ដើម្បីត្រៀមហោះហើរបង្ហាញនិងហោះហើរសាកល្បង នៅថ្ងៃទី៣០ ខែមេសា ខាងមុខនេះ ដើម្បីទទួលបានវិញ្ញាបនបត្រ ប្រតិបត្ដិករហោះហើរផ្លូវការ។ រីឯការហោះហើរក្នុងស្រុកជាផ្លូវការ នឹងរៀបចំដំណើរការនៅថ្ងៃទី០២ ខែឧសភា ឆ្នាំ២០២៤ នាដើមខែក្រោយ។”
សូមបញ្ជាក់ថាកាលវិភាគរបស់ក្រុមហ៊ុនអាកាសចរណ៍ អ៊ែរ អេស៊ា កម្ពុជា នឹងធ្វើការហោះហើរទៅមករវាង ភ្នំពេញ-សៀមរាប ចំនួន ៤ជើង ក្នុងមួយថ្ងៃ និងទិសដៅទៅមករវាងខេត្តព្រះសីហនុ-សៀមរាប ចំនួន ៤ជើងក្នុងមួយថ្ងៃផងដែរ ចំណែកឯការហោះហើរក្រៅប្រទេសនឹងចាប់ផ្តើមនាពេលខាងមុខ៕
អត្ថបទដោយ៖ ពីង ជូអេង