នៅថ្ងៃទី២ ខែឧសភា ឆ្នាំ២០២៤ នេះរោងចក្រដំឡើងរថយន្ដ តូយ៉ូតា (TOYOTA) របស់ជប៉ុន បានបើកដំណើរការជាផ្លូវការ។ ការសម្ពោធដាក់ឲ្យប្រើប្រាស់រោងចក្រដំឡើងរថយន្ដថ្មីនេះ បានធ្វើឲ្យប្រទេសកម្ពុជាមានរោងចក្រដំឡើងរថយន្ដសរុបចំនួន ៦ ហើយ និងបានកំពុងដំឡើងរថយន្ដម៉ាកល្បីៗដូចជា៖ TOYOTA, FORD, KIA, HYUNDIA, SAMYUNG និង GTV ជាដើម។

យោងតាមប្រសាសន៍របស់ឯកឧត្ដម ហែម វណ្ណឌី ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ថ្លែងក្នុងពិធីសម្ពោធដាក់ឲ្យប្រើប្រាស់រោងចក្រដំឡើងរថយន្ដ TOYOTA ខាងលើបានឲ្យដឹងថា បច្ចុប្បន្នកម្ពុជាមានរោងចក្រផ្គុំ និងដំឡើងរថយន្ដសរុប ៦ ដែលក្នុងនោះរួមមាន៖

ទី១៖ រោងចក្ររបស់ក្រុមហ៊ុន DAEHAN AUTO (CAMBODIA) CO., LTD. ចាប់ផ្តើមប្រតិបត្តិការឆ្នាំ២០២២ នៅខេត្តស្វាយរៀង ផលិតរថយន្ត SAMYUNG។

ទី២៖ រោងចក្ររបស់ក្រុមហ៊ុន RMA AUTOMOTIVE (CAMBODIA) CO LTD. ចាប់ផ្តើមឆ្នាំ២០២២ នៅខេត្តពោធិ៍សាត់ ផលិតរថយន្ត FORD។

ទី៣៖ រោងចក្ររបស់ក្រុមហ៊ុន CAMKO MOTOR CO., LTD. ចាប់ផ្តើមឆ្នាំ២០២២ នៅខេត្តកោះកុង ផលិតរថយន្ត HYUNDAI។

ទី៤៖ រោងចក្ររបស់ក្រុមហ៊ុន HGB MOTORS ASSEMBLY CO., LTD. ចាប់ផ្តើមឆ្នាំ២០២៣ នៅខេត្តបន្ទាយមានជ័យ ផលិតរថយន្ត KIA។

ទី៥៖ រោងចក្ររបស់ក្រុមហ៊ុន GTV MOTOR CO., LTD. នៅខេត្តកណ្តាល និងកំពុងដំណើរការសាកល្បង។

និងទី៦៖ រោងចក្ររបស់ TOYOTA TSUSHO MANUFACTURING (CAMBODIA) CO. LTD. មានទីតាំងនៅតំបន់សេដ្ឋកិច្ចពិសេស រ៉ូយ៉ាល់ ភ្នំពេញ និងកំពុងដាក់សម្ពោធឲ្យដំណើរការជាផ្លូវការនៅថ្ងៃនេះ៕