បាតុភូតតារាសាស្រ្តដ៏កម្រ ផ្កាយដុះកន្ទុយមួយឈ្មោះ C/2023 A3 ឬ ស៊ូជិនសាន អាត្លាស់ (Tsuchinshan–ATLAS) នឹងបង្ហាញខ្លួនក្នុងខែកញ្ញា ខណៈ៨ម៉ឺនឆ្នាំ ទើបបានឃើញម្តង។ នេះបើយោងតាមការចុះផ្សាយរបស់ Daily Galaxy នាថ្ងៃទី២៨ ខែសីហា ឆ្នាំ២០២៤។

ផ្កាយដុះកន្ទុយ ជិនសាន អាត្លាស់ (Tsuchinshan–ATLAS) នឹងចល័តមកកាន់រយៈចម្ងាយកៀកព្រះអាទិត្យបំផុត ៥៨លានគីឡូម៉ែត្រ ក្នុងថ្ងៃទី២៧ ខែកញ្ញា។ ហើយនៅថ្ងៃទី១២ ខែតុលា វានឹងចល័តមកដល់ចំណុចកៀកផែនដីបំផុត ៧១លានគីឡូម៉ែត្រ ដែលអនុញ្ញាតឲ្យបណ្តាប្រទេសនានាជុំវិញផែនដី រួមទាំងកម្ពុជា អាចមើលឃើញដោយភ្នែកទទេ តេឡេស្កូប ឬកាមេរ៉ាថតរូបជាដើម។

គួរជម្រាបផងដែរថា ផ្កាយដុះកន្ទុយ ស៊ូជិនសាន អាត្លាស់ (Tsuchinshan–ATLAS) ទើបតែត្រូវបានរកឃើញកាលពីឆ្នាំ២០២៣ប៉ុណ្ណោះ ដោយប្រព័ន្ធស្វែងរកអាចម៍ផ្កាយ និងជូនដំណឹងអំពីវត្ថុអវកាស ដែលអាចបង្កគ្រោះថ្នាក់ហៅកាត់ថា ATLAS (Asteroid Terrestrial-impact Last Alert System)៕